രാവിലെ മുതൽ മാധ്യമപ്രവർത്തകർ പ്രതികരണം ചോദിക്കുന്നു. മിണ്ടിയാലും പ്രശ്നം മിണ്ടിയില്ലെങ്കിലും പ്രശ്‌നമാണ്. വലതുപക്ഷ ആശയങ്ങളെ കേരളത്തിലെ മാധ്യമങ്ങൾ പിന്തുണക്കുന്നുവെന്നും മാധ്യമങ്ങളെ വിമർശിച്ചു കൊണ്ട് എംവി ​ഗോവിന്ദൻ പറഞ്ഞു. കോടിയേരിയുടെ മക്കളുടെ കാര്യം വന്നല്ലോ, സി പി എം നിലപാട് എടുത്തല്ലോ. അതാണ് ഇപ്പോഴത്തെയും നിലപാടെന്നും എംവി ​ഗോവിന്ദൻ കൂട്ടിച്ചേർത്തു. മാധ്യമങ്ങൾക്കുള്ള മറുപടി അദ്ദേഹം പൊതുവേദിയിൽ തട്ടി മൂളിക്കുകയായിരുന്നു.

വീണാ വിജയൻ കരിമണൽ കമ്പനിയിൽ നിന്ന് മാസപ്പടി വാങ്ങിയതിനെ കുറിച്ചുള്ള ചോദ്യങ്ങൾക്ക് മാധ്യമങ്ങളോട് ക്ഷുഭിതനാവുകയാണ് മന്ത്രി മുഹമ്മദ് റിയാസ് ചെയ്തത്. സിപിഎം സംസ്ഥാന സെക്രട്ടറിയെ പോലെ വിവാദം അവഗണിച്ചുവിടുകയാണ് റിയാസും. സിപിഎം സംസ്ഥാന സെക്രട്ടറിയേറ്റിന്‍റെ  വാർത്താകുറിപ്പിനപ്പുറം ഇനി ഒന്നുമില്ല. ചോദ്യം ഉയർന്നാൽ വാർത്താസമ്മേളനം നിർത്തും, ക്ഷോഭിച്ച് ഒഴിഞ്ഞുമാറും അവഗണിക്കും..മാസപ്പടി അവഗണിച്ചുവിടാം എന്ന രാഷ്ട്രീയലൈൻ ആവർത്തിക്കുന്നു പാർട്ടിനേതാക്കളും മന്ത്രിമാരും. വീണക്ക് കിട്ടിയ പണം റിയാസിന്‍റെ  തെരഞ്ഞെടുപ്പ് സത്യവാങ്മൂലത്തിൽ ഉൾപ്പെടുത്തിയില്ലല്ലോ എന്ന ചോദ്യം അടക്കം ഉയരുമ്പോഴും മറുപടി ഇല്ല .

തൊട്ടാൽ പൊള്ളുമെന്നതിനാൽ സിപിഎം അവഗണിക്കുമ്പോൾ ഏറ്റുപിടിക്കാതെ യുഡിഎഫിന്‍റെ  കയ്യയച്ച സഹായം തുടരുകയാണ്. നിയമസഭയിൽ സാങ്കേതിക കാരണം ഉയർത്തി അടയന്തിരപ്രമേയം ഉന്നയിക്കാതെ വിട്ട യുഡിഎഫ് പുതുപ്പള്ളിയിൽ പോലും മാസപ്പടി ഉയർത്തുന്നില്ല. സർക്കാറിനെതിരായ വിധിയെഴുത്ത് കൂടിയാകും പുതുപ്പള്ളി എന്ന് പറയുമ്പോൾ ഇന്നലെ കൺവെൻഷനിൽ ഒരുനേതാവു പോലും മാസപ്പടി പറഞ്ഞില്ല. പണം വാങ്ങിയ മുന്നണി നേതാക്കളുടെ പേരുകളാണ് ആഞ്ഞടിക്കേണ്ട യുഡിഎഫിനെ പിന്നോട്ടടിപ്പിക്കുന്ന ഘടകം രാഹുൽ ഗാന്ധിയാണ്. ഡൽഹിയിൽ ഇവരെല്ലാം ഒന്നാണ്. പിണറായിക്ക് ഒരു ബുദ്ധിമുട്ട് വരുമ്പോൾ യു.ഡി.എഫ് നേതാക്കൾക്ക് സഹിക്കാൻ കഴിയാത്തത് അതാണ്. 2024 ൽ കേന്ദ്രത്തിൽ ഭരണം പ്രതീക്ഷിക്കുന്ന ഇന്ത്യ കക്ഷികൾക്ക് സ്വപ്നങ്ങളെല്ലാം വിഫലമാകുമെന്ന് അറിയാമെങ്കിലും അവർ വെറുതെ പ്രതീക്ഷിക്കുകയാണ്.

മാത്യു കുടൽ നാടൻ മാത്രമാണ് വീണാ വിജയന്  എതിരെ  സംസാരിക്കുന്നത്. അതിനുള്ള മറുപടി അദ്ദേഹത്തിന് കിട്ടിയിട്ടുണ്ട്. മാത്യു കള്ളപ്പണം വെളുപ്പിച്ചെന്നാണ് സി പി എം കണ്ടെത്തിയിരിക്കുന്നത്. ഇത്രയും കാലം ഇങ്ങനെയൊരു കണ്ടെത്തൽ ഉണ്ടായിട്ടില്ല. അഭിഭാഷകനായി 12 വർഷം മാത്രം പരിചയമുള്ള മാത്യുവിന് വക്കീൽ ജോലിയിൽ നിന്ന് 23 കോടി എങ്ങനെ കിട്ടിയെന്നാണ് പാർട്ടിയുടെ സംശയം.2021  മാർച്ച് 18  ന് രാജകുമാരി സബ് രജിസ്ട്രാർ ഓഫീസിൽ രജിസ്റ്റർ ചെയ്ത റിസോർട്ടിൻ്റെ പ്രമാണത്തിലെ വില തെറ്റായി രേഖപ്പെടുത്തിയെന്നും ആരോപണം ഉയർന്നിട്ടുണ്ട്. രാജ്യത്തെ മുൻനിര അഭിഭാഷകർക്കൊന്നുമില്ലാത്ത സെറ്റപ്പാണ് മാത്യുവിന് ഉള്ളതെന്നാണ് സിപിഎം ആക്ഷേപം. ഇവർക്ക് മാത്യുവിനെ കുറിച്ച് അറിയാത്തതുെകൊണ്ടാണ് ഇത്തരം ആരോപണങ്ങൾ ഉന്നയിക്കുന്നത്.  ഏതായാലും വീണ വായിക്കാതായതോടെ സതീശനും സംഘവും രക്ഷപ്പെട്ടു.

ഗവർണർ നടത്തിയ സത്കാരത്തിൽ പിണറായി പങ്കെടുത്തതും വ്യക്തമായ രാഷ്ട്രീയ സൂചനയാണ്. തൻ്റെ പാർട്ടിയിൽ ഉള്ളവരെക്കാൾ ഇപ്പോൾ പിണറായിക്ക് വിശ്വാസം ഇതര കക്ഷികളിൽ ഉള്ളവരെയാണ്. കോൺഗ്രസും ബിജെപിയും തന്നെ ചതിക്കില്ലെന്ന് പിണറായി കരുതുന്നു. മകൾക്ക് ഒരു ബുദ്ധിമുട്ട് വന്നപ്പോൾ ഇടപെടാത്ത പ്രതിപക്ഷ  നേതാക്കളോട് പിണറായിക്ക് തീർത്താൽ തീരാത്ത കടപ്പാടുണ്ട്. മാത്യുവിനെ അദ്ദേഹം എന്നേ ഉപേക്ഷിച്ച് കഴിഞ്ഞു.ചെമ്മീൻ ചാടിയാൽ ചട്ടിയോളം മാത്രമെന്ന് പിണറായിക്ക് അറിയാം.