സോളാര്‍ കേസ് അവസാന ഘട്ടത്തിലേക്ക്. നാളുകളായുള്ള സോളാര്‍ ആരോപണത്തില്‍ ഉമ്മന്‍ ചാണ്ടി കമ്മീഷന് മുന്നിലേക്ക്. സോളാര്‍ കേസില്‍ മുഖ്യമന്ത്രി ഉമ്മന്‍ ചാണ്ടിയെ സോളാര്‍ കമ്മീഷന്‍ സാക്ഷി വിസ്താരത്തിന് വിധേയനാക്കും. മുഖ്യമന്ത്രിയുടെ സൗകര്യം കൂടി പരിഗണിച്ച് ജനവരി 25ന് തിരുവനന്തപുരത്തുവച്ചായിരിക്കും വിസ്താരം. ഇതു സംബന്ധിച്ച് കമ്മീഷന്‍ ഓഫ് എന്‍ക്വയറി ആക്ട് സെക്ഷന്‍ 8 ബി പ്രകാരം മുഖ്യമന്ത്രിക്ക് കമ്മീഷന്‍ നോട്ടീസ് നല്‍കിയിട്ടുണ്ട്. സോളാര്‍ കേസില്‍ മുഖ്യമന്ത്രിക്കെതിരെ ഉയര്‍ന്ന ആരോപണങ്ങള്‍ക്കെല്ലാം മറുപടി പറയാന്‍ ഇതുവഴി മുഖ്യമന്ത്രിക്ക് അവസരം ലഭിക്കും. കമ്മീഷന്റെ നടപടിക്രമങ്ങള്‍ ഉടന്‍ പൂര്‍ത്തിയാക്കി റിപ്പോര്‍ട്ട് നല്‍കാനാണ് ശ്രമം. ഇതിന്റെ ഭാഗമായാണ് അന്തിമ തെളിവെടുപ്പിലേക്ക് കാര്യങ്ങള്‍ എത്തുന്നത്.
മുഖ്യമന്ത്രിയെ വിസ്തരിക്കുന്ന കാര്യം കൊച്ചിയിലെ സിറ്റിങിനിടെ സോളാര്‍ കമ്മിഷന്‍ ജഡ്ജി എസ്. ശിവരാജനാണ് വ്യക്തമാക്കിയത്. ഹാജരാകാന്‍ തയാറാണെന്നു മുഖ്യമന്ത്രി സോളാര്‍ കമ്മിഷനെ അറിയിച്ചു. കേസില്‍ മുഖ്യമന്ത്രി അടക്കമുള്ളവരുടെ വിശദീകരണം നേരത്തെ കമ്മിഷന്‍ തേടിയിരുന്നു. ഇതനുസരിച്ച് മുഖ്യമന്ത്രിയോടു ഹാജരാകാന്‍ താത്പര്യമുണ്ടോയെന്നു കമ്മിഷന്‍ ആരാഞ്ഞിരുന്നു. ഇതിനു പിന്നാലെ ഹാജരാകാനുള്ള സമ്മതം മുഖ്യമന്ത്രിയുടെ ഓഫിസ് കമ്മിഷനെ അറിയിക്കുകയായിരുന്നു. കേസുമായി ബന്ധപ്പെട്ട് മുഖ്യമന്ത്രിക്കും മുഖ്യമന്ത്രിയുടെ ഓഫിസിനും മന്ത്രിസഭയിലെ മറ്റ് അംഗങ്ങള്‍ക്കുമെതിരെ ഉയര്‍ന്ന ആരോപണങ്ങളുടെ നിജസ്ഥിതി കമ്മിഷന്‍ പരിശോധിക്കുകയാണ്. ഈ പശ്ചാത്തലത്തിലാണു മുഖ്യമന്ത്രിയുടെ മൊഴി രേഖപ്പെടുത്താന്‍ തീരുമാനിച്ചത്.
അതിനിടെ കേസില്‍ തെളിവുകള്‍ നല്‍കാതിരിക്കാന്‍ ഗൂഡ ശ്രമം നടക്കുന്നുവെന്ന സൂചനയും കമ്മീഷന്‍ പങ്കുവച്ചു. സോളാര്‍ കേസില്‍ കമ്മീഷന് മുമ്പാകെ ചൊവ്വാഴ്ച്ച ഹാജരാവാന്‍ സരിത എസ്. നായരോട് കമ്മീഷന്‍ ആവശ്യപ്പെട്ടിരുന്നെങ്കിലും ഇന്നു ഹാജരാവില്ലെന്ന് സരിത രാവിലെ വ്യക്തമാക്കിയിരുന്നു. കേസ് സംബന്ധിച്ച സരിത തന്നെ വിവാദമാക്കിയ കത്ത് കമ്മീഷന് മുമ്പാകെ ഹാജരാക്കണമെന്ന് നിഷ്‌ക്കര്‍ഷിച്ചിരുന്നെങ്കിലും അതിനു തയ്യാറല്ലെന്നാണ് സരിതയുടെ നിലപാട്. കത്തിന്റെ രഹസ്യ സ്വഭാവം പരിഗണിച്ച് ഹാജരാക്കാന്‍ കഴിയില്ലെന്നും സരിത പറയുന്നു. ആലപ്പുഴ രാമങ്കരിയില്‍ മറ്റൊരു കേസുള്ളതിനാലാണ് ഹാജരാകാത്തതെന്നാണ് ഇന്ന് കമ്മീഷനെ അറിയിച്ചിരിക്കുന്നത്.
സോളാര്‍ കേസില്‍ വിസ്തരിക്കേണ്ടവരുടെ സാക്ഷിപ്പട്ടിക ജുഡിഷ്യല്‍ കമ്മിഷന്‍ നേരത്തെ തയ്യാറാക്കിയിരുന്നു. ഈ പട്ടികയില്‍ മുഖ്യമന്ത്രിയേയും ഉള്‍പ്പെടുത്തിയിരുന്നു. സോളാര്‍ കേസിലെ മുഖ്യപ്രതികളായ സരിതാ എസ്.നായര്‍, ബിജു രാധാകൃഷ്ണന്‍ എന്നിവരുമായി ഫോണില്‍ ബന്ധപ്പെട്ട എംഎ!ല്‍എമാര്‍, എംപിമാര്‍ എന്നിവരില്‍ നിന്നും കമ്മിഷന്‍ നേരത്തെ തെളിവെടുത്തു. സോളാര്‍ കേസിലെ പ്രതികള്‍ പലതവണ മുഖ്യമന്ത്രിയുടെ ഓഫീസുമായി ബന്ധപ്പെട്ടതായി നേരത്തെ കണ്ടെത്തിയിരുന്നു. ഇത് സംബന്ധിച്ച വിവരങ്ങളാവും മുഖ്യമന്ത്രിയില്‍ നിന്ന് കമ്മിഷന്‍ തേടുക.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha