ഇന്റര്വ്യൂവിന് പോയ യാത്ര അന്ത്യയാത്രയായി.... വഴിതെറ്റി ബസിറങ്ങിയ ജംഗ്ഷനിലെ സീബ്രാലൈനിലൂടെ റോഡ് കുറുകെ കടന്ന യുവതി അമിതവേഗത്തിലെത്തിയ കാറിടിച്ചു മരിച്ചു...
ഇന്റര്വ്യൂവിന് പോയ യാത്ര അന്ത്യയാത്രയായി.... വഴിതെറ്റി ബസിറങ്ങിയ ജംഗ്ഷനിലെ സീബ്രാലൈനിലൂടെ റോഡ് കുറുകെ കടന്ന യുവതി അമിതവേഗത്തിലെത്തിയ കാറിടിച്ചു മരിച്ചു. ഇടുക്കി കെ ചപ്പാത്ത് മരുതുംപേട്ടയില് കളത്തൂക്കുന്നേല് കെ.സി.ആന്റണി മോളി ദമ്പതികളുടെ മകള് അന്സു ട്രീസ ആന്റണി (25) ആണു മരിച്ചത്.
ബുധന് രാവിലെ 7ന് എംസി റോഡില് കുളക്കട വായനശാല ജംക്ഷനു സമീപമായിരുന്നു അപകടം നടന്നത്. അന്സു കാസര്കോട് പെരിയയിലെ കേരള സെന്ട്രല് സര്വകലാശാലയില് നിന്ന് എംബിഎ പൂര്ത്തിയാക്കിയിരുന്നു. കാരുവേലിലെ കോളേജില് ജോലിക്കായുള്ള ഇന്റര്വ്യൂവിന് പോകാനായി ബസില് എത്തിയതായിരുന്നു. പുത്തൂര് വഴി പോകുന്നതിനു പുത്തൂര് മുക്കില് ഇറങ്ങുന്നതിനു പകരം കുളക്കടയില് ഇറങ്ങുകയായിരുന്നു.
ഓട്ടോറിക്ഷ ഡ്രൈവറോടു വഴി ചോദിച്ചു മനസ്സിലാക്കിയ അന്സു ബസ് പിടിക്കുന്നതിനു സീബ്രാലൈനിലൂടെ റോഡിന്റെ മറുവശത്തേക്കു നടക്കുമ്പോഴാണ് അമിത വേഗത്തില് എത്തിയ കാര് ഇടിച്ചു തെറിപ്പിച്ചത്. ഈ കാര് മറ്റൊരു കാറിനെ മറികടന്ന് റോഡിന്റെ വലതുവശത്തേക്കു പാഞ്ഞുകയറി എത്തിയതാണ് അപകട കാരണം.
സീബ്രാലൈനിന്റെ അവസാന ഭാഗത്ത് എത്തിയപ്പോഴാണ് അന്സുവിനെ ഇടിച്ചു വീഴ്ത്തിയത്. ഉടന് കൊട്ടാരക്കരയിലെ സ്വകാര്യ ആശുപത്രിയില് പ്രവേശിപ്പിച്ചെങ്കിലും രാത്രിയോടെ മരിച്ചു. സഹോദരിമാര്: അന്റു ആന്റണി (യുഎസ്), അഞ്ജു ആനി ആന്റണി. സംസ്കാരം പിന്നീട് നടക്കും.
അതേസമയം അലക്ഷ്യമായും അമിത വേഗത്തിലും കാര് ഓടിച്ച് അപകടത്തിന് ഇടയാക്കിയ പത്തനംതിട്ട ചെന്നീര്ക്കര നീലകിലേത്തു വീട്ടില് ജയകുമാറിനെ പ്രതിയാക്കി പൊലീസ് കേസെടുത്തു. കാര് കസ്റ്റഡിയിലാണ്.
"
https://www.facebook.com/Malayalivartha
