ക്യൂ നില്ക്കാന് ആവശ്യപ്പെട്ടതിന് ഫോര്ട്ട് ഗവ: താലൂക്ക് ആശുപത്രിയിലെ വനിതാ ഡോക്ടറുടെ കൈ തിരിച്ചു പിടിക്കുകയും ജീവനക്കാരെയടക്കം ആക്രമിക്കുകയും ചെയ്ത കേസില് രണ്ടു പ്രതികള്ക്ക് കോടതിയുടെ ജാമ്യമില്ലാ അറസ്റ്റ് വാറണ്ട്
ക്യൂ നില്ക്കാന് ആവശ്യപ്പെട്ടതിന് ഫോര്ട്ട് ഗവ: താലൂക്ക് ആശുപത്രിയിലെ വനിതാ ഡോക്ടറുടെ കൈ തിരിച്ചു പിടിക്കുകയും ജീവനക്കാരെയടക്കം ആക്രമിക്കുകയും ചെയ്ത കേസില് രണ്ടു പ്രതികള്ക്ക് കോടതിയുടെ ജാമ്യമില്ലാ അറസ്റ്റ് വാറണ്ട്. അടിപിടിയുണ്ടാക്കി ചികിത്സക്കെത്തിയ കരിമഠം കോളനി നിവാസി റഷീദ് , ഇയാളുടെ കൂട്ടാളി റഫീഖിനെയും അറസ്റ്റ് ചെയ്ത് കോടതിയില് ഹാജരാക്കാനാണുത്തരവ്.
തിരുവനന്തപുരം രണ്ടാം ജുഡീഷ്യല് ഫസ്റ്റ് ക്ലാസ്സ് മജിസ്ട്രേട്ട് കോടതിയുടേതാണുത്തരവ്. പ്രതികളെ അറസ്റ്റ് ചെയ്യാന് ഫോര്ട്ട് പോലീസ് സര്ക്കിള് ഇന്സ്പെക്ടറോട് മജിസ്ട്രേട്ട് പി. അരുണ്കുമാര് ഉത്തരവിട്ടു. 2021 ആഗസ്റ്റ് 6 രാത്രിയാണ് കേസിനാസ്പദമായ സംഭവം നടന്നത്.
അത്യാഹിത വിഭാഗത്തില് ഡ്യൂട്ടിയിലുണ്ടായിരുന്ന ഡോ. മാളുവിനെയാണ് ആക്രമിച്ചത്. അടിപിടി കേസില് ചികിത്സക്കെത്തിയവരാണ് അക്രമം നടത്തിയത്. വരി നില്ക്കാന് തയ്യാറാകാതിരുന്ന ഇവര് ചികിത്സ വൈകിയെന്ന് ആരോപിച്ചായിരുന്നു ഡോക്ടറെ കൈയ്യേറ്റം ചെയ്തത്. ഡോക്ടറുടെ കൈ പിടിച്ചു തിരിക്കുകയായിരുന്നു.
ഡോക്ടറെ രക്ഷപെടുത്താന് ശ്രമിച്ച സുരക്ഷാ ജീവനക്കാരനെയും സംഘം ആക്രമിച്ചു. ആശുപത്രി അധികൃതര് അറിയിച്ചതിനെ തുടര്ന്ന് പൊലീസ് സ്ഥലത്തെത്തുകയും ഒന്നാം പ്രതി റഷീദിനെ അറസ്റ്റ് ചെയ്തു. രണ്ടാം പ്രതി റഫീക്ക് ഓടി രക്ഷപ്പെട്ടു. തുടര്ന്ന് നടത്തിയ അന്വേഷണത്തില് റഫീക്കിനെയും പൊലീസ് കസ്റ്റഡിയിലെടുക്കുകയായിരുന്നു.
കൈക്ക് പരിക്കേറ്റ ഡോക്ടര് ആശുപത്രിയില് ചികിത്സ തേടി.സംഭവത്തില് പ്രതിഷേധിച്ച്കെ. ജി. എം. ഒ. എയുടെ ആഭിമുഖ്യത്തില് ഫോര്ട്ട് ആശുപത്രിയിലെ ഡോക്ടര്മാര് ഒ.പി. ബഹിഷ്കരിക്കുമെന്ന് പ്രഖ്യാപിച്ചു. മന്ത്രി വി. ശിവന്കുട്ടി ആശുപത്രിയിലെത്തി ചികിത്സയില് കഴിയുന്ന ഡോക്ടറുമായും കെ. ജി. എം. ഒ. എ നേതാക്കളുമായും ചര്ച്ച നടത്തി. രണ്ടാമത്തെ പ്രതിയെയും അറസ്റ്റ് ചെയ്തതിനെ തുടര്ന്ന് ഡോക്ടര്മാര് പ്രതിഷേധം അവസാനിപ്പിക്കുകയായിരുന്നു.
ഡോക്ടര്മാര്ക്കെതിരെ തുടര്ച്ചയായി ആക്രമണം ഉണ്ടാകുന്ന സംഭവങ്ങളില് പ്രതിഷേധവുമായി ഐഎംഎ രംഗത്തെത്തി. ആശുപത്രിയിലെ അതിക്രമങ്ങള് തുടരുകയാണെന്നും, അത്യാഹിത വിഭാഗങ്ങളില് ഡോക്ടര്മാര് അക്രമിക്കപ്പെടുന്നുവെന്നും ഇങ്ങനെ പോയാല് ആരെങ്കിലും കൊല്ലപ്പെട്ടേക്കാമെന്നും ഡോ. സുല്ഫി നൂഹു ഫേസ്ബുക്ക് പോസ്റ്റില് പറഞ്ഞു. ഇതിനെതിരെ നിയമനിര്മ്മാണ ശക്തമാക്കണമെന്നും പൊതുജനങ്ങള് അതിശക്തമായി പ്രതികരിക്കണമെന്നും അദ്ദേഹം ആവശ്യപ്പെട്ടു. അത്യാഹിത വിഭാഗത്തില് ഡോക്ടറെ ആക്രമിക്കുന്ന വീഡിയോ അദ്ദേഹം പങ്കിടുകയും ചെയ്തു.
https://www.facebook.com/Malayalivartha
