പണി പിന്നാലെ.... വാഹന പരിശോധന കടുപ്പിക്കുന്നു.... മദ്യപിച്ചു വാഹനമോടിക്കുന്നവര്‍ സൂക്ഷിക്കുക, പിഴ വരുന്നത് എസ്.എം.എസ്സായി.
കഴിഞ്ഞ ദിവസങ്ങളില്‍ പോലീസ് വ്യാപകമായി നടത്തിയ പരിശോധനയില്‍ ജില്ലയില്‍ 598 കേസുകള്‍ രജിസ്റ്റര്‍ ചെയ്തിട്ടുണ്ട്.

കൊല്ലം സിറ്റി പോലീസിന്റെ പരിധിയില്‍ 296 കേസുകളും റൂറല്‍ പരിധിയില്‍ 302 കേസുകളുമാണ് രജിസ്റ്റര്‍ ചെയ്തത്. 338 പേരുടെ ലൈസന്‍സ് റദ്ദ് ചെയ്യാനുള്ള നടപടികള്‍ പോലീസ് ആരംഭിച്ചിട്ടുണ്ട്. സിറ്റി പോലീസ് പരിധിയില്‍ 239 പേരുടെയും റൂറലില്‍ 99 പേരുടെയും ലൈസന്‍സുകളാണ് റദ്ദ് ചെയ്യാനായി മോട്ടോര്‍വാഹനവകുപ്പിനു കൈമാറിയിട്ടുള്ളത്. 239 പേരുടെ ലൈസന്‍സുകള്‍ കണ്ടുകെട്ടാനും നടപടി സ്വീകരിച്ചിട്ടുണ്ട്.

വാഹനപരിശോധന ഹൈടെക് ആയതോടെ ഉടമകള്‍ അറിയാതെതന്നെ നിയമലംഘനങ്ങള്‍ക്കുള്ള പിഴ കുന്നുകൂടുന്നത് പതിവായി. പരിശോധന ഡിജിറ്റല്‍ ആയതോടെ വാഹനം തടയുന്നത് കുറഞ്ഞു. 

അപകടകരമായി ഓടിച്ചാല്‍ 2000 രൂപ, ശബ്ദമലിനീകരണം 2000 രൂപ, മദ്യപിച്ച് വാഹനമോടിച്ചാല്‍ 10,000 രൂപ, ലൈസന്‍സ് ഇല്ലാതെ ഓടിച്ചാല്‍ 5000 രൂപ, അമിതവേഗം എല്‍.എം.വി 1500 രൂപ, മീഡിയം ഹെവി വാഹനങ്ങള്‍ 3000 രൂപ,സീറ്റ് ബെല്‍റ്റ് ധരിക്കാതിരുന്നാല്‍ 500 രൂപ,ഇരുചക്ര വാഹനത്തില്‍ രണ്ടില്‍ കൂടുതല്‍ ആളുകളുണ്ടെങ്കില്‍ 1000 രൂപ പിഴയീടാക്കുന്നതാണ്. 

 അമിതവേഗമടക്കമുള്ള നിയമലംഘനങ്ങള്‍ വാഹനത്തിന്റെ ചിത്രം സഹിതം മോട്ടോര്‍വാഹനവകുപ്പിന്റെ ക്യാമറയില്‍ തെളിയും. വകുപ്പിന്റെ വെബ്‌സൈറ്റില്‍ ചിത്രവും സമയവും സഹിതമുള്ള വിവരങ്ങള്‍ ആര്‍.ടി. രേഖകള്‍ക്കൊപ്പം രേഖപ്പെടുത്തും. പിഴ വന്നത് അറിയാതെ പോയാല്‍ മോട്ടോര്‍വാഹനവകുപ്പിന്റെ സേവനങ്ങള്‍ക്കായി ഉടമയെത്തുമ്പോഴാകും തുക ഒരുമിച്ച് അടയ്ക്കേണ്ടിവരിക. മോട്ടോര്‍വാഹനനിയമപ്രകാരം വലിയ തുകയാണ് പിഴയിനത്തില്‍ ഈടാക്കുന്നത്.