കെഎം ഷാജിയ്ക്കെതിരെ സര്ക്കാര് സുപ്രീംകോടതിയിലേക്ക്;പ്ലസ് ടു കോഴക്കേസില് ഷാജിയ്ക്കെതിരെ അന്വേഷണത്തിന് അനുമതി വേണമെന്നാണ് ആവശ്യം,ഹൈക്കോടതി മടക്കിയ കേസാണ് വീണ്ടും കുത്തിപ്പൊക്കുന്നത്,പ്രതിപക്ഷ നിരയെ കേസില് കുടുക്കലാണ് ലക്ഷ്യം
പ്രതിപക്ഷത്തെ കെഎം ഷാജിയെ വിടാതെ പിന്നാലെ കൂടി പിണറായി സര്ക്കാര്. പ്ലസ് ടു കോഴക്കേസില് കെ എം ഷാജിക്കെതിരെ സംസ്ഥാന സര്ക്കാര് സുപ്രീംകോടതിയില്. അന്വേഷണത്തിന് അനുമതി വേണം ആവശ്യം. കേസില് വിജിലന്സ് കേസ് റദ്ദാക്കിയ ഹൈക്കോടതി ഉത്തരവിനെതിരെയാണ് സംസ്ഥാന സര്ക്കാര് സുപ്രീംകോടതിയ്ക്ക് വെച്ചുപിടിച്ചിരിക്കുന്നത്. ഷാജിക്കെതിരെ അന്വേഷണം നടത്താന് അനുവദിക്കണമെന്നാവശ്യപ്പെട്ട് സംസ്ഥാന സര്ക്കാര് സുപ്രീം കോടതിയില് ഹര്ജി സമര്പ്പിച്ചു. കഴിഞ്ഞ ജൂണ് 19 നാണ് അഴീക്കോട് പ്ലസ്റ്റു കോഴ കേസില് മുസ്ലീംലീഗ് നേതാവ് കെഎം ഷാജിയെ ഹൈക്കോടതി കുറ്റവിമുക്തനാക്കിയത്. വിജിലന്സ് കേസ് റദ്ദാക്കിയതിന് പിന്നാലെ കെ എം ഷാജിക്കെതിരായ ഇ.ഡി നടപടികളും സിംഗില് ബെഞ്ച് റദ്ദാക്കിയിരുന്നു. ഇതിനെതിരെയാണ് സംസ്ഥാന സര്ക്കാര് സുപ്രീം കോടതിയെ സമീപിച്ചത്.
കണ്ണൂര് ജില്ലയിലെ അഴീക്കോട് ഹൈസ്കൂളിന് പ്ലസ് ടു അനുവദിക്കാന് കെഎം ഷാജിക്ക് മാനേജ്മെന്റ് കൈക്കൂലി നല്കിയെന്നാരോപിച്ചാണ് സിപിഎം പ്രാദേശിക നേതാവ് 2017 ല് മുഖ്യമന്ത്രിക്ക് പരാതി നല്കിയത്. മുസ്ലീലീഗില് പ്രാദേശികമായി പണം പങ്കിട്ടതിനെ ചൊല്ലിയുള്ള തര്ക്കം എന്ന നിലയിലാണ് വിഷയം ആദ്യം ഉയര്ന്നത്. എന്നാല് ഇത് പിന്നീട് സിപിഎം ഏറ്റെടുത്തു. വിജിലന്സ് രജിസ്റ്റര് ചെയ്ത കേസ് കഴിഞ്ഞ ഏപ്രില് മാസത്തിലാണ് ഹൈക്കോടതി റദ്ദാക്കിയത്. വിജിലന്സ് കേസ് എടുത്തതിന് പിന്നാലെ കെ. എം ഷാജിയുടെ സ്വത്ത് കണ്ടുകെട്ടാന് ഇ.ഡിയും ഉത്തരവിട്ടിരുന്നു.
തുടര്ന്ന് ഷാജിയുടെയും ഭാര്യയുടെയും സ്വത്തു വകകള് ഇഡി കണ്ടുകെട്ടി. ഇതിനെതിരെ കഴിഞ്ഞ വര്ഷം നവംബറിലാണ് കെ എം ഷാജിയും ഭാര്യയും ഹൈക്കോടതിയെ സമീപിച്ചത്. കേസിലെ നടപടികളില് സ്റ്റേ ചെയ്തതിന് പിന്നാലെയാണ് ജസ്റ്റിസ് പി വി കുഞ്ഞികൃഷ്ണന് ഇ.ഡി കേസും റദ്ദാക്കിയത്. 2021 നിയമസഭാ തെരഞ്ഞെടുപ്പില് എല്ഡിഎഫ് പ്ലസ്റ്റു കോഴ കേസ് ആയുധമാക്കിയിരുന്നു. എന്നാല് 2011 മുതല് 2020 വരെ എംഎല്എ ആയിരുന്ന കാലയളവില് കെ എം ഷാജി അനധികൃതമായ സ്വത്ത് സമ്പാദിച്ചെന്ന അഡ്വ.ഹരീഷ് എം ആര് നല്കിയ പരാതിയിലെ നടപടികള് വിജിലന്സ് തുടരുകയാണ്.
ഷാജിയ്ക്കെതിരെ സുപ്രീംകോടതിയിലേക്ക് പോയ ഭരണപക്ഷത്തിനും ഒരു പണി കിട്ടി. പിവി അന്വര് എംഎല്എയ്ക്കെതിരായ ഭൂമിക്കേസില് സര്ക്കാരിനെ വിമര്ശിച്ച് ഹൈക്കോടതി. ഭൂപരിഷ്കരണം നിയമം ലംഘിച്ചെന്ന പി വി അന്വര് എം എല് എയ്ക്കും കുടുംബത്തിനുമെതിരായ ആരോപണവുമായി ബന്ധപ്പെട്ട സിംഗിള് ബെഞ്ചിന്റെ മുന് ഉത്തരവ് നടപ്പാക്കാത്തതില് ഹൈക്കോടതി സര്ക്കാരിനോട് വിശദീകരണം തേടി. അന്വറും കുടുംബവും അനധികൃതമായി കൈവശം വെച്ച മിച്ചഭൂമി തിരിച്ചുപിടിക്കണമെന്ന സിംഗിള് ബെഞ്ചിന്റെ മുന് ഉത്തരവ് നടപ്പാക്കാതെ സര്ക്കാര് ഇരട്ടത്താപ്പ കാണിച്ചു. ഇപ്പോള് സര്ക്കാരിന്റെ ചെവിക്ക് പിടിച്ചു ഹൈക്കോടതി. കണ്ണൂര് സോണല് താലൂക്ക് ലാന്റ് ബോര്ഡ് ചെയര്മാന് എം എച്ച് ഹരീഷ്, താമരശേരി താലൂക്ക് ലാന്ഡ് ബോര്ഡ് സ്പെഷല് തഹസില്ദാര് പി ജുബീഷ് എന്നിവര് മറുപടി നല്കണം. കേസ് ഒരാഴ്ചക്ക് ശേഷം വീണ്ടും പരിഗണിക്കും. മാധ്യമങ്ങലെ മുഴുവന് ചട്ടം പഠിപ്പിക്കാന് ഇറങ്ങിത്തിരിച്ചിരിക്കുന്ന നിയമം അതേപോലെ പാലിക്കുന്ന അന്വര് എംഎല്എ ഇപ്പോള് മൗനത്തിലാണ്. സര്ക്കാരും മൗനത്തിലാണ്. ഇനി ഈ കേസും മാധ്യമ സൃഷ്ടിയാണ്, മാധ്യമ അജണ്ടയാണെന്ന് അന്വര് എംഎല്എ പറയുമോ എന്തോ.
https://www.facebook.com/Malayalivartha
