മാസപ്പടിക്ക് ഗവർണറുടെ ക്ലിപ്പ്:കഴമ്പുണ്ടെന്ന് നിയമോപദേശം തുറുപ്പുഗുലാനുമായി ഗവർണർ
വീണാ വിജയൻ്റെ ഭാവി ഇനി ഗവർണറുടെ തുലാസിൽ. കളമശേരി സ്വദേശിയായ പൊതുപ്രവർത്തകൻ
നൽകിയ പരാതിയാണ് ഗവർണർ നിയമ വിദഗ്ദ്ധർക്ക് നൽകിയിരിക്കുന്നത്. പ്രഥമദൃഷ്ട്യാ പരാതിയിൽ കഴമ്പുണ്ടെന്ന് മനസിലാക്കിയതിനെ തുടർന്നാണ് നടപടിയെന്ന് മനസിലാക്കുന്നു.
കരിമണല് കമ്പനിയില് നിന്ന് മാസപ്പടി കൈപ്പറ്റിയ സംഭവത്തില് മുഖ്യമന്ത്രിയുടെ മകള് വീണ വിജയനെതിരേ അന്വേഷണമാവശ്യപ്പെട്ട് വിജിലന്സിന് പരാതി നൽകിയതാണ് പുതിയ വിവാദങ്ങൾക്ക് തുടക്കമിട്ടത്. കളമശ്ശേരി സ്വദേശി ഗിരീഷ് ബാബുവാണ് പരാതിക്കാരന്. സി.എം.ആര്.എല് കമ്പനിയില് നിന്ന് പണം വാങ്ങിയ രാഷ്ട്രീയ നേതാക്കള്ക്കും വീണയ്ക്കുമെതിരെ അന്വേഷണം വേണമെന്നാണാവശ്യപ്പെട്ടാണ് വിജിലന്സ് ഡയറക്ടര്ക്ക് പരാതി നല്കിയത്. പരാതിയുടെ പകര്പ്പ് ഗവര്ണറടക്കമുളളവര്ക്കും നല്കിയിട്ടുണ്ട്. വീണക്കെതിരെ ഏതായാലും വിജിലൻസ് അന്വേഷിക്കില്ല.
വീണ പണം വാങ്ങിയതിലല്ല ആർക്കു വേണ്ടി പണം വാങ്ങി എന്നതാണ് പ്രധാനം. ഒരു പ്രമുഖ വ്യക്തിക്ക് വേണ്ടിയാണ് വീണക്ക് മാസപ്പടി നൽകിയതെന്ന് ആദായ നികുതി ഫോറം കണ്ടെത്തിയതും വിനയായി.
സി.എം.ആര്.എല്ലും ആദായനികുതിവകുപ്പുമായി ബന്ധപ്പെട്ട നികുതിതര്ക്കത്തില് ആദായനികുതി വകുപ്പിന്റെ സെറ്റില്മെന്റ് ബോര്ഡിറക്കിയ ഉത്തരവ് സഹിതമാണ് പരാതി നല്കിയിരിക്കുന്നത്. ആ ഉത്തരവില് പേര് പരാമര്ശിക്കുന്ന രാഷ്ട്രീയനേതാക്കള്, വീണ വിജയന് എന്നിവര്ക്കെതിരെ അഴിമതി നിരോധന നിയമപ്രകാരമുള്ള അന്വേഷണം ആവശ്യപ്പെട്ടുകൊണ്ടാണ് പരാതി നല്കിയത്. സി.എം.ആര്.എല്ലില് നിന്ന് ആദായനീതി വകുപ്പ് പിടിച്ചെടുത്ത ഡയറിയിലുള്ള രാഷ്ട്രീയ നേതാക്കള്ക്കെതിരെയും അന്വേഷണമാവശ്യപ്പെട്ടിട്ടുണ്ട്. വിജിലന്സ് ഡയറക്ടര് തുടര്നടപടിയെടുത്തില്ലായെങ്കില് കോടതിയെ സമീപിക്കുമെന്നും ഗിരീഷ് ബാബു പറഞ്ഞു. ഹൈക്കോടതിയെ സമീപിക്കാനാണ് ഗിരീഷ് ബാബുവിൻ്റെ തീരുമാനം.ഹൈക്കോടതിയിലെത്തുന്നതിന് മുമ്പ് ഗവർണർക്ക് പരാതി പരിശോധിക്കാം. ഗവർണർക്കാകട്ടെ ഏറെ നാളുകൾക്ക് ശേഷമാണ് ഇങ്ങനെയൊരു ചാകര വന്നു ചേർന്നിരിക്കുന്നത്. അതും സർക്കാരിനെ തീർത്തും വെട്ടിലാക്കാൻ കഴിയുന്ന ചാകര.
സർക്കാരും ഗവർണറും തമ്മിലുള്ള സംഘർഷത്തിന് ഒരു അയവും വന്നിട്ടില്ല. ഇടക്കാലത്ത് ഒരു ഒത്തുതീർപ്പിനുള്ള സാധ്യത തെളിഞ്ഞെങ്കിലും ബന്ധം വീണ്ടും മുറിയുകയായിരുന്നു. സർക്കാരുമായി ഗവർണറുടെ ബന്ധം നിലനിൽക്കാൻ കേന്ദ്ര സർക്കാർ ആഗ്രഹിക്കുന്നുമില്ല. പുതുപ്പള്ളി ഉപതെരഞ്ഞടുപ്പിന് കളം ഒരുങ്ങിയ സാഹചര്യത്തിൽ കാര്യങ്ങൾ കൂടുതൽ പ്രതിസന്ധിയിലാകാനാണ് കേന്ദ്ര സർക്കാർ ശ്രമിക്കുന്നത്. അതേ സമയം ഇതിൻ്റെ നേട്ടം കോൺഗ്രസിലെത്താനും കേന്ദ്രത്തിന് താൽപ്പര്യമില്ല. അതു കൊണ്ടു തന്നെ പുതുപ്പള്ളി ഉപരെഞ്ഞടുപ്പിന് ശേഷം മാത്രമായിരിക്കും എന്തെങ്കിലും സംഭവിക്കുക. ഇടതു മുന്നണി സ്ഥാനാർത്ഥിയുടെ വിജയവും ബി ജെ പി ആഗ്രഹിക്കുന്നില്ല. ഇതു മുന്നണികളുടെയും തകർച്ചയാണ് ബി ജെ പി ആഗ്രഹിക്കുന്നത്.
ബില്ലുകൾ ഒപ്പിടാതെ ഗവർണർ ഇപ്പോഴും പ്രതിഷേധത്തിലാണ്.
വിവാദബില്ലുകളിൽ ഒപ്പിടില്ലെന്ന് ഗവര്ണര് ഉറപ്പിക്കുമ്പോൾ സര്ക്കാരിന് മുന്നിലുള്ളത് സമാനതകളില്ലാത്ത ഭരണഘടനാ പ്രതിസന്ധിയാണ്. സര്ക്കാര് ഗവര്ണര് പോര് മുമ്പെങ്ങുമില്ലാത്ത വിധം വഷളായ സന്ദര്ഭത്തിൽ എന്തും പ്രതീക്ഷിക്കാമെന്നിരിക്കെ ബില്ലുകൾ സാധുവാക്കാൻ നിയമപരമായും രാഷട്രീയമായും പോംവഴി തേടാനായിരുന്നു സിപിഎമ്മിന്റെയും സര്ക്കാരിന്റെയും തീരുമാനം. എന്നാൽ അത്തരം ശ്രമങ്ങളെല്ലാം പരാജയപ്പെട്ടതോടെയാണ് ഗവർണറെ കൈയിലെടുക്കാൻ പിണറായി തീരുമാനിച്ചത്. അതിപ്പോൾ ഇല്ലാതായിരുന്നു. കാരണം തികച്ചും രാഷ്ട്രീയം തന്നെയാണ്. ഏറ്റവും ഒടുവിൽ മനുഷ്യാവകാശ കമ്മിഷൻ ചെയർമാൻ്റെ നിയമനവും ഗവർണർ മാറ്റിവച്ചു.
ബില്ലുകൾ ഒപ്പിട്ടില്ലെങ്കിൽ കോടതിയെ സമീപിക്കാൻ സി പി എം തീരുമാനിച്ചിരുന്നു.. അങ്ങനെ ചെയ്തിരുന്നെങ്കിൽ വിജയിക്കുമായിരുന്നില്ല.. കാരണം ഗവർണറുടെ അധികാരത്തിൽ ഇടപെടാൻ കോടതിക്ക് കഴിയില്ല. സർക്കാർ സുപ്രീം കോടതിയെ സമീപിച്ചാലും ഇതു തന്നെയായിരിക്കും അവസ്ഥ. ജുഡീഷ്യറും ലെജിസ്ലേച്ചറും തമ്മിലുള്ള യുദ്ധങ്ങളിൽ ഇവർ പരസ്പരം പങ്കുചേരാറില്ല.
ലോകായുക്ത നിയമ ഭേദഗതിയും ഗവര്ണറുടെ അധികാരം വെട്ടിച്ചുരുക്കുന്ന സര്വകലാശാല നിയമ ഭേദഗതിയും ഭരണഘടനാ വിരുദ്ധമാണെന്നും അതിൽ ഒപ്പിടുന്ന പ്രശ്നമില്ലെന്ന് കൂടുതൽ വ്യക്തമായി തന്നെ ഗവര്ണര് ആരിഫ് മുഹമ്മദ് ഖാൻ പറത്തിട്ടുണ്ട്. ലോകായുക്ത ബില്ലിൽ ഒപ്പിടുക എന്നാൽ അഴിമതിക്ക് ഗവർണർ കൂട്ടു നിൽക്കുക എന്നതായിരിക്കും. അതിന് ഏതായാലും ആരിഫ് മുഹമ്മദ് ഖാൻ തയ്യാറാവില്ല.
ബില്ലിൽ പ്രതിപക്ഷത്തിന്റെ രാഷ്ട്രീയ നിലപാടും ബിജെപിയുടെ പിന്തുണയും ഗവര്ണര്ക്കൊപ്പമുണ്ട്. നിയമസഭ ബില്ല് പാസാക്കിയാൽ അതിൽ ഗവര്ണര് ഒപ്പിടുന്നതാണ് കീഴ് വഴക്കം. എന്തെങ്കിലും വിയോജിപ്പുണ്ടെങ്കിൽ വിശദീകരണം ചോദിക്കാറുമുണ്ട്. എന്നാൽ ഇതുവരെയുള്ള പതിവു വച്ച് ഇത്തവണ കാര്യങ്ങൾ മുന്നോട്ട് പോകില്ലെന്ന് ഏറെക്കുറെ ഉറപ്പായി. നിയമസഭ പാസാക്കിയ ബില്ലുകൾ നിയമ വകപ്പിന്റെ പരിശോധനക്ക് ശേഷം മുഖ്യമന്ത്രിയുടെ ഓഫീസ് വഴി രാജ്ഭവനിലെത്തിയിട്ടുണ്ട്. നിയമപരമായും ഭരണഘടനാപരമായും സാധുവാണോ എന്ന് ഗവര്ണര്ക്ക് വിലയിരുത്തി കഴിഞ്ഞു.. കൂടുതൽ വിശദീകരണം തേടാനും തൃപ്തികരമല്ലെങ്കിൽ സര്ക്കാരിലേക്ക് തിരിച്ചയക്കാനും ഗവര്ണര്ക്ക് കഴിയും. എന്നാൽ ഇത് രണ്ടും അദ്ദേഹം ചെയ്തില്ല. അതുമല്ലെങ്കിൽ രാഷ്ട്രപതിയുടെ അംഗീകാരം തേടി കേന്ദ്രത്തിന് മുന്നിലെത്തിക്കാം. ഇതാണ് സാധാരണ രീതി.
ഒപ്പിടാൻ സമയപരിധി ഇല്ലെന്നിരിക്കെ ഇതൊന്നും ചെയ്യാതെ ഗവര്ണര് അനിശ്ചിതമായി തീരുമാനം നീട്ടാനുള്ള സാധ്യതയാണ് സര്ക്കാര് മുന്നിൽ കാണുന്നത്. നിയമസഭ പാസാക്കിയ ബില്ലിൽ ഗവര്ണര് ഒപ്പിടുന്നില്ലെന്ന് കാണിച്ച് സര്ക്കാരിന് രാഷ്ട്രപതിയെ സമീപിക്കാം. അതുമല്ലെങ്കിൽ ബന്ധപ്പെട്ട കക്ഷികൾ വഴി സപ്രീംകോടതിയെ സമീപിക്കാനുമാകും. എന്നാൽ കാലം ഇത്രയും കഴിഞ്ഞിട്ടും ഗവർണറും സർക്കാരും അനങ്ങിയിട്ടേയില്ല. ഇതിനിടയിൽ ഗവർണറെ അനുനയിപ്പിക്കാൻ മുഖ്യമന്ത്രി പ്രധാനമന്ത്രിയെ വരെ കണ്ടു. .
പിണറായി പ്രധാനമന്ത്രിയെ കാണുന്നതിന് മുമ്പ് തന്നെ ഗവർണർ സംസ്ഥാനത്ത് നടക്കുന്ന നിയമ അട്ടിമറികൾ പ്രധാനമന്ത്രിയെ അറിയിച്ചിരുന്നു..മുഖ്യമന്ത്രിയെ കാണുന്നതിന് മുമ്പ് പ്രധാനമന്ത്രി ഇക്കാര്യങ്ങളെല്ലാം മനസിലാക്കിയിരുന്നു. ഒരു കാരണവശാലും ചാൻസലർ ബില്ലിൽ ഒപ്പിടേണ്ടെന്നാണ് ഗവർണർക്ക് പ്രധാനമന്ത്രി നൽകിയ നിർദ്ദേശം. ലോകായുക്ത നിയമത്തിൽ വെള്ളം ചേർക്കരുതെന്നും പ്രധാനമന്ത്രി ആവശ്യപ്പെട്ടു. ഇക്കാര്യങ്ങൾ പ്രധാനമന്ത്രി മുഖ്യമന്ത്രിയെ അറിയിച്ചു. തുടർന്നാണ് മുഖ്യമന്ത്രി ആ തീരുമാനത്തിലെത്തിയത്.
പ്രധാനമന്ത്രിയുമായി ദീർഘനേരം സംസാരിച്ച പിണറായി തന്നെയാണ് ഗവർണറുടെ ഉപദ്രവം പ്രധാനമന്ത്രിയെ അറിയിച്ചത്. ഗവർണർ ആരിഫ് മുഹമ്മദ് ഖാൻ ഭരിക്കാൻ അനുവദിക്കുന്നില്ലായിരുന്നു പരാതി. പിണറായിയുടെ വാദം പൂർണമായി കേട്ട ശേഷമാണ് പ്രധാനമന്ത്രി മുഖ്യമന്ത്രിയോട് ശാസനാ രൂപത്തിൽ സംസാരിച്ചതെന്നാണ് ലഭിക്കുന്ന സൂചനകൾ. ഇത്തരത്തിൽ തനിക്കെതിരെ പരാതിയുമായി പ്രധാനമന്ത്രിയെ കണ്ട പിണറായിയെ ഒന്നു വിരട്ടാൻ കാത്തി
രിക്കുകയായിരുന്നു. അപ്പോഴാണ് വീണ വളഞ്ഞു കൂട്ടി എത്തിയത്.
മുഖ്യമന്ത്രി പിണറായി വിജയന്റെ മകള് വീണ വിജയന് സിഎംആര്എല് കമ്പനി മാസപ്പടി നല്കിയെന്ന വിവാദത്തില് പ്രതികരണവുമായി ഗവര്ണര് ആരിഫ് മുഹമ്മദ് ഖാന് രംഗത്ത് എത്തിയത് കഴിഞ്ഞ ദിവസമാണ് . ആദായനികുതി വകുപ്പിന്റെ കണ്ടെത്തലുകൾ ഗുരുതരമാണെന്ന് മാധ്യമങ്ങളിലൂടെ മനസ്സിലാക്കുന്നു. മാധ്യമങ്ങളിൽ വന്നത് ആരോപണങ്ങൾ മാത്രമല്ല, ഇൻകം ടാക്സിന്റെ കണ്ടെത്തലുകളാണ്. ഇത് ഗൗരവത്തോടെ തന്നെ കാണും. മുഖ്യമന്ത്രിയില് നിന്ന് വിശദീകരണം തേടുമോ എന്ന് പിന്നീട് തീരുമാനിക്കും.
കരിമണൽ കമ്പനിയിൽ നിന്ന് കൈപ്പറ്റിയ മാസപ്പടി വിവാദത്തിൽ വീണ വിജയനെ പൂർണ്ണമായും ന്യായീകരിച്ച് സിപിഎം സംസ്ഥാന സെക്രട്ടറി എംവി ഗോവിന്ദൻ ഇന്നലെ രംഗത്ത് വന്നിരുന്നു. പുതുപ്പള്ളി ഉപതെരഞ്ഞെടുപ്പ് പ്രചാരണത്തിലടക്കം ഒളിഞ്ഞും തെളിഞ്ഞും പ്രതിപക്ഷവും ബിജെപിയും മാസപ്പടി ചർച്ചയാക്കുന്നതിനിടെയാണ് നടന്നതെല്ലാം നിയമപരമെന്ന സിപിഎം ന്യായീകരണം. ഒരു സേവനവും നൽകാതെ വീണയുടെ കൺസൾട്ടൻസിക്ക് കരിമണൽ കമ്പനി പണം നൽകിയത് പ്രമുഖ വ്യക്തിയുമായുള്ള ബന്ധം കാരണമാണെന്നാണ് ആദായ നികുതി ഇന്റരിം സെറ്റിൽമെന്റ് ബോർഡ് കണ്ടെത്തൽ. മുഖ്യമന്ത്രിയടക്കം മുൻനിര നേതാക്കൾ കരിമണൽ കമ്പനിയിൽ നിന്ന് 96 കോടി മാസപ്പടി കൈപ്പറ്റിയിട്ടുണ്ടെന്ന് ബിജെപി ആരോപണം കടുപ്പിച്ചിട്ടുണ്ട്.
വീണ ഉൾപ്പെട്ട മാസപ്പടി വിവാദത്തെ അവഗണിച്ച് നേരിടാനൊരുങ്ങിയിരിക്കുകയാണ് സിപിഎം. വിവാദത്തില് മുഖ്യമന്ത്രി പ്രതികരിക്കേണ്ട എന്നാണ് പാർട്ടിയിലെ ധാരണ. സിപിഎം സംസ്ഥാന സെക്രട്ടറി എം വി ഗോവിന്ദൻ മാധ്യമ പ്രവര്ത്തകരുടെ ചോദ്യത്തിൽ നിന്ന് ഒഴിഞ്ഞ് മാറിയതും ഈ തീരുമാനത്തെ തുടർന്നാണ്. സംസ്ഥാന സമിതിയിലും മുഖ്യമന്ത്രി വിവാദത്തെ കുറിച്ച് വിശദീകരിച്ചിട്ടില്ല.
കൈപ്പറ്റിയ കാശിന്റെ വിശദാംശങ്ങൾ രേഖകൾ സഹിതം പുറത്ത് വന്നിട്ടും മാസപ്പടിയിൽ അഴിമതിയില്ലെന്ന നിലപാടിലാണ് സിപിഎം. കേന്ദ്രകമ്മിറ്റി യോഗങ്ങളുടെ റിപ്പോര്ട്ടിംഗിനൊപ്പം രാഷ്ട്രീയ സ്ഥിതിയും സമീപകാല വിവാദങ്ങളും ചര്ച്ചയാകുമെന്ന് കരുതിയ സംസ്ഥാന നേതൃയോഗങ്ങൾക്ക് ശേഷമാണ് എം വി ഗോവിന്ദൻ മാധ്യമങ്ങളെ കണ്ടത്. എകെജി സെന്ററിൽ വിളിച്ച വാര്ത്താസമ്മേളനത്തില് കേന്ദ്രസര്ക്കാരിനെതിരായ പ്രക്ഷോഭങ്ങളെ കുറിച്ചു പുതുപ്പള്ളി തെരഞ്ഞെടുപ്പ് രാഷ്ട്രീയത്തെ കുറിച്ചും ഗോവിന്ദൻ വിശദമായി സംസാരിച്ചു. ചോദ്യം മാസപ്പടിയിലെത്തിയപ്പോൾ എല്ലാം പറഞ്ഞ് കഴിഞ്ഞെന്നും ഇനിയൊന്നും പറയാനില്ലെന്നും നിലപാടെടുത്ത് ഗോവിന്ദൻ വാര്ത്താസമ്മേളനം അവസാനിപ്പിക്കുകയായിരുന്നു.
നേതൃയോഗങ്ങളിലും മാസപ്പടി ചര്ച്ചയായില്ലെന്നാണ് സൂചന. വീണ വിജയന്റെ കൺസൾട്ടൻസി സ്ഥാപനം കരിമണൽ കമ്പനിയുമായി ഉണ്ടാക്കിയ കരാര് നിയമപരമെന്നും ഇടപാട് സുതാര്യമെന്നും കേന്ദ്ര കമ്മിറ്റി അംഗം എ കെ ബാലൻ മുതൽ സിപിഎം സംസ്ഥാന സെക്രട്ടറി എംവി ഗോവിന്ദൻ വരെയുള്ളവര് നിലപാടെടുത്തിരുന്നു. വീണ വിജയന് പ്രതിരോധം തീര്ത്ത് സിപിഎം സംസ്ഥാന സെക്രട്ടേറിയറ്റ് പ്രസ്താവനയും ഇറക്കി. മറ്റ് നേതാക്കളുടെ മക്കൾക്ക് കിട്ടാത്ത പരിഗണനയാണെന്നും വിവാദം അടക്കാൻ പ്രതിപക്ഷവുമായി ധാരണയുണ്ടാക്കിയെന്നുമുള്ള ആക്ഷേപങ്ങൾ സിപിഎം നേതൃത്വത്തിനെതിരെ ഇതിനകം ഉയര്ന്ന് കഴിഞ്ഞിട്ടുണ്ട്. നയവ്യതിയാനങ്ങൾക്കെതിരെ തെറ്റുതിരുത്തൽ നടപടികൾ മുഖം നോക്കാതെ നടക്കണമെന്ന് നിര്ബന്ധമുള്ള എം വി ഗോവിന്ദന്റെ നിലപാടും ഇതോടെ ചോദ്യം ചെയ്യപ്പെടുകയാണ്. മുഖ്യമന്ത്രിയും വീണയും മന്ത്രി മുഹമ്മദ് റിയാസും മാസപ്പടി വിവാദം കത്തുമ്പോഴും മൗനത്തിലാണ്. ഇനി അവർ ശബ്ദിക്കുമെന്ന് കരുതുക വയ്യ.
ഒരു വിഷയത്തിൽ ഗവർണർക്ക് സ്വമേധയാ നടപടി സ്വീകരിക്കാൻ കഴിയും.
പരാതിയുണ്ടെങ്കിൽ നടപടിയെടുക്കുന്നതിൽ ഒരു ബുദ്ധിമുട്ടും ഇല്ല. മാസപ്പടി പ്രശ്നത്തിൽ ഗവർണർക്ക് മുന്നിൽ പൊതുപ്രവർത്തകൻ്റെ പരാതി മാത്രമല്ല ഉള്ളത് . ബി ജെ പി സംസ്ഥാന പ്രസിഡൻ്റും ഗവർണർക്ക് പരാതി നൽകിയിട്ടുണ്ട്. അതു കൊണ്ടു തന്നെ എങ്ങനെ വേണമെങ്കിലും ഗവർണർക്ക് പരാതി കൈകാര്യം ചെയ്യാവുന്ന സാഹചര്യമാണ് നിലവിലുള്ളത്. ഇതിൽ ഇലയ്ക്കും മുള്ളിനും കേടില്ലാത്ത ഒരു തീരുമാനം സർക്കാർ പ്രതീക്ഷിക്കുന്നില്ല.
https://www.facebook.com/Malayalivartha
