വിഷപ്പുക ശ്വസിച്ച് ആര്‍ക്കും ആരോഗ്യപ്രശ്നമില്ലെന്ന വാദം തെറ്റ്... ബ്രഹ്മപുരത്തെ തീപിടിത്തം ഗുരുതര പ്രശ്നമെന്ന് പ്രതിപക്ഷ നേതാവ് വി.ഡി.സതീശന്‍.


പ്രദേശത്ത് ആരോഗ്യ അടിയന്തരാവസ്ഥ പ്രഖ്യാപിക്കണമെന്ന് ആവശ്യപ്പെട്ട് സതീശന്‍. തീ പൂര്‍ണമായും അണയ്ക്കാനുള്ള സംവിധാനം കേരളത്തിനില്ലെങ്കില്‍ കേന്ദ്രത്തിന്റെയോ മറ്റ് ഏജന്‍സികളുടെയോ സഹായം തേടണം. വായു മലീനീകരണവുമായി ബന്ധപ്പെട്ട പരിശോധനകള്‍ നടത്തി പരിഹാരം കണ്ടെത്തുകയും വേണം.

ആശുപത്രിയ്ക്ക് അകത്ത് വരെ പുക നിറഞ്ഞിരിക്കുകയാണ്. പ്രശ്നത്തെ ലാഘവത്തോടെയാണ് സര്‍ക്കാര്‍ കാണുന്നതെന്നും സതീശന്‍ വിമര്‍ശിച്ചു. ബ്രഹ്മപുരത്തെ മാലിന്യ കരാറുമായി ബന്ധപ്പെട്ട് വ്യാപക അഴിമതി നടന്നിട്ടുണ്ട്. പെട്രോള്‍ ഒഴിച്ചാണ് മാലിന്യം കത്തിച്ചിരിക്കുന്നത്. സംഭവത്തിന് പിന്നില്‍ കരാറുകാര്‍ ആണെന്നും സതീശന്‍ ആരോപിക്കുന്നു.