കുംഭമേളയിലൂടെ സോഷ്യൽ മീഡിയയിൽ വൈറലായ 'രുദ്രാക്ഷ് ഗേൾ' മൊണാലിസ ഭോസ്‌ലെയും ഫർമാൻ ഖാനും തമ്മിലുള്ള വിവാഹം വലിയ വിവാദത്തിലേക്ക്. വിവാഹസമയത്ത് മൊണാലിസയ്ക്ക് പ്രായപൂർത്തിയായിരുന്നില്ലെന്നും വ്യാജ രേഖകൾ ചമച്ചാണ് വിവാഹം നടത്തിയതെന്നും കാട്ടി പിതാവ് നൽകിയ പരാതിയിൽ മധ്യപ്രദേശ് എസ്‌സി-എസ്‌ടി കമ്മീഷൻ തിരുവനന്തപുരത്തെത്തി തെളിവെടുത്തു.

ഹാജരാക്കിയ ആധാർ കാർഡ് പ്രകാരം 18 വയസ്സ് തികഞ്ഞതായി കാണിക്കുന്നുണ്ടെങ്കിലും, പിതാവ് സമർപ്പിച്ച ജനന സർട്ടിഫിക്കറ്റ് പ്രകാരം പെൺകുട്ടിക്ക് 16 വയസ്സ് മാത്രമേ പ്രായമുള്ളൂ എന്നതാണ് പ്രധാന തർക്കം. വിവാഹം നടന്ന അരുമാനൂർ നൈനാർ ക്ഷേത്രത്തിലെ രേഖകളും പോലീസ് നൽകിയ വിശദീകരണവും കമ്മീഷൻ പരിശോധിച്ചു. രേഖകളിൽ തിരിമറി നടന്നതായി തെളിഞ്ഞാൽ ഫർമാൻ ഖാനെതിരെ പോക്സോ (POCSO) നിയമപ്രകാരം നടപടിയുണ്ടാകും. എന്നാൽ താൻ സ്വന്തം ഇഷ്ടപ്രകാരമാണ് വിവാഹം കഴിച്ചതെന്ന നിലപാടിൽ ഉറച്ചുനിൽക്കുകയാണ് മൊണാലിസ.