ഇന്ന് കാലാവധി അവസാനിക്കുന്ന എംജി വിസി ഡോ. സാബു തോമസിന് പുനര്നിയമനം നല്കണമെന്ന സര്ക്കാര് ആവശ്യം അംഗീകരിക്കാതെ ഗവര്ണര് ആരിഫ് മുഹമ്മദ് ഖാന്....
ശനിയാഴ്ച കാലാവധി അവസാനിക്കുന്ന എംജി വിസി ഡോ. സാബു തോമസിന് പുനര്നിയമനം നല്കണമെന്ന സര്ക്കാര് ആവശ്യം അംഗീകരിക്കാതെ ഗവര്ണര് ആരിഫ് മുഹമ്മദ് ഖാന്. സര്വകലാശാലയില് വിസിക്ക് പുനര്നിയമനം നല്കിയതിനെതിരെയുള്ള ഹര്ജി സുപ്രീം കോടതിയുടെ പരിഗണനയിലാണ്. ഈ സാഹചര്യത്തില് മറ്റൊരു പുനര്നിയമനം നടത്തുന്നതില് ഗവര്ണര്ക്ക് വിയോജിപ്പുണ്ടെന്നാണ് റിപ്പോര്ട്ടുകള്.
നിയമനത്തിനായി മൂന്നംഗ പാനലിനെ നിയോഗിക്കണമെന്ന് ഗവര്ണര് സംസ്ഥാന സര്ക്കാരിനോടായി ആവശ്യപ്പെട്ടു. സര്വീസില് നിന്ന് വിരമിച്ച കണ്ണൂര് വീസിയുടെ കാലാവധി നീട്ടി നല്കിയ നടപടി കോടതിയുടെ പരിഗണനയിലുള്ളതാണ് ഗവര്ണറുടെ നിലപാടിന് പിന്നിലെന്നാണ് സൂചനകള്.
നിലവിലെ എം ജി വിസിയായ സാബു തോമസിന്റെ കാലാവധി ഇന്ന് പൂര്ത്തിയാകും. എം.ജി സര്വകലാശാല വൈസ് ചാന്സലര് ഡോ. സാബു തോമസിന് പുനര്നിയമനം നല്കണമെന്ന് ആവശ്യപ്പെട്ട് സര്ക്കാര് ഗവര്ണര്ക്ക് കത്ത് നല്കിയിട്ടുണ്ടായിരുന്നു. ഉന്നതവിദ്യാഭ്യാസ മന്ത്രി ഡോ. ആര്. ബിന്ദുവാണ് ഗവര്ണര് ആരിഫ് മുഹമ്മദ് ഖാന് കത്ത് നല്കിയത്.
വി.സിയുടെ കാലാവധി അവസാനിക്കുമ്പോള് ആര്ക്ക് ചുമതല നല്കണമെന്ന് ഗവര്ണര് സര്ക്കാരിനോട് ചോദിച്ചിരുന്നു. ഇതിന് മറുപടിയായാണ് സര്ക്കാര് സാബു തോമസിന്റെ പുനര്നിയമനം ആവശ്യപ്പെട്ടിട്ടുള്ളത്. എം.ജി സര്വകലാശാല ചട്ടപ്രകാരം വി.സിക്ക് പ്രായപരിധി 65 ആയതിനാല് പുനര്നിയമനത്തിന് സാധുത ഉണ്ടെന്ന് ചൂണ്ടിക്കാട്ടിയാണ് സര്ക്കാര് ഗവര്ണര്ക്ക് കത്ത് നല്കിയത്.
അതേസമയം പിരിച്ചുവിടലിന് ഗവര്ണര് നോട്ടീസ് നല്കിയ വി.സിമാരില് ഒരാളാണ് സാബു തോമസ്. പിന്നാലെ ഗവര്ണറുടെ കാരണം കാണിക്കല് നോട്ടീസിന് സാബു തോമസ് മറുപടി നല്കിയിട്ടുണ്ടായിരുന്നു. ചട്ടങ്ങള് പാലിച്ച് നടത്തിയ നിയമനം റദ്ദാക്കാന് ഗവര്ണര്ക്ക് അവകാശമില്ലെന്ന് ചൂണ്ടിക്കാട്ടി സാബു തോമസ് കോടതിയെയും സമീപിച്ചിട്ടുണ്ടായിരുന്നു.
"
https://www.facebook.com/Malayalivartha
