ജനകീയ വികസനാവശ്യങ്ങള് വാദിച്ച് നേടിയെടുക്കാന് ഇച്ഛാശക്തിയുള്ള രാഷ്ട്രീയനേതൃത്വം വേണം, അത് ഇടതുപക്ഷത്തിനേ സാദ്ധ്യമാവൂ: സീതാറാം യെച്ചൂരി
കേരളത്തില് നിന്ന് ഫലപ്രദമായ ഇടതുപക്ഷ ബദല് രൂപപ്പെട്ടാലല്ലാതെ രാജ്യത്ത് ഇടത് ബദല് സാദ്ധ്യമാവില്ലെന്ന് സി.പി.എം ജനറല് സെക്രട്ടറി സീതാറാം യെച്ചൂരി പറഞ്ഞു. നവ ഉദാരീകരണം തീവ്രമായി അടിച്ചേല്പിക്കുകയും സംസ്ഥാനങ്ങളുടെ അധികാരം കവരുകയും ചെയ്യുന്ന കേന്ദ്രസര്ക്കാരിന്റെ സമീപനത്തെ നേരിട്ട് ജനകീയ വികസനാവശ്യങ്ങള് വാദിച്ച് നേടിയെടുക്കാന് ഇച്ഛാശക്തിയുള്ള രാഷ്ട്രീയനേതൃത്വം വേണം. കേരളത്തില് അത് ഇടതുപക്ഷത്തിനേ സാദ്ധ്യമാവൂ എന്നും സി.പി.എമ്മിന്റെ നാലാം അന്താരാഷ്ട്ര പഠന കോണ്ഗ്രസ് എ.കെ.ജി ഹാളില് ഉദ്ഘാടനം ചെയ്ത് യെച്ചൂരി പറഞ്ഞു.
നവ ഉദാരവത്കരണ സാമ്പത്തിക ക്രമത്തില് ബദല് വികസനനയം മുന്നോട്ട് വയ്ക്കാനും നടപ്പാക്കാനും പറ്റിയ രാഷ്ട്രീയശക്തി ഇടതുപക്ഷമാണ്. ഒന്നാം പഠന കോണ്ഗ്രസ് മുന്നോട്ടുവച്ച ജനകീയാസൂത്രണ ബദല് ഇടതുസര്ക്കാര് ഫലപ്രദമായി നടപ്പാക്കി. പിന്നീട് വന്ന യു.ഡി.എഫ് ഭരണം അത് അട്ടിമറിച്ചു. ജനാധിപത്യത്തിന്റെ വികേന്ദ്രീകരണമാണ് ഇടതുസര്ക്കാര് മുന്നോട്ട് വച്ചതെങ്കില് യു.ഡി.എഫ് ഭരണത്തില് സമ്പത്തിന്റെ കേന്ദ്രീകരണമായി ചുരുങ്ങി. കേന്ദ്രനയങ്ങള് കാരണം കടക്കെണിയിലായ കര്ഷകരുടെ ആത്മഹത്യ തടയാന് കഴിഞ്ഞ എല്ഡിഎഫ് സര്ക്കാരിന് കഴിഞ്ഞിരുന്നു. എല്ഡിഎഫ് സര്ക്കാരിന്റെ കാലത്ത് സംസ്ഥാനത്തെ പൊതുമേഖലാ സ്ഥാപനങ്ങള് ലാഭത്തിലായി. എന്നാല് തുടര്ന്നു വന്ന യുഡിഎഫ് സര്ക്കാര് അവയെ വീണ്ടും നഷ്ടത്തിലേക്ക് കൂപ്പുകുത്തിച്ചു. യു.ഡി.എഫ് ഭരണത്തില് കേരളത്തിന്റെ കാര്ഷിക, വ്യാവസായികമേഖലകള് തകര്ച്ചയിലായിരിക്കുന്നു. സാമൂഹ്യ, സാമ്പത്തിക അസമത്വം വര്ദ്ധിക്കുന്നതും കാണാതിരിക്കാനാവില്ല. യു.ഡി.എഫ് സര്ക്കാരിന്റെ കാലത്തുണ്ടായ സാമ്പത്തിക സ്തംഭനാവസ്ഥ അവസാനിപ്പിച്ച് വേഗത്തിലുള്ള വികസനനയം കേരളത്തിന് ആവശ്യമാണ്. അടുത്ത നിയമസഭാ തിരഞ്ഞെടുപ്പില് ഇടതുപക്ഷം വിജയിച്ചാലേ ഇത് സാദ്ധ്യമാകൂ.
ഇടത് സര്ക്കാരുകളുടെ ഇടപെടലുകളാണ് കേരളത്തിന്റെ സാമൂഹ്യ, സാമ്പത്തിക സൂചികകള് ഉയര്ന്ന നിലയിലെത്തിച്ചത്. അത് സൃഷ്ടിച്ച സ്വയംഭരണ സ്വഭാവം കൂടുതല് ക്രിയാത്മകമായ നിലയിലേക്ക് വളര്ത്തിയെടുക്കാന് ഇടത് സര്ക്കാര് വീണ്ടും വരണം. ഫെഡറലിസത്തെ വെല്ലുവിളിച്ച് നരേന്ദ്ര മോദിയുടെ ഭരണം സംസ്ഥാനങ്ങളുടെ അധികാരത്തിനുമേല് കടന്നു കയറുകയാണ്. സംസ്ഥാനങ്ങള്ക്കുള്ള പദ്ധതി വിഹിതത്തിന്റെ ഒഴുക്കിന് മോദി സര്ക്കാര് തടയിട്ടു. ആസൂത്രണ കമ്മിഷന് ഇല്ലാതാക്കി പകരം നിതി ആയോഗ് കൊണ്ടുവന്നത് കേവലം പേരില് മാറ്റം വരുത്തലായി മാത്രം കാണേണ്ട. മൊത്തത്തിലുള്ള നയവ്യതിയാനമാണത്. കേരളവും ബംഗാളുമാണ് ഏറ്റവുമധികം റവന്യൂകമ്മി വരുത്തുന്ന സംസ്ഥാനങ്ങളെന്ന കേന്ദ്രധനമന്ത്രി അരുണ് ജയ്റ്റ്ലിയുടെ കുറ്റപ്പെടുത്തല് ഇടതുപക്ഷത്തെ ലക്ഷ്യം വച്ചാണ്. ഇടതുപക്ഷത്തെ കുറ്റപ്പെടുത്താനുള്ള എല്ലാ അവസരവും ജയ്റ്റ്ലി വിനിയോഗിക്കാറുണ്ട്. അതിലൊന്നായി ഇതിനെ കണ്ടാല് മതിയെങ്കിലും റവന്യൂകമ്മി എന്നത് ഒരു വാര്ഷികപ്രതിഭാസമാണെന്ന് തിരിച്ചറിയേണ്ടതുണ്ട്. അങ്ങനെയെങ്കില് കുറ്റപ്പെടുത്തേണ്ടത് ബംഗാളില് തൃണമൂല് കോണ്ഗ്രസിനെയും ഇവിടെ യു.ഡി.എഫിനെയുമാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
