അരളിപ്പൂവില് നിന്നുള്ള വിഷമേറ്റ് യുവതി മരിച്ചുവെന്ന സംശയം; നിർണായക തീരുമാനവുമായി തിരുവിതാംകൂര് ദേവസ്വം ബോര്ഡ്; ക്ഷേത്രങ്ങളില് അരളിപ്പൂവ് ഒഴിവാക്കും!!!!
അരളിപ്പൂവില് വിഷാംശം ഉണ്ട് എന്നുള്ളത് ശാസ്ത്രലോകവും അംഗീകരിച്ച വസ്തുതയാണ്.യുകെയിലേക്ക് പോകാന് വിമാനത്താവളത്തിലെത്തി കുഴഞ്ഞുവീണ് മരിച്ച നഴ്സ് സൂര്യ സുരേന്ദ്രന്റെ മരണം ഇപ്പോള് ദേവസ്വം ബോര്ഡിന്റെ കണ്ണു തുറപ്പിച്ചിരിക്കുകയാണ്.
അരളിപ്പൂവില് നിന്നുള്ള വിഷമേറ്റ് യുവതി മരിച്ചുവെന്ന സംശയം ശക്തമാകുന്ന പശ്ചാത്തലത്തില് നിര്ണായക തീരുമാനവുമായി തിരുവിതാംകൂര് ദേവസ്വം ബോര്ഡ്. ഇനി മുതല് തിരുവിതാംകൂര് ദേവസ്വം ബോര്ഡ് ക്ഷേത്രങ്ങളില് അരളിപ്പൂവ് ഒഴിവാക്കും. പൂജയ്ക്ക് ഉപയോഗിക്കുന്നതില് തടസമില്ല. എന്നാല് നിവേദ്യസമര്പ്പണം, അര്ച്ചന, പ്രസാദം തുടങ്ങിയവയ്ക്ക് ഇവ ഉപയോഗിക്കില്ല.
തിരുവതാംകൂർ ദേവസ്വം പ്രസിഡന്റ് പി എസ് പ്രശാന്താണ് ഇക്കാര്യം അറിയിച്ചത്. അരളിക്ക് പകരം പിച്ചിയും തുളസിയുമെല്ലാം ഉപയോഗിക്കും. സമൂഹത്തില് നിലവില് ആകെ പടര്ന്നിട്ടുള്ള ആശങ്ക പരിഗണിച്ചാണ് ശ്രദ്ധേയമായ തീരുമാനം. നാളെ മുതല് തന്നെ തീരുമാനം പ്രാബല്യത്തില് വരും എന്നാണ് അറിയിച്ചിരിക്കുന്നത്.
ആലപ്പുഴ ഹരിപ്പാട് സ്വദേശി സൂര്യ സുരേന്ദ്രന്റെ മരണത്തിന് പിന്നാലെയാണ് അരളിപ്പൂവിലെ വിഷം വലിയ ചര്ച്ചയായത്. ഫോൺ ചെയ്യുന്നതിനിടെ മുറ്റത്തുള്ള അരളിച്ചെടിയില് നിന്ന് പൂവോ ഇലയോ മറ്റോ ഇവര് അബദ്ധത്തില് കഴിച്ചു, ഇതോടെയാണ് മരണം സംഭവിച്ചതെന്നാണ് സംശയം.
https://www.facebook.com/Malayalivartha