ബിജെപി സംസ്ഥാന പ്രസിഡന്റ് കുമ്മനം രാജശേഖരന്റെ പ്രസ്താവനയ്‌ക്കെതിരെ മുഖ്യമന്ത്രി ഉമ്മന്‍ ചാണ്ടി. കുമ്മനത്തിന്റെ പ്രസ്താവനകള്‍ ജനങ്ങളെ വിഭജിക്കുന്നതാണ്. കേരളത്തിന്റെ ചരിത്രവും പാരമ്പര്യവും മറക്കുന്നതാണ് അദ്ദേഹത്തിന്റെ പ്രസ്താവനകള്‍. വിദ്വേഷം വിതയ്ക്കുന്നവരെ നാട് പുറംതള്ളും. ബിജെപി കേരളത്തിന്റെ പാരമ്പര്യം മറക്കരുതെന്നും മുഖ്യമന്ത്രി ഓര്‍മ്മിപ്പിച്ചു. നിലയ്ക്കല്‍ വിഷയം പോലും കേരളം സമചിത്തതയോടെ കൈകാര്യം ചെയ്തു.

സഹിഷ്ണുതയും സഹകരണവുമാണ് നമ്മുടെ പൂര്‍വികര്‍ കൈമാറിയ സമ്പത്തെന്നും മുഖ്യമന്ത്രി പറഞ്ഞു. ക്ഷേത്രപരിസരങ്ങളിലെ കച്ചവടത്തെക്കുറിച്ചുള്ള കുമ്മനത്തിന്റെ പ്രസ്താവനയിലാണ് മുഖ്യമന്ത്രിയുെട പ്രതികരണം. ക്ഷേത്ര പരിസരത്ത് അന്യമതസ്ഥരുടെ കച്ചവടം ഒഴിപ്പിക്കാന്‍ വേണ്ട നടപടി ക്ഷേത്ര കമ്മിറ്റികള്‍ക്ക് തീരുമാനിക്കാമെന്ന് കഴിഞ്ഞ ദിവസം കുമ്മനം രാജശേഖരന്‍ പ്രസ്താവിച്ചിരുന്നു. ഇതിനെതിരെയാണ് ഇപ്പോള്‍ മുഖ്യമന്ത്രിയും രംഗത്തെത്തിയത്.

നേരത്തെ കുമ്മനത്തെ വിമര്‍ശിച്ച് സിപിഎം പൊളിറ്റ് ബ്യൂറോ അംഗം പിണറായി വിജയന്‍ രംഗത്തെത്തിയിരുന്നു. ക്ഷേത്രങ്ങളില്‍ മാത്രമാണു രാഷ്ട്രീയക്കാരുടെ ഭരണം. മുസ്‌ലിം, ക്രിസ്ത്യന്‍ പള്ളികളുടെ ഭരണത്തില്‍ രാഷ്ട്രീയക്കാര്‍ ഇടപെടുന്നില്ലെന്നും കഴിഞ്ഞ ദിവസം കുമ്മനം പറഞ്ഞിരുന്നു. ക്ഷേത്ര ഭരണം ഭക്തര്‍ക്കു വിട്ടുനല്‍കണം. ക്ഷേത്രങ്ങളുടെ അന്യാധീനപ്പെട്ട ഭൂമി വീണ്ടെടുത്തു തിരിച്ചുനല്‍കാനുള്ള ബാധ്യത സര്‍ക്കാരിനുണ്ട്. സര്‍ക്കാരിന്റെ കൈവശവും ക്ഷേത്രസ്വത്തുക്കള്‍ ഉണ്ട്. വഖഫ് ബോര്‍ഡിന്റെ ഭൂമി അന്യാധീനപ്പെട്ടിട്ടുണ്ടെങ്കില്‍ അതും തിരിച്ചു പിടിക്കണമെന്നും കുമ്മനം ആവശ്യപ്പെട്ടിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha