കാണാതായ യുവതിയുടെ മൃതദേഹം കട്ടിലിനടിയില് പുതപ്പില് പൊതിഞ്ഞ നിലയില് കണ്ടെത്തി
ഇടുക്കി കാഞ്ചിയാറില് യുവതിയുടെ മൃതദേഹം കട്ടിലിനടിയില് പുതപ്പില് പൊതിഞ്ഞ നിലയില് കണ്ടെത്തി. ശനിയാഴ്ച മുതല് കാണാതായ പേഴുംകണ്ടം വട്ടമുകളേല് വിജേഷിന്റെ ഭാര്യ അനുമോളുടെ(വല്സമ്മ, 27) മൃതദേഹമാണ് കട്ടിലിനടിയില് കണ്ടെത്തിയത്. മൃതദേഹത്തിന് ദിവസങ്ങളുടെ പഴക്കമുണ്ട്. കൊലപാതകമാണെന്നാണ് പ്രാഥമിക നിഗമനം. ഒരു മകളുണ്ട്.
കാഞ്ചിയാര് പള്ളിക്കവലയിലുള്ള ജ്യോതി പ്രീപ്രൈമറി സ്കൂളിലെ അധ്യാപികയായ അനുമോള് വെള്ളിയാഴ്ച സ്കൂളില് എത്തിയിരുന്നു. മകളെ കാണാതായതിനെക്കുറിച്ച് അന്വേഷിക്കാനെത്തിയ മാതാപിതാക്കളും സഹോദരനുമാണ് അടച്ചിട്ട വീട്ടില് മൃതദേഹം കണ്ടെത്തിയത്. പൊലീസും സ്ഥലത്തെത്തി പരിശോധന നടത്തുകയാണ്.
കഴിഞ്ഞ ഞായറാഴ്ചയാണ് അനുമോളെ കാണാനില്ലെന്ന് കാട്ടി യുവതിയുടെ കുടുംബാംഗങ്ങളും കട്ടപ്പന പൊലീസില് പരാതി നല്കിയത്. സ്റ്റേഷനില് പോകുന്നതിന് മുന്പ് മാതാപിതാക്കളും സഹോദരനും രാവിലെ പേഴുംകണ്ടെത്തെ വീട്ടില് എത്തിയിരുന്നു. വത്സമ്മയുടെ അമ്മ ഫിലോമിന വീട്ടിനുള്ള കിടപ്പുമുറിയില് കയറിയപ്പോള് ബിജേഷ് സംശയം തോന്നാത്ത വിധത്തില് ഇവരെ പിന്തിരിപ്പിച്ചു പറഞ്ഞയച്ചിരുന്നു.
തുടര്ന്ന് ഇന്ന് വൈകുന്നേരത്തോടെ യുവതിയുടെ മാതാപിതാക്കള് പേഴും കണ്ടത്തെ വീട്ടില് വീണ്ടും എത്തിയപ്പോള് വീട് പൂട്ടിയ നിലയിലായിരുന്നു. സംശയത്തെ തുടര്ന്ന് സഹോദരനും അച്ഛനും ചേര്ന്ന് വീടിന്റെ പിന്വാതില് തുറന്ന് നടത്തിയ തിരച്ചിലിലാണ് കട്ടിലിനടിയില് പുതപ്പില് പൊതിഞ്ഞ നിലയില് മൃതദ്ദേഹം കണ്ടെത്തിയത്.
പൊലീസില് വിവരമറിയിച്ചതനുസരിച്ച് കട്ടപ്പന ഡി വൈ എസ് പി യുടെ നേതൃത്വത്തിലുള്ള സംഘം സ്ഥലത്തെത്തി. കൊലപാതകമെന്നാണ് പൊലീസ് നല്കുന്ന പ്രാഥമിക വിവരം. ബിജേഷും അനുവും തമ്മില് കുടുംബ പ്രശ്നങ്ങള് ഉണ്ടായിരുന്നുവെന്നാണ് വിവരം. ബുധാനാഴ്ച രാവിലെ ഡോഗ് സ്ക്വാഡും ശാസ്ത്രീയ പരിശോധന വിഭാഗവും എത്തിയ ശേഷമാകും ഇന്ക്വസ്റ്റ് ഉള്പ്പടെയുള്ള നടപടികള്. ഭര്ത്താവ് ബിജേഷിനായി പൊലീസ് തിരച്ചില് തുടങ്ങി.
https://www.facebook.com/Malayalivartha
