ഇത്രയും പ്രതീക്ഷിച്ചില്ല... സമൂഹത്തിന് ഭീഷണി ആയേക്കാവുന്ന ആകാശ് തില്ലങ്കേരിയെയും ജിജോ തില്ലങ്കേരിയെയും കാപ്പ ചുമത്തി അറസ്റ്റ് ചെയ്ത് ജയിലില് അടച്ചു; ആകാശും ജിജോയും സ്ഥിരം കുറ്റവാളിയാണെന്ന പൊലീസ് റിപ്പോര്ട്ട് ജില്ലാ കളക്ടര് അംഗീകരിച്ചതോടെ ഇനി ആറു മാസത്തേക്ക് കരുതല് തടങ്കലില് കഴിയണം
കഴിഞ്ഞ ആഴ്ചകളില് മാധ്യമങ്ങളിലും സാമൂഹിക മാധ്യമങ്ങളിലും തിളങ്ങിനിന്നയാളാണ് സ്വര്ണ്ണക്കടത്ത് ക്വട്ടേഷന് തലവന് ആകാശ് തില്ലങ്കേരി. പാര്ട്ടിയ്ക്ക് യോഗം വിളിച്ചുകൂട്ടി പോലും പ്രതിരോധിക്കേണ്ടി വന്നു. ഇപ്പോഴിതാ ആകാശ് തില്ലങ്കേരിയെയും കൂട്ടാളി ജിജോ തില്ലങ്കേരിയെയും കാപ്പാ ചുമത്തി ജയിലില് അടച്ചു.
കണ്ണൂര് സെന്ട്രല് ജയിലില് പുലര്ച്ചെ നാലുമണിക്കാണ് ഇരുവരെയും എത്തിച്ചത്. ആകാശും ജിജോയും സ്ഥിരം കുറ്റവാളിയാണെന്ന പൊലീസ് റിപ്പോര്ട്ട് ജില്ലാ കളക്ടര് അംഗീകരിച്ചതോടെ ഇനി ആറു മാസത്തേക്ക് ഇരുവരും കരുതല് തടങ്കലില് കഴിയേണ്ടി വരും.
ആകാശിനെതിരെ രണ്ട് കൊലപാതക കേസ് ഉള്പെടെ 14 ക്രിമിനല് കേസുകളുണ്ട്. 23 കേസുകളാണ് ജിജോ തില്ലങ്കേരിക്ക് എതിരായുള്ളത്. ഷുഹൈബ് വധം പാര്ട്ടി ആഹ്വാന പ്രകാരം താന് നടത്തിയതാണെന്ന തരത്തില് ആകാശ് ഫേസ്ബുക്ക് പോസ്റ്റ് ഇട്ടതോടെയാണ് സി പി എം ആകാശിനെതിരെ തിരിഞ്ഞത്. ഇന്നലെ രാത്രിയാണ് ആകാശും ജിജോയും അറസ്റ്റിലായത്
മട്ടന്നൂര് ഷുഹൈബ് വധക്കേസിലെ പ്രതി ആകാശ് തില്ലങ്കേരിയെ 'കാപ്പ' (ഗുണ്ടാ ആക്ട്) ചുമത്തി അറസ്റ്റ് ചെയ്തതോടെ വീണ്ടും ചര്ച്ചയാകുന്നു. മുഴക്കുന്ന് പൊലീസാണ് ആകാശിനെ അറസ്റ്റ് ചെയ്തത്. സമൂഹത്തിന് ഭീഷണിയായേക്കുമെന്ന വിലയിരുത്തലിലാണു നടപടിയെന്നു പൊലീസ് പറഞ്ഞു. ആകാശിന്റെ വീട്ടിലെത്തിയാണ് അറസ്റ്റ് ചെയ്തത്. ആകാശിന്റെ കൂട്ടാളി ജിജോ തില്ലങ്കേരിയും അറസ്റ്റിലായി.
ഡിവൈഎഫ്ഐ പ്രാദേശിക നേതാക്കളുടെ പരാതിയില് ആകാശിനെതിരെ സ്ത്രീത്വത്തെ അപമാനിച്ചുവെന്നതിനു മുഴക്കുന്ന് പൊലീസും ഡിവൈഎഫ്ഐ പ്രവര്ത്തകനെ ഫെയ്സ്ബുക്കിലൂടെ ഭീഷണിപ്പെടുത്തിയെന്നതിനു മട്ടന്നൂര് പൊലീസും കേസ് റജിസ്റ്റര് ചെയ്തിരുന്നു.
സ്ത്രീത്വത്തെ ഫെയ്സ്ബുക്കില് അപമാനിച്ചുവെന്ന കേസില്, ആകാശ് തില്ലങ്കേരി കഴിഞ്ഞദിവസം കോടതിയില് കീഴടങ്ങി. ആകാശ് ഉള്പ്പെടെയുള്ളവര്ക്കു കോടതി ജാമ്യം അനുവദിച്ചിരുന്നു. ഷുഹൈബ് വധം സിപിഎം നേതൃത്വത്തിന്റെ അറിവോടെയാണെന്ന തരത്തിലുള്ള ആകാശ് തില്ലങ്കേരിയുടെ പോസ്റ്റ് വിവാദമായതിനു തൊട്ടുപിറകെയാണു സ്ത്രീത്വത്തെ അപമാനിച്ചുവെന്ന കേസും അറസ്റ്റുമുണ്ടായത്.
ഇതിനിടയിലാണ് തില്ലങ്കേരിയില് സിപിഐഎം പൊതുയോഗം സംഘടിപ്പിച്ചത്. പൊതുയോഗത്തില് ആകാശിനെതിരെ രൂക്ഷവിമര്ശനവുമായി പി ജയരാജനും രംഗത്തെത്തി. ആകാശും സംഘവുമല്ല സിപിഐഎമ്മിന്റെ മുഖമെന്നും തില്ലങ്കേരിയിലെ പാര്ട്ടി നേതൃത്വവും അംഗങ്ങളുമാണ് പാര്ട്ടിയുടെ മുഖമെന്ന് പി ജയരാജന് വ്യക്തമാക്കി. ആകാശാണ് പാര്ട്ടി മുഖമെന്ന് വരുത്തി തീര്ക്കാനാണ് ഒരുവിഭാഗം മാധ്യമങ്ങളുടെ ശ്രമമെന്നും പി ജയരാജന് പറഞ്ഞു.
തില്ലങ്കേരിയിലെ പാര്ട്ടിയില് കുഴപ്പമുണ്ടെങ്കില് അത് അഭിമുഖീകരിക്കും. സിപിഐഎം ക്വട്ടേഷന് സംഘത്തിന്റെ പിന്നാലെ പോയിട്ടില്ല. ക്വട്ടേഷന്കാരുടെ സഹായവും സേവനവും സിപിഐഎമ്മിന് വേണ്ട. ആകാശിനെ പാര്ട്ടിയില് നിന്ന് പുറത്താക്കിയത് താന് സെക്രട്ടറി ആയിരുന്നപ്പോഴാണ്. ഷുഹൈബ് വധക്കേസില് പ്രതികളായ എല്ലാവരെയും പാര്ട്ടി പുറത്താക്കിയതാണെന്നും വധത്തെ സിപിഐഎം നേരത്തെ തള്ളിപ്പറഞ്ഞതാണെന്നും പി ജയരാജന് വ്യക്തമാക്കി.
ആകാശിനെതിരെ വിമര്ശനവുമായി സിപിഐഎം കണ്ണൂര് ജില്ലാ സെക്രട്ടറി എംവി ജയരാജനും രംഗത്തെത്തി. ചുവപ്പ് തലയില് കെട്ടിയാല് കമ്മ്യൂണിസ്റ്റ് ആവില്ലെന്നും ആകാശ് തില്ലങ്കേരി പേരില് നിന്ന് തില്ലങ്കേരി മാറ്റണമെന്നും എംവി ജയരാജന് ആവശ്യപ്പെട്ടു. ക്വട്ടേഷന് സംഘങ്ങളെ പാര്ട്ടി സംരക്ഷിക്കില്ല. ക്വട്ടേഷന് സംഘങ്ങളുടെ പേരില് പാര്ട്ടിയില് ഭിന്നതയില്ല. ഇത്തരം സംഘത്തിന്റെ ഭീഷണിക്ക് മുന്നില് പാര്ട്ടി മുട്ട് മടക്കില്ലെന്നും എംവി ജയരാജന് തില്ലങ്കേരിയിലെ പൊതുയോഗത്തില് പറഞ്ഞു. നവ മാധ്യമ ക്വട്ടേഷന് പണി സിപിഐഎം ആരെയും ഏല്പിച്ചിട്ടില്ലെന്നും അദ്ദേഹം വ്യക്തമാക്കി.
"
https://www.facebook.com/Malayalivartha
