ലാവ്ലിന് കേസ് രാഷ്ട്രീയപ്രേരിതം, ഗൂഢാലോചനയില് ആര്.എസ്.എസിനും ഉമ്മന്ചാണ്ടിക്കും പങ്ക് : കോടിയേരി ബാലകൃഷ്ണന്
എസ്.എന്.സി ലാവ്ലിന് കേസില് ഹൈക്കോടതിയില് സര്ക്കാര് പുതിയ ഹര്ജി നല്കിയത് രാഷ്ട്രീയപ്രേരിതമാണെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന് പറഞ്ഞു. ഇപ്പോഴത്തെ ഈ തീരുമാനത്തിന് പിന്നില് ആര്.എസ്.എസും ഉമ്മന്ചാണ്ടിയും ചേര്ന്നുള്ള ഗൂഢാലോചനയാണെന്നും കോടിയേരി വാര്ത്താ സമ്മേളനത്തില് പറഞ്ഞു.
സി.ബി.ഐയെ നിയന്ത്രിക്കുന്നത് ആര്.എസ്.എസാണ്. നിയമസഭാ തിരഞ്ഞെടുപ്പ് സമയത്ത് ലാവ്ലിന് വിഷയം പ്രചരണായുധമാക്കുകയെന്ന ലക്ഷ്യമാണ് സര്ക്കാരിനുള്ളത്. ലാവ്ലിന് കേസില് സി.പി.എം പോളിറ്റ്ബ്യൂറോ അംഗം പിണറായി വിജയനെ കുറ്റവിമുക്തനാക്കിയിട്ട് രണ്ടു വര്ഷവും രണ്ട് മാസവും കഴിഞ്ഞു. റിവിഷന് ഹര്ജി നല്കേണ്ടത്, കോടതി വിധി വന്ന് മൂന്നു മാസത്തിനുള്ളിലാണ്. ഇത്രയും കാലം സര്ക്കാര് ഉറക്കത്തിലായിരുന്നോ എന്നും കോടിയേരി ചോദിച്ചു.
ലാവ്ലിന് കേസ് കോണ്ഗ്രസ് ഉയര്ത്തിക്കൊണ്ടു വരുന്നത് പരിഭ്രാന്തി മൂലമാണ്. തിരഞ്ഞെടുപ്പ് കാലത്തെ യു.ഡി.എഫിന്റെ സ്ഥിരം തുറുപ്പ് ചീട്ടാണ് ലാവ്ലിന് വിഷയം. കേസ് ഇപ്പോള് ചര്ച്ചാ വിഷയമാക്കുന്നത് സോളാര് കേസില് നിന്ന് ശ്രദ്ധ തിരിക്കുന്നതിന് വേണ്ടിയാണ്. സോളാര് കേസ് അന്വേഷിക്കുന്ന ജസ്റ്റിസ് ശിവരാജന് കമ്മിഷന് നടത്തിയ പ്രസ്താവന സര്ക്കാരിനെതിരായ കുറ്റപത്രമാണ്. കേസില്, കമ്മിഷന് ഇടക്കാല റിപ്പോര്ട്ട് സമര്പ്പിക്കുകയും ആ റിപ്പോര്ട്ട് പ്രകാരം നടപടികള് സ്വീകരിക്കുകയും വേണമെന്നും കോടിയേരി ആവശ്യപ്പെട്ടു. കതിരൂര് മനോജ് വധക്കേസില് പി.ജയരാജനെ പ്രതി ചേര്ക്കാനുള്ള നീക്കം ആര്.എസ്.എസ് മേധാവിയുടെ നിര്ദ്ദേശ പ്രകാരമാണ്. കണ്ണൂരിലെത്തിയ ആര്.എസ്.എസ് മേധാവിയോട് അവിടത്തെ ചില ആര്.എസ്.എസുകാര് ഇക്കാര്യം ആവശ്യപ്പെട്ടിരുന്നുവെന്നും കോടിയേരി ആരോപിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
https://www.facebook.com/Malayalivartha
