മാലിന്യം വലിച്ചെറിയുന്ന കേസുകളില്‍ പിടികൂടുന്ന വാഹനങ്ങള്‍ ഹൈക്കോടതിയുടെ അറിവില്ലാതെ വിട്ടു നല്‍കരുതെന്ന് നിര്‍ദ്ദേശം.

അതേസമയം മാലിന്യ സംസ്‌കരണത്തില്‍ വീഴ്ച വരുത്തിയ കൊച്ചി നഗരസഭയ്ക്ക് 100 കോടി രൂപ പിഴ ചുമത്തിയ ഹരിത ട്രൈബ്യൂണല്‍ ഉത്തരവിനുള്ള സ്റ്റേ കോടതി ജൂണ്‍ 30 വരെ നീട്ടി. പിടിച്ചെടുക്കുന്ന വാഹനങ്ങള്‍ക്ക് 250 രൂപ പിഴ ഈടാക്കി വിട്ടു നല്‍കിയതു കൊച്ചി നഗരസഭാ സെക്രട്ടറിയും ജില്ലാ കളക്ടറും കോടതിയില്‍ വിശദീകരിച്ചിരുന്നു.

ഇതേ തുടര്‍ന്നാണ് പത്തുലക്ഷം രൂപവരെ വിലയുള്ള വാഹനങ്ങള്‍ തുച്ഛമായ തുക ഈടാക്കി വിട്ടു നല്‍കുന്നത് ഉചിതമല്ലെന്ന് ആക്ടിംഗ് ചീഫ് ജസ്റ്റിസ് എസ്.വി. ഭട്ടി, ജസ്റ്റിസ് ബസന്ത് ബാലാജി എന്നിവരുള്‍പ്പെട്ട ഡിവിഷന്‍ ബെഞ്ച് വ്യക്തമാക്കിയത്. പിടിച്ചെടുക്കുന്ന വാഹനങ്ങള്‍ക്കെതിരെ മലിനീകരണ നിയന്ത്രണ നിയമം പ്രകാരം നടപടിയെടുക്കാമെന്ന് വ്യക്തമാക്കി കോടതി .

അതായത് മുനിസിപ്പാലിറ്റി ആക്ടില്‍ തന്നെ 10,000 രൂപ വരെ പിഴയീടാക്കാനുള്ള വ്യവസ്ഥയുണ്ട്. വാഹനങ്ങള്‍ വിട്ടുകിട്ടണമെന്നുള്ളവര്‍ കോടതിയിലേക്ക് നേരിട്ട് വരട്ടെയെന്നും ഡിവിഷന്‍ ബഞ്ച് വാക്കാല്‍ പറഞ്ഞു.