അമേരിക്കയിലേക്കുള്ള പോക്ക് വെറുതെ ആയില്ല. ലോക ബാങ്ക് കേരളത്തിന് 1228 കോടി രൂപയുടെ വായ്പകൂടി അനുവദിച്ചു. പ്രകൃതി ദുരന്തങ്ങള്‍, കാലാവസ്ഥാ വ്യതിയാന പ്രത്യാഘാതങ്ങള്‍, പകര്‍ച്ചവ്യാധികള്‍ എന്നിവയ്‌ക്കെതിരായ തയ്യാറെടുപ്പുകള്‍ക്കുള്ള പദ്ധതികള്‍ക്കാണ് ലോക ബാങ്ക് കേരളത്തിന് അധിക വായ്പ അനുവദിച്ചത്. പക്ഷെ ഈ പറഞ്ഞ ഒന്നിനും വേണ്ടിയും ഈ തുക എടുക്കില്ല. പകരം ഇവരുടെ ധൂര്‍ത്തിന് തന്നെ പോകും. 2018 പ്രളയത്തിലെ ജനങ്ങള്‍ ഇപ്പോഴും കടത്തിണ്ണയില്‍ കിടക്കുന്നതേയുള്ളു. അവര്‍ക്ക് കൂര ഉണ്ടാക്കി കൊടുക്കാനെന്നും പറഞ്ഞ് കിട്ടാവുന്നിടത്ത് നിന്നെല്ലാം മേടിച്ച് കൂട്ടിയിരുന്നു. എന്നിട്ട് ആ തുകയൊക്കെ എവിടെ. എന്തായാലും പുതിയ വായ്പ കിട്ടിയിട്ടുണ്ട് മലയാളികള്‍ മുണ്ട് മുറുക്കി ഉടുത്ത് പണിക്കിറങ്ങിക്കോ കടം വീട്ടേണ്ടതല്ലെ.

ഈ അധിക ധനസഹായം തീരദേശ ശോഷണം, ജലവിഭവ പരിപാലനം തുടങ്ങിയ നിര്‍ണായക മേഖലകളില്‍ കേരളത്തിന് മുതല്‍ക്കൂട്ടാകുമെന്ന് വായ്പ അനുവദിച്ചുകൊണ്ട് ലോക ബാങ്ക് വ്യക്തമാക്കി. നേരത്തെ നല്‍കിയ 1023 കോടിയുടെ വായ്പയ്ക്ക് പുറമെയാണ് പുതിയ വായ്പ അനുവദിച്ചിരിക്കുന്നത്. ആറ് വര്‍ഷത്തെ ഗ്രേസ് പിരീഡ് ഉള്‍പ്പടെ 14 വര്‍ഷത്തെ കാലാവധിയോടെയാണ് ലോക ബാങ്ക് പുതിയ വായ്പ അനുവദിച്ചിരിക്കുന്നത്. തീരദേശ ശോഷണം പരിഹരിക്കുന്നതിനുള്ള പദ്ധതികളില്‍ ശ്രദ്ധ കേന്ദ്രീകരിച്ചാകും അധിക ധനസഹായത്തിന്റെ വിനിയോഗമെന്ന് ലോക ബാങ്കിന്റെ ഇന്ത്യയിലെ ഡയറക്ടര്‍ അഗസ്റ്റെ ടാനോ കൊവാമെ പറഞ്ഞു.

കേരളം പ്രകൃതിദുരന്തങ്ങള്‍ക്കും കാലാവവസ്ഥാ വ്യതിയാനത്തിന്റെ പ്രത്യാഘാതങ്ങള്‍ക്കും വിധേയമാകുകയാണ്. 2021ല്‍ നടന്ന പ്രളയത്തിലും മണ്ണിടിച്ചിലിലും നിരവധിപേര്‍ക്ക് ജീവന്‍ നഷ്ടമാകുകയും 100 ദശലക്ഷം ഡോളറിന്റെ നാശനഷ്ടമുണ്ടാകുകയും ചെയ്‌തെന്നും ലോകബാങ്ക് വിലയിരുത്തി. അമേരിക്കന്‍ സന്ദര്‍ശനത്തിനിടെ മുഖ്യമന്ത്രി പിണറായി വിജയന്‍ മൂന്ന് ദിവസം മുമ്പ് ലോകബാങ്ക് മാനേജിംഗ് ഡയറക്ടര്‍ അന്ന ബി യര്‍ദെയുമായി വാഷിങ്ടണില്‍ കൂടിക്കാഴ്ച്ച നടത്തിയിരുന്നു. ഇതിന് പിന്നാലെയാണ് കേരളത്തിന് ലോക ബാങ്ക് അധിക വായ്പ അനുവദിച്ചിരിക്കുന്നത്. കേരളത്തിന്റെ അടിസ്ഥാന സൗകര്യ മേഖലകളില്‍ നിക്ഷേപത്തിന് തയ്യാറാണെന്ന് ലോകബാങ്ക് അധികൃതര്‍ പറഞ്ഞതായി മുഖ്യമന്ത്രി പറഞ്ഞിരുന്നു. നിലവില്‍ ലോകബാങ്കിന്റെ സഹകരണമുള്ള റീ ബില്‍ഡ് കേരള ഇനിഷ്യേറ്റീവ് അടക്കമുള്ള പദ്ധതികളിലെ പുരോഗതിയും കൂടിക്കാഴ്ച്ചയില്‍ ചര്‍ച്ചയായെന്നും മുഖ്യമന്ത്രി വ്യക്തമാക്കുകയുണ്ടായി.

അതിന് റീ ബില്‍ഡ് കേരള കടലാസില്‍ കിടക്കുന്നതല്ലേയുള്ളു. ഭരണത്തില്‍ നിന്നിറങ്ങാന്‍ ഇനി മൂന്ന് കൊല്ലം കൂടിയേ ഉള്ളു ഇനിയെങ്കിലും വല്ലതും നടക്കുമോ ആവോ. ഏതായാലും അമേരിക്കയിലേക്കുള്ള പോക്കിന്റെ കൃത്യമായ വിവരം ഇന്നാണ് വ്യക്തമായത്. ലോക കേരള സഭ ഒന്നുമായിരുന്നില്ല ലക്ഷ്യം ലോക ബാങ്കുമായുള്ള ചര്‍ച്ച തന്നെയായിരുന്നു പ്രധാനം. പോയ വകയില്‍ അവരുടെ കാലുപിടിച്ച് വായ്പ തരപ്പെടുത്തി. കടവും കടത്തിന്മേല്‍ കടവും എന്നിട്ടും വീണ്ടും കടമെടുപ്പ്. ഇതൊക്കെ നമ്മുടെ തലയിലേക്ക് തന്നെയാണ്. അമേരിക്കയിലും ക്യൂബയിലും പോയി ധൂര്‍ത്ത് നടത്തിയതിന്റെ കാശും ഈ വായ്പയില്‍ വകയിരുത്തണം. കഴുത്തറ്റം കടത്തില്‍ നില്‍ക്കുന്നൊരു സംസ്ഥാനമാണ് കേരളം. സകലമാന മേഖലയും പരാജയമാണ്. എന്നിട്ടും ഇതൊന്നും പിണറായി സര്‍ക്കാരിനൊരു പ്രശ്‌നമേയല്ല വീണ്ടും കടം കിട്ടുന്നിടം തപ്പുന്നു.