കേന്ദ്രസംസ്ഥാന സര്ക്കാരുകള്ക്കെതിരെ കെ.സുധാകരന് നയിക്കുന്ന കേരള ജാഥ ജനുവരി പകുതിയോടെ ആരംഭിക്കും
കേന്ദ്ര-സംസ്ഥാന സര്ക്കാരുകള്ക്കെതിരെ കെപിസിസി. സംസ്ഥാന പ്രസിഡന്റ് കെ.സുധാകരന് നയിക്കുന്ന കേരള ജാഥ ജനുവരി പകുതിയോടെ ആരംഭിച്ചു ഫെബ്രുവരി പകുതിയോടെ സമാപിക്കും. ജാഥ എല്ലാ നിയോജക മണ്ഡലങ്ങളും സന്ദര്ശിക്കും. പുനഃസംഘടന വേഗത്തില് പൂര്ത്തിയാക്കുമെന്നു കെപിസിസി നേതൃയോഗത്തിനുശേഷം കെ.സുധാകരന് പറഞ്ഞു. മണ്ഡലം കമ്മിറ്റി പുനഃസംഘടന 85% പൂര്ത്തിയാക്കി. ബാക്കി മൂന്നു ദിവസത്തിനുള്ളില് തീരും. എന്തുകൊണ്ടു കോണ്ഗ്രസ് അധികാരത്തില് തിരിച്ചുവരണമെന്നു ജനത്തെ ബോധ്യപ്പെടുത്തുന്ന പ്രചാരണ പരിപാടി സംഘടിപ്പിക്കും. കോണ്ഗ്രസിനെ സംബന്ധിച്ചു മികച്ച രാഷ്ട്രീയ സാഹചര്യമാണെന്നും സുധാകരന് പറഞ്ഞു.
''മികച്ച വിജയം നേടാനുള്ള സാഹചര്യം പാര്ട്ടി സൃഷ്ടിക്കും. ലോക്സഭാ സീറ്റില് 20ല് 20 സീറ്റും നേടുക എന്നതാണു ലക്ഷ്യം. ദേശീയ തലത്തിലും കോണ്ഗ്രസിന് അനുകൂല സാഹചര്യമാണ്. സംസ്ഥാനത്തു കാര്യങ്ങള് മുഖ്യമന്ത്രിക്കും സര്ക്കാരിനും എതിരാണ്. ധിക്കാരിയായ മുഖ്യമന്ത്രിയെയാണു ജനം നോക്കിക്കാണുന്നത്. തോമസ് ഐസക്കും എം.എ. ബേബിയും സര്ക്കാരിനെതിരെ അഭിപ്രായം പറഞ്ഞു''. സ്വന്തം പാര്ട്ടിക്കാര് തന്നെ സര്ക്കാരിനെ തള്ളിപ്പറയുകയാണെന്നും സുധാകരന് പറഞ്ഞു.
''കേന്ദ്ര-സംസ്ഥാന സര്ക്കാരുകള്ക്കെതിരെ വീടുകള് കയറിയിറങ്ങി പ്രചാരണം നടത്തും. സഹകരണ കൊള്ളയ്ക്കെതിരെ സംസ്ഥാന വ്യാപകമായി പ്രക്ഷോഭം നടത്തും. സഹകരണ ബാങ്കുകളില്നിന്നു പണം സമാഹരിക്കാനുള്ള സര്ക്കാര് നീക്കത്തോടു സഹകരിക്കരുതെന്നു യുഡിഎഫ് ഭരണത്തിലുള്ള ബാങ്കുകള്ക്കു നിര്ദേശം നല്കും. ഡിസംബറില് കുറ്റപത്രം തയാറാക്കി കേന്ദ്ര-സംസ്ഥാന സര്ക്കാരുകളെ വിചാരണയ്ക്കു വിധേയമാക്കും. ഒക്ടോബര് 19 മുതല് നവംബര് 10വരെ കെപിസിസി പ്രസിഡന്റും പ്രതിപക്ഷ നേതാവും ജില്ലകളില് പര്യടനം നടത്തും. മേഖലാ പദയാത്രകളും സംഘടിപ്പിക്കും. എംപിമാര് അടക്കമുള്ള പ്രമുഖ നേതാക്കള് പദയാത്രയില് പങ്കെടുക്കും. ഡിസംബറില് ഉമ്മന്ചാണ്ടിയുടെ അനുസ്മരണാര്ഥം സംഗമങ്ങള് നടത്തും''. മാസപ്പടി കേസില് നിയമനടപടി സ്വീകരിക്കുമെന്നു കെ.സുധാകരന് പറഞ്ഞു.
''മാത്യു കുഴല്നാടന് വിജിലന്സ് ഡയറക്ടര്ക്ക് പരാതി നല്കിയിട്ടുണ്ട്. ഗുരുതരമായ വിഷയമാണ്. മറുപടി പറയാന് മുഖ്യമന്ത്രിക്കു ബാധ്യതയുണ്ട്. തൃപ്തികരമായ മറുപടി മുഖ്യമന്ത്രി ഇതുവരെ പറഞ്ഞിട്ടില്ല. നാറി പുളിച്ചിട്ടും മുഖ്യമന്ത്രി കസേരയിലിരിക്കുന്ന രാജ്യത്തെ ആദ്യ മുഖ്യമന്ത്രിയാണു പിണറായി. മുഖ്യമന്ത്രി രാജി വയ്ക്കാന് തയാറാകണം''. കെപിസിസി പ്രസിഡന്റും പ്രതിപക്ഷ നേതാവുമായി അഭിപ്രായ വ്യത്യാസമില്ലെന്നു ചോദ്യത്തിനു മറുപടിയായി കെ.സുധാകരന് പറഞ്ഞു. ലോക്സഭാ തിരഞ്ഞെടുപ്പില് സിറ്റിങ് എംപിമാരെ മാറ്റാന് ആര്ക്കും താല്പര്യമില്ല. ആരോഗ്യപരമായ കാരണങ്ങളാല് താന് മത്സര രംഗത്തുണ്ടാകില്ലെന്നും കെ.സുധാകരന് വ്യക്തമാക്കി.
https://www.facebook.com/Malayalivartha
