ആദിവാസി മേഖലയില് കാന്സര് രോഗം വര്ദ്ധിക്കുന്നതായി റിപ്പോര്ട്ട
വയനാട്ടിലെ ആദിവാസി മേഖലയിലെ യുവജനങ്ങള്ക്കിടയില് കാന്സര് രോഗം വര്ദ്ധിക്കുന്നതായി റിപ്പോര്ട്ടുകള്. ജില്ലയിലെ കാന്സര് കെയര് സെന്ററിലെത്തുന്ന ആദിവാസികളായ രോഗികളില് ഭൂരിഭാഗവും മൂപ്പത് വയസിന് താഴെമാത്രം പ്രായമുള്ളവരാണ്. പുകയിലയും അടയ്ക്കയും ചേര്ത്തുള്ള മുറുക്കും താഴ്ന്ന ജീവിത നിലവാരവുമാണ് രോഗത്തിന് കാരണം.
നല്ലൂര്നാടുള്ള കാന്സര് കെയര് സെന്ററിലെത്തുന്ന രോഗികളില് പകുതിയലധികവും ആദിവാസി ജനവിഭാഗമാണ്. ഇതില് പ്രായമായവര് വളരെ ചുരുക്കവും. കുട്ടികളായിരിക്കുമ്പോള് തുടങ്ങുന്ന പുകയില ഉപയോഗമാണ് രോഗത്തിന്റെ പ്രധാന കാരണം. വായില് വരുന്ന കാന്സറാണ് യുവജനങ്ങളില് കൂടുതലായും കാണുന്നത്. ഇതിനുപുറമെ യുവതികളില് ഗര്ഭാശയ സംബന്ധമായ രോഗങ്ങളും കണ്ടെത്തിയിട്ടുണ്ട്. സ്കൂള് കുട്ടികളുടെ വായിലും കാന്സര് രോഗത്തിന്റെ ലക്ഷണങ്ങള് വ്യാപകമായി കാണുന്നുണ്ട്.
പരമ്പരാഗതമായി അടയ്ക്കയും വെറ്റിലയും ചുണ്ണാമ്പും പുകയിലയും ചേര്ത്താണ് ആദിവാസികള് മുറുക്കുന്നത്. ഇതില് വെറ്റില ഒഴികെയുള്ളവ കാന്സര് രോഗത്തിന് വഴിവയ്ക്കുന്നതാണ്. മാനന്തവാടി ജില്ലാശുപത്രിയിലെ ദന്തല് വിഭാഗത്തില് കഴിഞ്ഞവര്ഷംമാത്രം ചികില്സയ്ക്കെത്തിയവരില് 98 പേര്ക്ക് കാന്സര് രേഗം സ്ഥിരീകരിച്ചിരുന്നു. ഇതില് ഭൂരിഭാഗവും ആദിവാസികളായിരുന്നു. ബോധവല്ക്കരണവും ജില്ലയില്തന്നെ കാന്സര് രോഗം ചികില്സിക്കാനുള്ള സൗകര്യവുമാണ് രോഗ നിയന്ത്രണത്തിനായി വിദഗ്ദ്ധര് ചൂണ്ടിക്കാണിക്കുന്ന പരിഹാര മാര്ഗങ്ങള്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
