റബര്‍ വിലയിടിവിനെതിരെ കേരള കോണ്‍ഗ്രസ് എം ജനറല്‍ സെക്രട്ടറി ജോസ് കെ.മാണി എം.പി നടത്തുന്ന നിരാഹാരസമരം ആറാം ദിവസത്തിലേക്ക് കടന്നു. ജോസ് കെ.മാണിയുടെ ആരോഗ്യനില ഗുരുതരമായി. കേന്ദ്രം ഇന്നുതന്നെ ഇടപെട്ടേക്കാമെന്നാണ് സൂചന.
ഇന്ന് രാവിലെ പാര്‍ട്ടി ലീഡര്‍ കെ.എം.മാണി സമരപ്പന്തലിലെത്തി ജോസ് കെ.മാണിയെ സന്ദര്‍ശിച്ചു. ആരോഗ്യം മോശമായതിനെ തുടര്‍ന്ന് ആശുപത്രിയിലേക്ക് നീക്കാന്‍ പാര്‍ട്ടി നേതാക്കളുമായി അദ്ദേഹം ചര്‍ച്ച നടത്തി. എന്നാല്‍ റബര്‍ വിലയിടിവിന്റെ കാര്യത്തില്‍ കേന്ദ്രം ഇടപെടാതെ നിരാഹാരസമരം അവസാനിപ്പിക്കില്ല എന്ന വാശിയിലാണ് എം.പി. ഉന്നയിച്ച ആവശ്യങ്ങളില്‍ വ്യക്തമായ തീരുമാനം ഉണ്ടാകുമെന്ന പ്രതീക്ഷയില്‍ തന്നെയാണ് ജോസ് കെ.മാണി. എന്നാല്‍, പ്രശ്‌നത്തില്‍ മുഖ്യമന്ത്രി ഉമ്മന്‍ ചാണ്ടി ഇടപെട്ടേക്കും എന്നറിയുന്നു. മുഖ്യമന്ത്രി കെ.എം.മാണിയുമായി ഇന്നലെ ടെലിഫോണില്‍ സംസാരിച്ചിരുന്നു. എന്നാല്‍ ഇക്കാര്യം പാര്‍ട്ടിവൃത്തങ്ങള്‍ സ്ഥിരീകരിച്ചിട്ടില്ല. സംസ്ഥാന സര്‍ക്കാര്‍ എന്തെങ്കിലും ഉറപ്പു നല്കിയാല്‍ സമരം അവസാനിപ്പിക്കാനും സാദ്ധ്യതയേറെയാണ്.
ജോസ് കെ.മാണിയുടെ ആരോഗ്യനില മോശമായതിനെ തുടര്‍ന്ന് അദ്ദേഹത്തെ ആശുപത്രിയിലേക്ക് നീക്കണമെന്ന് ഇന്നലെതന്നെ മെഡിക്കല്‍ ബോര്‍ഡ് വ്യക്തമാക്കിയിരുന്നു. റബര്‍ ഇറക്കുമതി നിരോധനം സംബന്ധിച്ച് കേന്ദ്ര സര്‍ക്കാര്‍ കൈക്കൊണ്ട തീരുമാനം കേരള കോണ്‍ഗ്രസ് എമ്മിന് അല്പം ആശ്വാസം നല്കിയിട്ടുണ്ട്. കൂടുതല്‍ ശക്തമായ നടപടികള്‍ കേന്ദ്രത്തില്‍നിന്ന് ഉണ്ടാവുമെന്ന ശുഭപ്രതീക്ഷയിലാണ് പാര്‍ട്ടി ചെയര്‍മാനും അനുയായികളും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha