കേരള ബജറ്റില്‍ സകലതിനും വില കൂട്ടി സാധാരണക്കാരന്റെ നടുവൊടിക്കുന്ന സര്‍ക്കാരിന്റെ ധൂര്‍ത്ത് കുറക്കാത്തത് വലിയ പ്രതിഷേധത്തിനിടയാക്കുന്നുണ്ട്. വരുമാനം കുറഞ്ഞെന്നും ഇനി വായ്പയെടുക്കാന്‍ കഴിയില്ലെന്നും മനസിലാക്കിയിട്ടും പരമാവധി സുഖസൗകര്യങ്ങള്‍ അനുഭവിക്കാനുള്ള പിണറായിയുടെയും മന്ത്രിമാരുടെയും അത്യാഗ്രഹത്തിന് മറ്റൊരു ഉദാഹരണമായി മാറുകയാണ് മന്ത്രിമാരുടെ കുടുംബവിരുന്നും, കുടുംബസംഗമവും.

മന്ത്രിമാര്‍ തമ്മിലുള്ള ബന്ധം ഊട്ടി ഉറപ്പിക്കുന്നതിനും കുുടുംബങ്ങള്‍ തമ്മില്‍ സംഗമിക്കുന്നതിനുമുള്ള മന്ത്രി കുടുംബ സംഗമത്തിനായി സര്‍ക്കാര്‍ പൊടിച്ചു കളയുന്നത് ലക്ഷങ്ങള്‍. മന്ത്രിമാരെയും അവരുടെ കുടുംബാഗംങ്ങളെയും ഉള്‍പ്പെടുത്തി നടത്തി കൊണ്ടിരിക്കുന്ന അത്താഴ വിരുന്നിന് സര്‍ക്കാര്‍ ലക്ഷങ്ങള്‍ മാസം തോറും നഷ്ടപ്പെടുത്തി കളയുന്നത് ഇടതുപക്ഷത്തിന്റെ അനുമതിയോടെയാണോയെന്ന കാര്യത്തില്‍ വ്യക്തതയില്ല. പാവപ്പെട്ടവന്റെ സര്‍ക്കാര്‍ എന്ന് അവകാശപ്പെടുന്ന പിണറായി സര്‍ക്കാരാണ് എങ്ങും കേട്ടുകള്‍വി പോലുമില്ലാത്ത മന്ത്രി കുടുംബ സംഗമങ്ങള്‍ നടത്തി മുടിക്കുന്നതെന്നത് ഏറെ അതിശയകരമാണ്.

ഖജനാവിലെ നികുതി പണം എങ്ങനെ ധൂര്‍ത്തടിച്ചു കളയാം എന്ന് ആലോചിക്കുന്ന മന്ത്രിമാരുടെയും മുഖ്യമന്ത്രിയുടെയും തലയില്‍ ഉദിക്കുന്ന ഇത്തരം ചിലവ് മാമാങ്കങ്ങള്‍ പൊതുജനത്തെ കൊള്ളയടിക്കുന്നതിന് തുല്യമായി കണക്കാക്കാം. എല്ലാ മാസവും ആദ്യത്തെ മന്ത്രിസഭ യോഗത്തിന് ശേഷം എതെങ്കിലും മന്ത്രിയുടെ വസതിയില്‍ വിരുന്നൊരുക്കുകയാണ് പതിവ്.

ഒന്നാം പിണറായി സര്‍ക്കാരിന്റെ കാലത്ത് ആരംഭിച്ച മന്ത്രി കുടുംബ സംഗമം രണ്ടാം പിണറായി സര്‍ക്കാരിന്റെ കാലത്തും തുടര്‍ന്നു. മന്ത്രിമാരും ജീവനക്കാരും മാറിയെന്നേയുള്ളൂ. ചെലവുകള്‍ കൂടിയെന്ന തൊഴിച്ചാല്‍ പങ്കെടുക്കുന്നവരുടെ എണ്ണത്തിലോ, വിഭവങ്ങളുടെയും ആഡംബരത്തിന്റെയും കാര്യത്തിലോ കുറവുണ്ടാകാറില്ല. മന്ത്രിസഭ യോഗത്തിന് ശേഷം എല്ലാ മന്ത്രിമാരും അവരുടെ കുടുംബാംഗങ്ങളും കൂടാതെ പ്രധാനപ്പെട്ടതും അല്ലാത്തതുമായ സ്റ്റാഫും അവരുടെ കുടുംബാംഗങ്ങള്‍ക്കുമാണ് അത്താഴ വിരുന്നൊരുക്കുന്നത്. മുഖ്യമന്ത്രി കുടുംബസമേതം പങ്കെടുക്കാറാണ് പതിവ്.

മന്ത്രമാര്‍ തമ്മിലുള്ള അകല്‍ച്ച കുറയ്ക്കാനാകുമെന്ന വിലയിരിത്തലിലാണ് കുടുംബ വിരുന്ന് നടത്തി കൊണ്ടിരിക്കുന്നത്. ഒരോ മാസവും ഓരോ മന്ത്രിയുടെ വസതിയിലാണ് കുടുംബ വിരുന്ന് നടത്തുന്നത്. എന്നാല്‍ മന്ത്രിയുടെ ശമ്പളത്തില്‍ നിന്നല്ല വിരുന്നിന് പണം കണ്ടെത്തുന്നതെന്നതാണ് ഏറെ കഷ്ടം. കുടുംബവിരുന്നിനായി ലക്ഷങ്ങള്‍ മുടക്കി പന്തലും ലൈറ്റും സൗണ്ട് സിസ്റ്റവുമടക്കമുള്ള സംവിധാനങ്ങള്‍ ഒരുക്കിയിരിക്കും. പന്തല്‍, മറ്റു സൗകര്യങ്ങള്‍ ഭക്ഷണം ഉള്‍പ്പടെ ഒരുമാസത്തെ ശരാശരി ചിലവ് അഞ്ചു ലക്ഷം രൂപയാണ്. പൊതുഭരണ വകുപ്പിന്റെ മേല്‍നോട്ടത്തിലാണ് വിരുന്ന് സല്‍ക്കാരം നടത്തുന്നത്. എല്ലാം മാസവും ആദ്യത്തെ മന്ത്രിസഭ യോഗത്തിന് ശേഷം ഒരോ മന്ത്രിമാരുടെ വീട്ടിലും മാറി മാറിയാണ് വിരുന്ന് നടത്തുന്നത്. അവിടെയെല്ലാം ഇതേ ആഢംബരം ആവര്‍ത്തിക്കും. ഇതൊക്കെ ഒരുക്കുന്നതിനായി പൊതുഭരണ വകുപ്പ് ഉദ്യോഗ്‌സഥരുടെ ബിനാമി സ്ഥാപനങ്ങളും പ്രവര്‍ത്തിക്കുന്നുണ്ട്. മന്ത്രിസഭ യോഗ ചിലവെന്ന രേഖപ്പെടുത്തിയാണ് ഈ ധൂര്‍ത്തിനുള്ള പണം എഴുതിയെടുക്കുന്നത്.

പിണറായി സര്‍ക്കാര്‍ അധികാരത്തിലിരുന്ന കഴിഞ്ഞ ഏഴ് വര്‍ഷത്തെ കണക്കെടുത്താല്‍ , മൊത്തം 84 മാസം . അതായത് ഒരു മാസം ഏറ്റവും കുറഞ്ഞത് അഞ്ച് ല്കഷം രൂപ വെച്ച് കണക്ക് കൂട്ടിയാല്‍ നാല് കോടി ഇരുപത് ലക്ഷം രൂപ ഇതിനായി ചിലവഴിച്ചിരിക്കുന്നുവെന്നതാണ് ഏകദേശ കണക്ക്. സാമ്പത്തിക രംഗം തകര്‍ന്ന് കടം വാങ്ങാന്‍ പോലും കെല്പില്ലാതിരിക്കുന്ന സര്‍ക്കാരിന് ഇത്തരം ധൂര്‍ത്തകള്‍ അവസാനിപ്പിക്കുന്നതിനോട് യോജിപ്പില്ലെന്നതാണ് വസ്തുത. അതുകൊണ്ടാണ് കൂടുതല്‍ ആഡംബര വാഹനങ്ങള്‍ വാങ്ങിച്ചു കൂട്ടുന്നതും പാര്‍ട്ടി പ്രവര്‍ത്തകര്‍ക്കായി വഴിവിട്ട ഇടപാടുകള്‍ നടത്തി കൊടുക്കുന്നതും.

ആവശ്യമുള്ളിടത്തും ഇല്ലാത്തിടത്തും താല്കാലിക നിയമനങ്ങള്‍ നടത്തിയും, സമൂഹത്തിന് യാതൊരു ഉപകാരമില്ലാത്ത പദ്ധതികള്‍ കൊണ്ടു വന്നും ജനത്തെ പാര്‍ട്ടിക്കാര്‍ക്കായി കൊള്ളയടിച്ചു കൊടുക്കുകയാണ് പിണറായി വിജയന്‍ എന്ന ആരോപണമാണ് ഉയരുന്നത്.  

നടക്കില്ലെന്ന് പൂര്‍ണ്ണമായി ഉറപ്പുണ്ടായിട്ടും സില്‍വര്‍ ലൈനായി കെ റെയില്‍ വഴി നാല്പത്തൊമ്പത് കോടി രൂപ നഷ്ടപ്പെടുത്തിയതും, ആയിരക്കണക്കിന് ജീവനക്കാരുടെ തൊഴില്‍ സമയം അതിനായി വിനിയോഗിച്ചതും സര്‍ക്കാര്‍ പിടിപ്പുകേടാണെന്ന കാണേണ്ടി വരും.പാവപ്പെട്ടവന്റെ ചികിത്സാ ചിലവിനോ വീട് നിര്‍മ്മിക്കാനോ പണം നല്കാത്ത സര്‍ക്കാര്‍ മന്ത്രിമാരുടെയും കുടുംബങ്ങളുടെയും ധൂര്‍ത്തിന് ഏതറ്റംവരേയും പോകുമെന്നതിന്റെ ഉദാഹരണമാണ് മന്ത്രമാരുടെ വിരുന്ന സല്‍ക്കാരം. എന്നാലത് സ്വന്തം ശമ്പളത്തില്‍ നിന്നാകണമെന്ന് സിപി ഐ പോലും ആവശ്യപ്പെട്ടിട്ടില്ല. പരമാവധി കൊള്ളയടിക്കുക, ആവോളം ആസ്വദിക്കുക എന്ന വ്യത്യസ്തമായ ലൈനിലേയ്ക്കാണ് പിണറായിയും മന്ത്രിമാരും എത്തി നില്ക്കുന്നത്.