സിവില്‍ എഞ്ചിനീയറിംഗ് ബിരുദധാരിയും എറണാകുളം സ്വകാര്യ കമ്പനി ജീവനക്കാരിയുമായ പൂവാര്‍ പുത്തന്‍കട ജോയി ഭവനില്‍ രാഖി മോളെ (30) കൊലപ്പെടുത്തിയ കേസില്‍ വിചാരണ അന്തിമഘട്ടത്തിലെത്തി. 83 സാക്ഷികളെ ഇതിനോടകം വിസ്തരിച്ചു. 40 തൊണ്ടിമുതലുകള്‍ തെളിവില്‍ സ്വീകരിച്ചു. 102, 114 എന്നീ സാക്ഷികളെ 7 ന് വിസ്തരിക്കും. തിരുവനന്തപുരം അഞ്ചാം അഡീഷണല്‍ ജില്ലാ. സെഷന്‍സ് കോടതി മുമ്പാകെയാണ് വിചാരണ അന്തിമഘട്ടത്തിലെത്തി നില്‍ക്കുന്നത്.

കേസില്‍ രാഖിയിയുടെ മൃതദേഹം പോലീസ് പ്രേത വിചാരണ ചെയ്യുന്നതിന്റെ സിഡികള്‍ പ്രതികള്‍ക്ക് നല്‍കി. അന്വേഷണ ഉദ്യോഗസ്ഥനും ഫോട്ടോഗ്രാഫറും കോടതിയില്‍ ഹാജരായാണ് 3 സി ഡികള്‍ കോടതിയില്‍ ഹാജരാക്കിയത്. 2 പ്രതികളെ വീണ്ടും ഫെബ്രുവരി 7 ന് ഹാജരാക്കാന്‍ സെന്‍ട്രല്‍ ജയില്‍ സൂപ്രണ്ടിനോട് കോടതി ഉത്തരവിട്ടു. രണ്ടാം പ്രതി ജാമ്യത്തിലാണ്.

അതേസമയം പ്രതികളായ ആര്‍മി ഡ്രൈവറെയും ഫ്രീലാന്‍സ് ഫോട്ടോഗ്രാഫറെയും ജില്ലാ കോടതിയിലെത്തിച്ചത് തോക്കുധാരികളായ പോലീസ് കാവലിലാണ്.ശിക്ഷ ഭയന്ന് പ്രതികള്‍ വിചാരണക്കിടെ മുങ്ങാനുള്ള സാധ്യത മുന്നില്‍ കണ്ട കോടതി റിമാന്റ് വാറണ്ടില്‍ സ്‌ട്രോങ് എസ്‌കോര്‍ട്ട് എന്ന് രേഖപ്പെടുത്തിയതിനാലാണ് കനത്ത പോലീസ് കാവല്‍ ഏര്‍പ്പെടുത്തിയത്.


എഞ്ചിനീയറിംഗ് ബിരുദധാരി അമ്പൂരി രാഖി മോളെ കഴുത്തു ഞെരിച്ച് കൊലപ്പെടുത്തി മൃതദേഹം വേഗത്തില്‍ അഴുകി മണ്ണിലലിയാന്‍ ഉപ്പു വിതറി വീട്ടു വളപ്പില്‍ കുഴിച്ചിട്ട കേസാണിത്. 2019 ജൂലൈ 21 ന് കൊലപ്പെടുത്തിയ ശേഷം വസ്ത്രങ്ങള്‍ മാറ്റി നഗ്‌നയാക്കി കുഴിച്ചിട്ട മൃതദേഹത്തിന് മുകളില്‍ വൃക്ഷ തൈകള്‍ നട്ടു പിടിപ്പിച്ചിരുന്നു. 25 നാണ് മൃതദേഹം കണ്ടെടുത്തത്

പിതാവിന്റെ പരാതി പൂവാര്‍ പോലീസ് തുമ്പുണ്ടാക്കാന്‍ വഴിയില്ലെന്ന് കാട്ടി എഴുതിതള്ളാന്‍ തുടങ്ങവേ ഹൈക്കോടതിയില്‍ പിതാവ് സമര്‍പ്പിച്ച ഹേബിയസ് കോര്‍പ്പസ് റിട്ട് ഹര്‍ജിയാണ് ക്രൂര കൊലപാതകത്തിന്റെ ചുരുളഴിച്ചത് :രാഖിയുമായുള്ള ആറു വര്‍ഷത്തെ പ്രണയത്തിന് ശേഷം മറ്റൊരു വിവാഹം കഴിക്കാനുള്ള കാമുകനായ ആര്‍മിക്കാരന്റെ ശ്രമമാണ് കൊലയിലേക്ക് നയിച്ചത്:ബന്ധത്തില്‍ നിന്ന് പിന്മാറണമെന്ന ആവശ്യം രാഖി നിരസിച്ചതും മറ്റൊരു വിവാഹത്തിന് ശ്രമിച്ച കാമുകന്റെ വിവാഹം മുടക്കാന്‍ ശ്രമിച്ചതും ആത്മഹത്യ ചെയ്യുമെന്നും സംഭവം നവ മാധ്യമങ്ങളിലൂടെ വൈറലാക്കുമെന്ന രാഖിയുടെ ഭീഷണിയുമാണ് കൊലക്ക് കാരണമായത്