ഭക്തലക്ഷങ്ങള്‍ വ്രതശുദ്ധിയോടെ കാത്തിരുന്ന മകരവിളക്ക് നാളെ. മുന്‍ദിവസങ്ങളെ അപേക്ഷിച്ച് വന്‍തോതില്‍ ഭക്തര്‍ മലകയറുന്നതോടെ പൊലീസ് വിന്യാസവും ശക്തമാക്കി. സന്നിധാനത്തും പുല്ലുേമട്, പാണ്ടിത്താവളം ഉള്‍പ്പടെയുള്ള മേഖലകളില്‍ കര്‍ശന സുരക്ഷാക്രമീകരണങ്ങള്‍ സജ്ജമാക്കി. 

ഇനി കാത്തിരിപ്പ് ആ ദിവ്യവെളിച്ചം കണ്‍നിറയെ കാണാനാണ്. നാളെ സന്ധ്യാദീപാരധനയൊടൊപ്പം പൊന്നമ്പലമേട്ടില്‍ മകരജ്യോതിസ്സും പിന്നാലെ ദീപവും ജ്വലിച്ചുയരും. സന്നിധാനത്തേയ്ക്ക് പ്രവഹിക്കുന്ന ഭക്തര്‍ കിട്ടാവുന്ന ഇടങ്ങളിലൊക്കെ നിരന്നുകഴിഞ്ഞു. നാളെ പുലര്‍ച്ചെ 1.27നാണ് മകരസംക്രമപൂജ. പൂജയ്ക്കുശേഷം അടയ്ക്കുന്ന നട പുലര്‍ച്ചെ മൂന്നുമണിക്ക് തുറക്കും. ഭക്തജനങ്ങളെ നിയന്ത്രിക്കാന്‍ നാലായിരം പൊലീസുകാരെയാണ് സന്നിധാനത്തും പരിസരത്തുമായി നിയോഗിച്ചിരിക്കുന്നത്. 

നാളെ ഉച്ചയ്ക്ക് പന്ത്രണ്ടുമണി മുതല്‍ തിരുവാഭരണം സന്നിധാനത്ത് എത്തുന്നതുവരെ ഭക്തര്‍ക്ക് പമ്പയില്‍നിന്ന് മലകയറാനാകില്ല. തിരുവാഭരണം ചാര്‍ത്തിയതിനുശേഷമേ കടത്തിവിടൂ. പുല്‍മേട്ടിലേക്കെത്തുന്ന ഭക്തര്‍ക്കായി കോഴിക്കാനം വണ്ടിപ്പെരിയാര്‍ റൂട്ടില്‍ 50 കെ.എസ്.ആര്‍.ടി.സി ബസുകള്‍ സര്‍ക്കുലര്‍ സര്‍വീസ് നടത്തും. വിവിധ റൂട്ടുകളില്‍ ഒന്നരക്കിലോമീറ്റര്‍ ഇടവിട്ട് റിക്കവറി വാഹനങ്ങളും ആംബുലന്‍സും സജ്ജീകരിക്കും. ഭക്തരുടെ മടക്കയാത്രയ്ക്കായി പമ്പയില്‍നിന്ന് കെ.എസ്.ആര്‍.ടി.സിയുടെ ചെയിന്‍ സര്‍വീസുകളുമുണ്ടാകും. മകരവിളക്ക് ദര്‍ശനത്തിനുള്ള പരമ്പരാഗതമല്ലാത്ത പ്രദേശങ്ങളിലും ഇത്തവണ സുരക്ഷ ഒരുക്കാനാണ് പൊലീസിന്റെ ശ്രമം. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha