കൂത്തുപറമ്പ് മെരുവമ്പായിയില്‍ ടവേര അപകടത്തില്‍പ്പെട്ട് രണ്ട് പേര്‍ മരിച്ചു. ഉരുവച്ചാല്‍ കുഴിക്കല്‍ മഞ്ചേരിപ്പൊയിലിലെ അരവിന്ദാക്ഷന്‍(65), ചെറുമകന്‍ ഷാരോണ്‍(11)എന്നിവരാണ് മരിച്ചത്.വെള്ളിയാഴ്ച പുലര്‍ച്ചെ 3:45 ഓടെ മെരുവമ്പായി ടെലഫോണ്‍ എക്സ്‌ഞ്ചേഞ്ചിന് സമീപത്ത് വച്ചാണ് അപകടമുണ്ടായത്.

നിയന്ത്രണം വിട്ട ടവേര റോഡരികിലെ കലുങ്കില്‍ ഇടിക്കുകയായിരുന്നു.പരിക്കേറ്റവരെ നാട്ടുകാരും പൊലീസും ചേര്‍ന്ന് ഉടന്‍ ആശുപത്രിയിലെത്തിച്ചെങ്കിലും അരവിന്ദാക്ഷന്റെയും ഷാരോണിന്റെയും ജീവന്‍ രക്ഷിക്കാനായില്ല.

അപകടത്തില്‍ ഡ്രൈവര്‍ ഉള്‍പ്പെടെ വാഹനത്തില്‍ ഉണ്ടായിരുന്ന എട്ട് പേര്‍ക്ക് പരുക്ക്. ഇവര്‍ കണ്ണൂരിലെ സ്വകാര്യ ആശുപത്രിയില്‍ ചികിത്സയിലാണ്.

വിദേശത്തായിരുന്ന അരവിന്ദാക്ഷന്റെ മകന്റെ ഭാര്യ ശില്പയേയും മകള്‍ പതിനൊന്നുകാരി ആരാദ്യയേയും കരിപ്പൂര്‍ വിമാനത്താവളത്തില്‍ നിന്നും മഞ്ചേരിപ്പൊയിലിലെ വീട്ടിലേക്ക് കൂട്ടിക്കൊണ്ട് വരുന്നതിനിടെയാണ് അപകടം ഉണ്ടായത്.

ഡ്രൈവര്‍ മെരുവമ്പായി സ്വദേശി അഭിഷേക് ഗുരുതരാവസ്ഥയിലാണ്.അരവിന്ദാക്ഷന്റെ ഭാര്യ സ്വയം പ്രഭ, മകന്‍ ഷിനു, ഷിനുവിന്റെ ഭാര്യ ധനുഷ, ഇവരുടെ മക്കളായ സിദ്ധാര്‍ത്ഥ, സാരംഗ് എന്നിവരാണ് വാഹനത്തില്‍ ഉണ്ടായിരുന്നത്. മരിച്ച ഷാരോണ്‍ ഷിനുവിന്റെയും ധനുഷയുടെയും മകനാണ്.