കൊല്ലപ്പെട്ട സിസ്റ്റര് അമല പീഡനത്തിന് ഇരയായിരുന്നു എന്ന് കണ്ടെത്തല്
കൊല്ലപ്പെട്ട സിസ്റ്റര് അമല പീഡനത്തിന് ഇരയായിരുന്നു എന്ന് കണ്ടെത്തല്. സിസ്റ്റര് അമലയെ (69) സെപ്തംബര് 17നാണ് ലിസ്യു കാര്മ്മല് കോണ്വെന്റിലെ കിടപ്പുമുറിയില് കൊല്ലപ്പെട്ട നിലയില് കണ്ടെത്തിയത്. ഇതു സംബന്ധിച്ച ഫോറന്സിക് റിപ്പോര്ട്ട് കഴിഞ്ഞദിവസം പാലാ പൊലീസിന് ലഭിച്ചു. റിപ്പോര്ട്ടിനെത്തുടര്ന്ന് പീഡനവിവരവും ചേര്ത്ത് അന്വേഷണ ഉദ്യോഗസ്ഥന് വീണ്ടും വിശദമായ റിപ്പോര്ട്ട് പാലാ കോടതിയില് സമര്പ്പിച്ചു. എന്നാല് സിസ്റ്റര് അമല കൊല്ലപ്പെട്ട ശേഷമാണോ അതിനുമുമ്പാണോ പീഡനത്തിന് ഇരയായതെന്ന കാര്യം വ്യക്തമാവണമെങ്കില് ഡി.എന്.എ റിപ്പോര്ട്ടുകൂടി ലഭിക്കേണ്ടതുണ്ടെന്ന് അന്വേഷണം സംഘത്തിലെ ഉന്നത ഉദ്യോഗസ്ഥന് പറഞ്ഞു. അന്വേഷണത്തില് കൊലയാളിയായ സതീഷ് ബാബുവിനെ ഹരിദ്വാറില് നിന്നും പൊലീസ് പിടികൂടിയിരുന്നു.സതീഷ് ബാബുവിനെ വിശദമായി ചോദ്യം ചെയ്തിരുന്നെങ്കിലും കന്യാസ്ത്രീയെ പീഡിപ്പിച്ച വിവരം ഇയാള് വെളിപ്പെടുത്തിയിരുന്നില്ല. ചേറ്റുതോട് എസ്.എച്ച് മഠത്തിലെ സിസ്റ്റര് ജോസ് മരിയയെ (81) കൊന്നതും സതീഷ് ബാബുതന്നെയെന്ന് പൊലീസ് കണ്ടെത്തിയിരുന്നു. ഇയാള് ഇക്കാര്യം സമ്മതിക്കുകയും ചെയ്തു. ഒരു വര്ഷം മുമ്പായിരുന്നു സിസ്റ്റര് ജോസ് മരിയയെ തലയ്ക്കടിച്ച് കൊലപ്പെടുത്തിയത്. പ്രായാധിക്യത്താല് കട്ടിലില്നിന്ന് താഴെവീണ് മരണം സംഭവിച്ചതാകാമെന്നായിരുന്നു മഠം അധികൃതര് കരുതിയിരുന്നത്. ഒരു സംശയവും ഇല്ലായിരുന്നതിനാല് മഠം അധികൃതര് കന്യാസ്ത്രീയുടെ മൃതദേഹം പോസ്റ്റുമോര്ട്ടം നടത്താതെ സംസ്കരിച്ചിരുന്നു. എന്നാല് സിസ്റ്റര് അമലയുടെ വധത്തെ തുടര്ന്നാണ് സിസ്റ്റര് ജോസ് മരിയയും വധിക്കപ്പെട്ടതാണെന്ന് കണ്ടെത്തിയത്. ഇതോടെ സിസ്റ്റര് ജോസ് മരിയയുടെ മൃതദേഹം പുറത്തെടുത്ത് പോസ്റ്റുമോര്ട്ടം നടത്തിയിരുന്നു. ഇതിന്റെ വിശദറിപ്പോര്ട്ട് പുറത്തുവന്നിട്ടില്ല. ഫോറന്സിക് റിപ്പോര്ട്ട് ലഭിച്ചാല് മാത്രമേ സിസ്റ്റര് ജോസ് മരിയയും പീഡനത്തിന് ഇരയായിരുന്നോ എന്ന കാര്യം വ്യക്തമാകുകയുള്ളൂ. എന്നാല് കൊല്ലപ്പെടുന്നതിനു മുമ്പ് സിസ്റ്റര് ജോസ് മരിയ ബഹളം വച്ചിരുന്നു. ഇതിനാല് പീഡന ശ്രമം പരാജയപ്പെട്ടിരുന്നോ എന്നും വ്യക്തമല്ലെന്ന് പൊലീസ് പറഞ്ഞു.
ഭാരമുള്ള വസ്തുകൊണ്ട് തലയ്ക്കടിച്ച് കൊലപ്പെടുത്തുകയെന്ന രീതിയാണ് സതീഷ് ബാബു അവലംബിച്ചിരുന്നത്. സ്വന്തം ഭാര്യയെയും സതീഷ് ബാബു ഇങ്ങനെ ആക്രമിച്ചിരുന്നു. ഇയാള് ഇപ്പോള് ജയിലില് കഴിയുകയാണ്. രണ്ട് കൊലപാതകങ്ങള് കൂടാതെ അഞ്ചു മഠങ്ങളില് കൊലപാതക ശ്രമങ്ങളും മഠങ്ങളിലും അനുബന്ധ സ്ഥാപനങ്ങളിലുമായി 14 മോഷണങ്ങളും സതീഷ് ബാബു നടത്തിയിരുന്നു. 21 കേസുകളാണ് സതീഷ് ബാബുവിനെതിരെ പൊലീസ് ചുമത്തിയിട്ടുള്ളത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
