ചന്ദ്രബോസിനെ കൊന്ന കുറ്റത്തിനു ജീവപര്യന്തം ശിക്ഷിക്കപ്പെട്ട മുഹമ്മദ് നിസാമിന്റെ ഭാര്യ അമല്‍ നിസാം ചന്ദ്രബോസിന്റെ ഭാര്യ ജമന്തിയുടെ മുന്നില്‍ പൊട്ടിക്കരഞ്ഞു. നിസാമിന്റെ ജയില്‍ ശിക്ഷയുമായി ബന്ധപ്പെട്ട വ്യക്തത വന്ന ശേഷമായിരുന്നു ഈ കൂടിക്കാഴ്ച. വിധിക്ക് ശേഷം കോടതി പരിസരത്ത് നിന്ന ജമന്തിക്കടുത്തേക്ക് അമലും നിസാമിന്റെ പിതൃ സഹോദരന്‍ അബ്ദുല്‍ ഖാദറും ആശ്വാസവാക്കുകളുമായി എത്തുകയായിരുന്നു. അപ്പോഴാണ് ഇരുവരും കെട്ടിപ്പിടിച്ച് പൊട്ടിക്കരഞ്ഞത്.
എല്ലാ ബഹുമാനത്തോടെയും ഇരുവരും മനസ്സ് തുറന്നു. എന്റെ ഇക്കായോട് പൊറുക്കണം, കുടുംബത്തെ ശപിക്കരുത് എന്ന അമലിന്റെ വാക്കുകള്‍ക്ക് മുന്നില്‍ ജമന്തിപൊട്ടിക്കരഞ്ഞു.
എല്ലാ ദുഃഖവും കടിച്ചൊതുക്കി അമലിനെ ആശ്വസിപ്പിക്കാനാണ് ചന്ദ്രബോസിന്റെ ഭാര്യ ജമന്തി ശ്രമിച്ചത്. മോളെ സമാധാനിക്കണമെന്ന നിസാമിന്റെ പിതൃസഹോദരന്‍ അബ്ദുല്‍ ഖാദറിനോട് ജമന്തി ഇങ്ങനെ പറഞ്ഞു.'ഉപ്പാ.. ഞങ്ങളോടു വിഷമം തോന്നരുത്.. ഞങ്ങളുടെ ഭാഗത്തു നിന്ന് ഒന്നാലോചിച്ചു നോക്ക്യേ...'. നീയൊന്നു കരയാതിരിക്ക് മോളേ.. ഞാനൊരു വയസനാണ്. എന്റെ പ്രഷര്‍ കൂട്ടരുത്..''
പിന്നെ ജമന്തിയുടെ തോളില്‍ കൈവച്ചു. മകളോടുള്ള വാല്‍സല്യത്തോടെ നിറുകയില്‍ ചുംബിച്ചു. കണ്ണീര്‍ തുടച്ചു. ചന്ദ്രബോസ് ആശുപത്രിയില്‍ കിടന്നപ്പോള്‍ അനുഭവിച്ച വേദനയും ഭക്ഷണം കഴിക്കാന്‍ വായ തുറന്നപ്പോള്‍ മൂക്കില്‍ നിന്നു പഴുപ്പു പുറത്തുവന്നതുമൊക്കെ എണ്ണിഎണ്ണി പറഞ്ഞു. എണീക്കാന്‍ വയ്യാതെ, പ്രതികരിക്കാനാവാതെ മര്‍ദനമേറ്റുകൊണ്ടിരിക്കുന്ന ബോസേട്ടന്റെ രംഗം മനസ്സില്‍ നിന്നു പോവുന്നില്ലെന്നും ജമന്തി പറഞ്ഞു. ഇതെല്ലാം കേട്ട് അമലും കരയുന്നുണ്ടായിരുന്നു.
പലതവണ ആശ്വസിപ്പിച്ച അബ്ദുല്‍ ഖാദറിനോട് ജമന്തി പറഞ്ഞു. 'എനിക്കും അച്ഛനില്ല. ബോസേട്ടനും അച്്ഛനില്ല. കോടതിയില്‍ വരുമ്പോള്‍ നിങ്ങള്‍ ഇരിക്കാന്‍ ഇടമൊക്കെ പലതവണ ഒരുക്കി തന്നിട്ടുണ്ട്. അതുകൊണ്ടാണ് നിങ്ങളോട് എല്ലാം പറയുന്നത്... ഞങ്ങളോടു വിഷമം തോന്നരുത്.''ജമന്തി പറഞ്ഞു. വലിയ നഷ്ടത്തിനിടെയിലും ഇരുകുടുംബങ്ങളുടേയും സംഗമം ആരും പ്രതീക്ഷിച്ചിരുന്നില്ല. വികാരം മുറ്റിയ രംഗങ്ങളാണ് അവിടെ അരങ്ങേറിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha