യുവജനങ്ങളുടെ ശാരീരികവും മാനസികവുമായ ആരോഗ്യം ഉറപ്പാക്കാൻ ക്യാമ്പയിന് തുടക്കമിട്ട് സംസ്ഥാന യുവജന കമ്മീഷൻ. പാർശ്വവത്കരിക്കപ്പെട്ടവർക്ക് വേണ്ട സഹായങ്ങൾ നൽകുമെന്നും യുവജനങ്ങളുടെ ശാരീരികവും മാനസികവുമായ ആരോഗ്യം ഉറപ്പാക്കാൻ യുവജന സംഘടനകളുടെയും വിദ്യാർത്ഥികളുടെയും സഹകരണത്തോടെ ക്യാമ്പയിൻ ആരംഭിക്കുമെന്നും യുവജന കമ്മീഷൻ ചെയർമാൻ എം ഷാജർ പറഞ്ഞു. എറണാകുളം ഗസ്റ്റ് ഹൗസിൽ നടത്തിയ യുവജന കമ്മീഷൻ അദാലത്തിന് ശേഷം സംസാരിക്കുകയായിരുന്നു അ‌ദ്ദേഹം.

യുവജനങ്ങൾക്ക് നേരെയുള്ള കടന്നാക്രമണങ്ങൾ, തൊഴിലിടങ്ങളിലും വിദ്യാഭ്യാസ സ്ഥാപനങ്ങളിലും ഉൾപ്പെടെ നേരിടുന്ന നീതി നിഷേധം എന്നീ പരാതികളാണ് യുവജന കമ്മീഷൻ പരിഹരിച്ച് വരുന്നത്. താൽക്കാലിക ജീവനക്കാരനായി ജോലി ചെയ്തിരുന്ന യുവാവിന് തൊഴിൽ നഷ്ടപ്പെട്ട സാഹചര്യത്തിൽ വീണ്ടും അതേ സ്ഥാപനത്തിൽ ജോലി ലഭിക്കാൻ യുവജന കമ്മീഷന് ഇടപെടാൻ കഴിഞ്ഞുവെന്ന് ചെയർമാൻ പറഞ്ഞു.

ജീവിതത്തിലെ ചെറിയ പ്രശ്നങ്ങളിൽ പോലും തളർന്ന് പോകുയും ആത്മഹത്യയിലേക്ക് കടക്കുന്നതുമെല്ലാം ഇന്നത്തെ യൗവനം നേരിടുന്ന പ്രശ്നങ്ങളിലൊന്നാണ്. യുവജനങ്ങളുടെ മാനസികാരോഗ്യത്തിനായി വേണ്ട മാർഗ നിർദ്ദേശങ്ങൾ നൽകും. പ്രതിസന്ധികളിലൂടെ കടന്ന് പോകുന്നുവെങ്കിലും പ്രചോദനാത്മകമായി ജീവിക്കുന്ന വ്യക്തികളെ യൂത്ത് ഐക്കണായി യുവാക്കൾക്ക് മുന്നിലെത്തിക്കും.

യൂത്ത് കമ്മീഷനിൽ വരുന്ന പരാതികൾ മാസത്തിൽ രണ്ട് തവണ യുവജന കമ്മീഷന്റെ ഓഫിസ് വികാസ് ഭവനിൽ ഹിയറിങ്ങായും ഒരു വർഷത്തിൽ ഒരു ജില്ലയിൽ ഒരു തവണ അദാലത്ത് ആയും ഒരു മെഗാ അദാലത്ത് ആയുമാണ് പരാതികൾ പരിഹരിച്ച് വരുന്നത്.

എറണാകുളം ജില്ലാതല അ‌ദാലത്തിൽ പരിഗണിച്ച 21 പരാതികളിൽ 11 പരിഹരിച്ചു. അടുത്ത സിറ്റിങ്ങിലേക്ക് 10 കേസുകൾ മാറ്റിവച്ചു. പുതിയ 12 പരാതികൾ ലഭിച്ചു.

കമ്മീഷൻ അംഗങ്ങളായ ഡോ. പ്രിൻസി കുര്യാക്കോസ്, കെ.പി. പ്രമോഷ്, വി.വിനിൽ, റെനീഷ് മാത്യു, കമ്മീഷൻ സെക്രട്ടറി ഡാർളി ജോസഫ്, ലീഗൽ അഡ്‌വൈസർ വിനിത വിൻസെന്റ് എന്നിവർ അ‌ദാലത്തിന് നേതൃത്വം കൊടുത്തു.