കാട്ടാക്കട ക്രിസ്ത്യന്‍ കോളജിലെ ആള്‍മാറാട്ട കേസിലെ പ്രതിയായ മുന്‍ പ്രിന്‍സിപ്പല്‍ ജി ജെ ഷൈജുവിന്റെ അറസ്റ്റ് ഹൈക്കോടതി തല്‍ക്കാലത്തേക്ക് തടഞ്ഞു. ഷൈജു സമര്‍പ്പിച്ച മുന്‍കൂര്‍ ജാമ്യാപേക്ഷയിലാണ് ഇടക്കാല ഉത്തരവ് പുറത്തിറക്കിയിരിക്കുന്നത്. ഹര്‍ജി 20 ന് വീണ്ടും പരിഗണിക്കും.

കാട്ടാക്കട ക്രിസ്ത്യന്‍ കോളജില്‍ നിന്നും പിഴയീടാക്കാന്‍ നോട്ടീസ് നല്‍കിയിട്ടുണ്ട്. 1,55,938 രൂപയാണ് കോളേജിനോട് അടയ്ക്കാന്‍ ആവശ്യപ്പെട്ടിരിക്കുന്നത്. കേരള സര്‍വകലാശാല സിന്‍ഡിക്കേറ്റിന്റേതാണ് തീരുമാനം.ആള്‍മാറാട്ടം കണ്ടെത്തിയതിലൂടെ സര്‍വ്വകലാശാല തെരെഞ്ഞെടുപ്പ് മാറ്റിവയ്‌ക്കേണ്ടി വന്ന സാഹചര്യത്തിലാണ് നടപടി. ഇതുവഴിയുണ്ടായ നഷ്ടം കൊളേജില്‍ നിന്നും ഈടാക്കുന്നതിന്റെ കൂടി ഭാഗമായാണ് പിഴയിട്ടത്.

പിഴ അടച്ചില്ലെങ്കില്‍ ഈടാക്കാന്‍ സര്‍വകലാശാലക്ക് വിവിധ മാര്‍ഗങ്ങളുണ്ടെന്ന് വൈസ് ചാന്‍സിലര്‍ ഡോ.മോഹന്‍ കുന്നുമല്‍ വാര്‍ത്താസമ്മേളനത്തില്‍ പറഞ്ഞു. തെരഞ്ഞെടുപ്പ് ചട്ടം ലംഘിച്ചതിന് 39 കൗണ്‍സിലര്‍മാരെ അയോഗ്യരാക്കിയിട്ടുണ്ട്. മറുപടി നല്‍കാത്ത 30 കോളേജുകളോട് ഈ മാസം 20ന് മുമ്പ് മറുപടി നല്‍കാന്‍ ആവശ്യപ്പെട്ടിട്ടുണ്ടെന്നും വൈസ് ചാന്‍സിലര്‍ പറഞ്ഞു. ഒരു വിദ്യാര്‍ത്ഥി നേതാവിന്റെ പേരില്‍ പ്രചരിക്കുന്ന സര്‍ട്ടിഫിക്കറ്റ് വ്യാജമാണെന്ന് കണ്ടെത്തിയിട്ടുണ്ട്. മാധ്യമങ്ങളില്‍ കണ്ട സര്‍ട്ടിഫിക്കററ് സര്‍വകലാശാലയില്‍ നിന്നും നല്‍കിയിട്ടില്ലെന്നും വൈസ് ചാന്‍സിലര്‍ പറഞ്ഞു.

കോളേജ് തെരഞ്ഞെടുപ്പില്‍ മത്സരിക്കാത്തെ എസ്എഫ്‌ഐ നേതാവിനെ പിന്‍വാതില്‍ വഴി കൗണ്‍സിലറാക്കിയ കാട്ടാക്കട ക്രിസ്ത്യന്‍ കോളേജിലെ തട്ടിപ്പ് വന്‍ വിവാദമായിരുന്നു. പ്രായപരിധി കഴിഞ്ഞ എസ്എഫ്‌ഐ നേതാവ് എ വിശാഖിനെ കൗണ്‍സിലറാക്കാനായിരുന്നു അസാധാരണ കള്ളക്കളി.

കേസില്‍ കോളേജ് പ്രിന്‍സിപ്പല്‍ ഷൈജുവിന്റെ മുന്‍കൂര്‍ ജാമ്യാപേക്ഷ കോടതി ഇന്നലെ തള്ളിയിരുന്നു. പ്രതി നടത്തിയ കുറ്റം അവഗണിക്കാന്‍ കഴിയില്ല എന്ന് പ്രോസിക്യൂഷന്‍ വാദം പരിഗണിച്ചാണ് ഉത്തരവ്. തിരുവനന്തപുരം ഏഴാം അഡീഷണല്‍ സെഷന്‍സ് കോടതി ജഡ്ജി പ്രസൂണ്‍ മോഹനന്റേതായിരുന്നു ഇടക്കാല ഉത്തരവ്. കേസില്‍ ഒന്നാം പ്രതിയാണ് മുന്‍ പ്രിന്‍സിപ്പല്‍ ജിജെ ഷൈജു.