ഭക്തരെ ആനന്ദനിര്‍വൃതിയില്‍ ആറാടിച്ചു മാളികപ്പുറത്തു ഗുരുതി നടന്നു. അയ്യപ്പന്മാരുടെ ദര്‍ശനം പൂര്‍ത്തിയായി. തീര്‍ഥാടനത്തിനു സമാപനം കുറിച്ച് ഇന്നു നട അടയ്ക്കും. ദോഷപരിഹാരത്തിനും മലദൈവങ്ങളുടെ പ്രീതിക്കുമായി നടത്തുന്ന ഗുരുതിക്കുള്ള ഒരുക്കങ്ങള്‍ മാളികപ്പുറത്തു വൈകിട്ടു നട തുറന്നതോടെ തുടങ്ങി.

കുരുത്തോലകളും പൂമാലകളും കൊണ്ട് അലങ്കരിച്ച് അതിനു മധ്യത്തിലാണ് കളമൊരുക്കിയത്. വാഴപ്പോളകളില്‍ കുരുത്തോല കുത്തി അതില്‍ വര്‍ണപ്പൊടികള്‍ കൊണ്ടു കളമെഴുതി. പന്തം ഉള്‍പ്പെടെയുള്ള ഒരുക്കങ്ങളും വച്ചു. അയ്യപ്പസന്നിധിയിലെ അത്താഴപൂജ കഴിഞ്ഞതോടെ കളത്തിലെ നിലവിളക്കു തെളിഞ്ഞു. നാല് അതിര്‍ത്തിയിലെയും മലദൈവങ്ങള്‍ക്കു വിളക്കുകൊളുത്തി അതിനു മുന്നില്‍ ദക്ഷിണവച്ചു സാന്നിധ്യത്തിനായി ക്ഷണിച്ചു.

പിന്നീടായിരുന്നു കര്‍മികളായ റാന്നി അങ്ങാടി കുന്നയ്ക്കാട്ട് ദേവീ വിലാസത്തില്‍ ജയകുമാര്‍, അജിത്കുമാര്‍ എന്നിവരുടെ കാര്‍മികത്വത്തില്‍ ഗുരുതി നടത്തിയത്. തീര്‍ഥാടകരുടെ ദര്‍ശനം അത്താഴപൂജയോടെ പൂര്‍ത്തിയായി. സന്ധ്യക്കു മുന്‍പ് പമ്പയില്‍ എത്തിയവരെ മാത്രമെ സന്നിധാനത്തേക്കു കടത്തിവിട്ടുള്ളു. 64 ദിവസം നീണ്ട മണ്ഡല മകരവിളക്കു തീര്‍ഥാടനത്തിനു സമാപനം കുറിച്ച് ഇന്നു പുലര്‍ച്ചെ 6.30ന് നട അടയ്ക്കും. ആശൂലമായതിനാല്‍ മുന്‍വര്‍ഷങ്ങളിലേതു പോലെ രാജപ്രതിനിധിയുടെ ദര്‍ശനം ഇല്ല. രാജപ്രതിനിധിക്കുള്ള ഔദ്യോഗികമായ താക്കോല്‍ കൈമാറ്റമോ പണക്കിഴി സമര്‍പ്പണമോ ഇല്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha