ഓണ്‍ലൈന്‍ ആധാരം റജിസ്‌ട്രേഷന്‍ സംവിധാനം കൂടുതല്‍ സബ് റജിസ്ട്രാര്‍ ഓഫീസുകളിലേക്കു വ്യാപിപ്പിക്കുന്നതു നിര്‍ത്തിവയ്ക്കാന്‍ വകുപ്പുമന്ത്രി അനൂപ് ജേക്കബ് നിര്‍ദേശം നല്‍കി. ഓണ്‍ലൈന്‍ സംവിധാനം താറുമാറായതിനെ തുടര്‍ന്ന് ആധാരം റജിസ്‌ട്രേഷന്‍ മുടങ്ങുന്നതായി വ്യാപക പരാതി ഉയര്‍ന്ന സാഹചര്യത്തിലാണു മന്ത്രിയുടെ ഇടപെടല്‍. സെര്‍വറുകളുടെ ശേഷിയും വേഗവും വര്‍ധിപ്പിച്ച് നിലവിലുള്ള പ്രശ്‌നങ്ങള്‍ പരിഹരിച്ചതായും മന്ത്രി വ്യക്തമാക്കി. റീസര്‍വെ പൂര്‍ത്തിയാകാത്ത സബ് റജിസ്ട്രാര്‍ ഓഫീസുകളെ ഓണ്‍ലൈന്‍ സംവിധാനത്തില്‍നിന്ന് ഒഴിവാക്കിയതായും മന്ത്രി പറഞ്ഞു. ഇവിടെ പഴയ സംവിധാനം തുടുരും.

ജീവനക്കാര്‍ക്കും ആധാരം എഴുത്തുകാര്‍ക്കും മതിയായ പരിശീലനം ഉറപ്പാക്കാതെ സംസ്ഥാന വ്യാപകമായി സംവിധാനം നടപ്പാക്കിയതാണ് ആശയക്കുഴപ്പത്തിന് ഇടയാക്കിയതെന്നും ഇക്കാര്യത്തില്‍ ഉന്നത ഉദ്യോഗസ്ഥരെ അതൃപ്തി അറിയിച്ചെന്നും മന്ത്രി പറഞ്ഞു.

സംസ്ഥാനത്തെ 314 സബ് റജിസ്ട്രാര്‍ ഓഫീസുകളില്‍ 189 ഇടത്താണ് ഇപ്പോള്‍ സംവിധാനം നടപ്പാക്കിയിരിക്കുന്നത്. നിലവിലുള്ള പരാതികള്‍ പരിഹരിച്ചുവെന്ന് ഉറപ്പാക്കിയ ശേഷം മാത്രം ബാക്കിയുള്ള ഓഫീസുകളില്‍ സംവിധാനം നടപ്പാക്കിയാല്‍ മതിയെന്നാണു മന്ത്രി നിര്‍ദേശം നല്‍കിയിരിക്കുന്നത്. കൂടുതല്‍ കമ്ബ്യൂട്ടറുകളും അനുബന്ധ ഉപകരണങ്ങളും സബ് റജിസ്ട്രാര്‍ ഓഫീസുകളില്‍ എത്തിക്കാന്‍ നടപടികള്‍ സ്വീകരിച്ചുവെന്നും മന്ത്രി പറഞ്ഞു.

ജീവനക്കാര്‍ക്കും ആധാരം എഴുത്തുകാര്‍ക്കും പരിശീലനം നല്‍കുന്നതു തുടരുകയാണ്. വിവിധ ജില്ലകളിലെ സര്‍ക്കാര്‍ എന്‍ജിനീയറിങ് കോളജുകളിലെ കമ്പ്യൂട്ടര്‍ ലാബുകള്‍ ഇതിനായി ഉപയോഗിക്കുമെന്നും റജിസ്‌ട്രേഷന്‍ വകുപ്പ് വ്യക്തമാക്കി.

ഇപ്പോഴത്തെ സംവിധാനമനുസരിച്ച് ആധാരം റജിസ്റ്റര്‍ ചെയ്യുന്നതിനു മുമ്ബ് എല്ലാ വിവരങ്ങളും ഓണ്‍ലൈനില്‍ നല്‍കണം. വസ്തു വാങ്ങുന്നയാള്‍, വില്‍ക്കുന്നയാള്‍, സാക്ഷികള്‍ എന്നിവരുടെ വിവരം, വസ്തുവിന്റെ സര്‍വേ നമ്പര്‍, വിസ്തീര്‍ണം എന്നിവ നല്‍കുമ്പോള്‍ ആധാരം റജിസ്റ്റര്‍ ചെയ്യാനുള്ള ടോക്കണ്‍ ലഭിക്കും. ഈ ടോക്കണിലെ സമയം അനുസരിച്ച് മാത്രമെ സബ് റജിസ്ട്രാര്‍ ഓഫീസിലെത്തി ആധാരം റജിസ്റ്റര്‍ ചെയ്യാന്‍ കഴിയൂ.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha