റബര്‍ മേഖലയിലെ പ്രതിസന്ധി പരിഹരിക്കുക, കാര്‍ഷിക വിളകളുടെ തകര്‍ച്ച പിടിച്ചു നിര്‍ത്തുക തുടങ്ങിയ ആവശ്യങ്ങള്‍ ഉന്നയിച്ചു കേരള കോണ്‍ഗ്രസ് എം ജനറല്‍ സെക്രട്ടറി ജോസ് കെ.മാണി എംപി നടത്തുന്ന സമരം ആറാം ദിവസത്തിലേയ്ക്കു കടന്നതോടെ എംപിയുടെ ആരോഗ്യ സ്ഥിതി ആശങ്കാജനകമായി. വൈദ്യ പരിശോധനാ സംഘം പരിശോധിച്ചു നല്‍കുന്ന റിപ്പോര്‍ട്ടിന്റെ അടിസ്ഥാനത്തില്‍ എംപിയെ ആശുപത്രിയിലേയ്ക്കു മാറ്റിയേക്കുമെന്ന സൂചനകള്‍ ജില്ലാ ഭരണകൂടം നല്‍കുന്നുണ്ട്. നിരാഹാര സമരം അനുഷ്ടിക്കുന്ന എംപിയുടെ ജീവന്‍ രക്ഷിക്കാന്‍ ഇദ്ദേഹത്തെ അറസ്റ്റ് ചെയ്തു ആശുപത്രിയില്‍ പ്രവേശിപ്പിക്കുമെന്നു ജില്ലാ കലക്ടര്‍ യു.വി ജോസ് അറിയിച്ചിട്ടുണ്ട്.
എന്നാല്‍, സമരം അവസാനിപ്പിക്കില്ലെന്നും അറസ്റ്റിനു വഴങ്ങില്ലെന്നുമുള്ള നിലപാടില്‍ തന്നെയാണ് ജോസ് കെ.മാണി. കേന്ദ്ര സര്‍ക്കാരിന്റെ ഭാഗത്തു നിന്നു അനുകൂലമായ ഇടപെടല്‍ ഉണ്ടായ സാഹചര്യത്തില്‍, ഉന്നയിക്കുന്ന ആവശ്യങ്ങളില്‍ പൂര്‍ണ തോതിലുള്ള അംഗീകാരം ലഭിക്കണമെന്നാണ് ജോസ് കെ.മാണി ഉന്നയിക്കുന്ന ആവശ്യം. തുറമുഖങ്ങളിലൂടെയുള്ള റബര്‍ ഇറക്കുമതി നിരോധിച്ചതും, സ്വാഭാവിക റബറിന്റെ ഇറക്കുമതിക്കു പൂര്‍ണമായി നിരോധനം ഏര്‍പ്പെടുത്തിയതും സമരത്തിന്റെ വിജയത്തെയാണ് സൂചിപ്പിക്കുന്നത്. ഈ സാഹചര്യത്തില്‍ കേരള കോണ്‍ഗ്രസിനു അനൂകൂലമായ കൂടുതല്‍ തീരുമാനങ്ങള്‍ കേന്ദ്ര സര്‍ക്കാരിന്റെ ഭാഗത്തു നിന്നും ഉണ്ടാകുമെന്നും പ്രതീക്ഷിക്കുന്നു.
ആറാം ദിവസത്തിലേയ്ക്കു സമരം കടന്നതോടെ സമൂഹത്തിന്റെ നാനാതുറകളില്‍ നിന്നുള്ള പ്രമുഖര്‍ സമരപ്പന്തലിലേയ്ക്കു ഒഴുകിയെത്തുകയാണ്. സിനിമാ മേഖലയില്‍ നിന്നും സുരേഷ് ഗോപിയും ലാലു അലക്‌സും സമരത്തിന് പിന്തുണയുമായി ഇന്നലെ എത്തി.ഇന്ന് കേരള കോണ്‍ഗ്രസിന്റെ ബാനറില്‍ ജയിച്ച തദ്ദേശസ്വയംഭരണ സ്ഥാപനങ്ങളിലെ അംഗങ്ങളും, ജനപ്രതിനിധികളും സഹകരണ ബാങ്ക് ഭരണസമിതി അംഗങ്ങളും സമപന്തലില്‍ ജോസ് കെ.മാണിക്കു അഭിവാദ്യം അര്‍പ്പിച്ചു ഉപവസിക്കും. കേരള കോണ്‍ഗ്രസ് ജില്ലാ കമ്മിറ്റികളുടെയും , പോഷക സംഘടനകളുടെയും നേതൃത്വത്തില്‍ വിവിധ ജില്ലാ കേന്ദ്രങ്ങളിലും ഉപവാസ സമരം സംഘടിപ്പിച്ചിട്ടുണ്ട്. ഇതു കൂടാതെയാണ് കോട്ടയം നഗരത്തില്‍ നടത്തുന്ന പ്രകടനങ്ങളും. കേരള കോണ്‍ഗ്രസ് മണ്ഡലം ബ്ലോക്ക് കമ്മിറ്റികളും യൂത്ത് ഫ്രണ്ടും നഗരത്തില്‍ വിവിധ കേന്ദ്രങ്ങളില്‍ പ്രകടനം നടത്തുന്നുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha