തൊഴുകൈകളും ശരണമന്ത്രങ്ങളും അലിഞ്ഞ വലിയൊരു പ്രവാഹം ശബരിമല ഗിരിശൃംഗങ്ങളില്‍ തെളിയുന്ന മഹാജ്യോതിയുടെ താഴ്‌വരയില്‍ ഇന്നു സായൂജ്യമടയും. സന്ധ്യയ്ക്ക് പൊന്നമ്പലമേട് കൊളുത്തിവയ്ക്കുന്ന മകരസംക്രമദീപം തൊഴുത് അയ്യപ്പദര്‍ശനത്തിന്റെ നിര്‍വൃതി നുകര്‍ന്ന് ആ പ്രവാഹം തിരിച്ചൊഴുകും. ഒരു വര്‍ഷത്തെ കാത്തിരിപ്പ്, രണ്ടു മാസത്തെ ദര്‍ശനഭാഗ്യം. ഇന്ന് അതിന്റെ പാരമ്യമാണ്.
കാഠിന്യങ്ങള്‍ കടന്നു കയറിച്ചെന്നാല്‍ മാത്രം സിദ്ധിക്കുന്ന ദൈവസാക്ഷാത്കാരത്തിന്റെ വിളക്കുഴിയലായി മകരജ്യോതി ഭക്തഹൃദയങ്ങളില്‍ പിന്നെയും പ്രകാശം പരത്തും. തിരുവാഭരണവിഭൂഷിതനായ അയ്യപ്പന്റെ ചൈതന്യം എല്ലാറ്റിനും മീതേ സുവര്‍ണ തേജസാകും. മകരജ്യോതി കണ്ടു കണ്ണും മനസും ഉടലും ധന്യമാക്കാന്‍ ശരണം ചൊല്ലി കഴിയുന്നവര്‍ എത്രയാണ്? പുണ്യനദിയിലെ ഓളങ്ങള്‍ക്കു കണക്കില്ലാത്തതുപോലെ, ലക്ഷങ്ങള്‍ എന്നതു സാമാന്യമായൊരു കണക്കു മാത്രം.
പൂങ്കാവനമൊന്നായി ഉതിര്‍ത്ത ശരണംവിളിയായിരുന്നു നാളുകളായി ശബരിമലയുടെ സ്വരം. പമ്പയില്‍ നിന്നു മുകളിലേ ക്കൊഴുകിയ ഭക്തനദിയുടെ ആരവം. സന്നിധാനം നടയടച്ചാലും പിന്നെയും ഹൃദയനടകള്‍ തുറന്നിരിക്കും. അയ്യപ്പനാമങ്ങള്‍ ഉരുക്കഴിച്ചുകൊണ്ട്.
പമ്പവിളക്കും പമ്പസദ്യയും പകര്‍ന്ന ധന്യതയില്‍ ഇന്നലെത്തന്നെ അസംഖ്യം ഭക്തര്‍ മകരജ്യോതി ദര്‍ശനത്തിനായി സന്നിധാനത്തും പരിസരങ്ങളിലുമെത്തി തമ്പടിച്ചിരുന്നു. ആ ഒഴുക്ക് തുടരുകയാണ്. മകരസംക്രമ പൂജയ്ക്കായി, ധനുരാശിയില്‍ നിന്ന് മകരം രാശിയിലേക്ക് സൂര്യന്‍ സംക്രമിക്കുന്ന സമയമായ പുലര്‍ച്ചെ ഒന്നിനു നട പ്രത്യേകം തുറന്നു. 1.27ന് അഭിഷേകം. കവടിയാര്‍ കൊട്ടാരത്തില്‍നിന്ന് പ്രത്യേക ദൂതന്‍ വശം കൊടുത്തയച്ച നെയ്‌ത്തേങ്ങയിലെ നെയ്യ് കൊണ്ടായിരുന്നു അഭിഷേകം. പൂജകള്‍ പൂര്‍ത്തിയാക്കി രണ്ടു മണിയോടെ തന്ത്രി കണ്ഠര് മഹേഷ് മോഹനരുടെ കാര്‍മികത്വത്തില്‍ നടയടച്ചു. നിത്യപൂജകള്‍ക്കായി മൂന്നിനു നട വീണ്ടും തുറന്നു. നിര്‍മാല്യവും ശേഷം നെയ്യഭിഷേകവും. അഭിഷേകം രാവിലെ ഒന്‍പതു വരെ തുടരും.
ഉച്ചപൂജയ്ക്കു ശേഷം ഒരു മണിക്കു വീണ്ടും നടയടയ്ക്കും. പിന്നെ ഭക്തര്‍ക്കു ദര്‍ശനവും പതിനെട്ടാംപടി കയറ്റവും അനുവദിക്കില്ല. അഞ്ചിനാണു പിന്നെ നട തുറക്കുക. തുടര്‍ന്ന് തിരുവാഭരണത്തെ സ്വീകരിക്കുന്നവരെ പൂമാലകള്‍ അണിയിച്ചു ശരംകുത്തിയിലേക്ക് അയയ്ക്കും. ദേവസ്വം ബോര്‍ഡ്, അയ്യപ്പസേവാ സംഘം പ്രതിനിധികളാണ് തിരുവാഭരണത്തെ സ്വീകരിക്കുന്നത്. തിരുവാഭരണം പതിനെട്ടാം പടി കയറിയെത്തുമ്പോള്‍ ദേവസ്വം ബോര്‍ഡ് പ്രസിഡന്റും അംഗങ്ങളും മറ്റും ചേര്‍ന്നു സ്വീകരിക്കും. സോപാനത്തില്‍നിന്ന് തന്ത്രിയും മേല്‍ശാന്തി എസ്. ഇ. ശങ്കരന്‍ നമ്പൂതിരിയും ചേര്‍ന്നു സ്വീകരിച്ച് ശ്രീകോവിലിലേക്കു കൊണ്ടുപോകും.
തിരുവാഭരണം ചാര്‍ത്തി ദീപാരാധന നടക്കുമ്പോള്‍ പൊന്നമ്പലമേട്ടില്‍ മകരജ്യോതി തെളിയും. അതിനു ശേഷമേ ഭക്തരെ വീണ്ടും പതിനെട്ടാം പടി കയറാന്‍ അനുവദിക്കൂ. ജ്യോതിദര്‍ശനം കഴിഞ്ഞു മടങ്ങുന്നവരെ തിരക്കൊഴിവാക്കി ബെയ്‌ലി പാലത്തിലൂടെ അയയ്ക്കാന്‍ ക്രമീകരണം ചെയ്തിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha