വാഹനാപകടത്തില്‍പ്പെടുന്നത് ആരായാലും അവര്‍ക്ക് അത് ജീവിതത്തില്‍ മറക്കാനാകാത്ത അനുഭവമായിരിക്കും. പഴകുറ്റി സ്വദേശി ശ്രീലതയ്ക്കും ഇന്നലെ ഉണ്ടായ വാഹനാപകടം ജീവിതത്തില്‍ മറക്കാനാകാത്ത അനുഭവമായി.

എന്നാല്‍ സഹിക്കാനാവാത്ത വേദന കൊണ്ടൊന്നുമല്ല ശ്രീലതയ്ക്കത് മറക്കാനാവാത്തതായത്. അപകടത്തില്‍ പെട്ട് വീണ ശ്രീലതയെ റോഡില്‍ നിന്ന് താങ്ങിയെടുത്തത് കേന്ദ്രമന്ത്രി സ്മൃതി ഇറാനിയായിരുന്നു എന്ന കാരണം കൊണ്ടാണ്.

ഐസര്‍ കാമ്പസ് ഉദ്ഘാടനത്തിന് വരികയായിരുന്ന സ്മൃതി ഇറാനിക്കും മുഖ്യമന്ത്രിക്കും പോകാനായി പൊലീസ് ഗതാഗതം നിയന്ത്രിക്കുന്നതിനിടയിലാണ് നെടുമങ്ങാട് വിതുര റോഡില്‍ പഴകുറ്റിയില്‍ ശ്രീലത ടെമ്പോ തട്ടി വീണത്.

പിടഞ്ഞെഴുന്നേല്‍ക്കാന്‍ ശ്രമിക്കുന്നതിനിടയില്‍ വാഹനവ്യൂഹം ഇരമ്പി പാഞ്ഞുവന്നു. റോഡില്‍ ശ്രീലത കിടക്കുന്നത് കണ്ട് വാഹനം നിറുത്തി ഇറങ്ങിവന്ന സ്മൃതി ഇറാനി അവരെ താങ്ങിയെടുത്തു. ശ്രീലതയ്ക്ക് വെള്ളം കൊടുക്കാനും ഉടന്‍ ആശുപത്രിയിലെത്തിക്കാനും സ്മൃതി ഇറാനി നിര്‍ദ്ദേശിച്ചു.

പൊലീസ് വാഹനത്തില്‍ നെടുമങ്ങാട് സര്‍ക്കാര്‍ ആശുപത്രിയിലെത്തിച്ച ശ്രീലതയുടെ പരിക്ക് ഗുരുതരമായിരുന്നില്ല. അത്യാവശ്യ ചികിത്സയ്ക്ക് ശേഷം ഡിസ്ചാര്‍ജ് ചെയ്തു. എന്നാലും മറക്കാനാവാത്ത അപകടാനുഭവമായി ശ്രീലതയ്ക്ക് അത്. നാട്ടിലും വാര്‍ത്തയിലും അവര്‍ പൊടുന്നനെ താരവുമായി.

സ്മൃതിഇറാനിയുടെ വാഹനവ്യൂഹം നിറുത്തിയത് കണ്ട് പിന്നാലെ വരികയായിരുന്ന മുഖ്യമന്ത്രി ഉമ്മന്‍ചാണ്ടിയുടെ വാഹനവ്യൂഹവും നിറുത്തി. ഉത്കണ്ഠയോടെ മുഖ്യമന്ത്രി കാറില്‍ നിന്നിറങ്ങി നടന്നുവന്നു. അപ്പോഴേക്കും ശ്രീലതയുമായി പൊലീസ് വാഹനം ആശുപത്രിയിലേക്ക് കുതിച്ചിരുന്നു.

സംഭവം സുരക്ഷാ വീഴ്ചയാണെന്നൊക്കെ പറയാമെങ്കിലും കേന്ദ്രമന്ത്രിയുടെ അപ്രതീക്ഷിത പെരുമാറ്റത്തില്‍ പൊലീസും എക്‌സ്‌കോര്‍ട്ടുകാരും ആദ്യം അമ്പരന്നു. ഉടനേ കര്‍ത്തവ്യനിരതരായ പൊലീസ് കേന്ദ്രമന്ത്രിയുമായി യാത്ര തുടര്‍ന്നു. സ്മൃതി ഇറാനിയുടെ വാഹനത്തിന് പിന്നില്‍ മറ്റൊരു വണ്ടിയില്‍ ബി.ജെ.പി മുന്‍ സംസ്ഥാന അദ്ധ്യക്ഷന്‍ വി. മുരളീധരന്‍, ജില്ലാ പ്രസിഡന്റ് എസ്. സുരേഷ് എന്നിവരുമുണ്ടായിരുന്നു. ഒരു മണിക്കൂറോളം വൈകിയാണ് കേന്ദ്രമന്ത്രി ചടങ്ങിനെത്തിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha