കഷ്ടകാലമെങ്കില്‍ പട്ടി കടിക്കണെ എന്നുവേണമെങ്കില്‍ പറയാം. തെരുവു നായ കടിച്ചാല്‍ കുട്ടികള്‍ക്ക് ഇനി നഷ്ടപരിഹാരമായി സര്‍ക്കാര്‍ 5000 രൂപ നല്‍കണം. കടിയുടെ വ്യാപ്തിക്കനുസരിച്ച് കൂടുതല്‍ തുകയും കുട്ടികള്‍ക്കു കിട്ടും. തെരുവു നായയുടെ കടിയേറ്റു ചികിത്സ തേടിയെത്തുന്ന കുട്ടികള്‍ക്ക് സ്വകാര്യ ആശുപത്രികളില്‍ നിന്നു സൗജന്യ ചികിത്സയും സര്‍ക്കാര്‍ ലഭ്യമാക്കണമെന്നും കുട്ടികളുടെ സുരക്ഷയ്ക്കു ഭീഷണിയായി നായ്ക്കളെ അലക്ഷ്യമായി അഴിച്ചു വിടുന്നവരെ ഇന്ത്യന്‍ ശിക്ഷാ നിയമം 324ാം വകുപ്പു പ്രകാരം ശിക്ഷിക്കണമെന്നും സംസ്ഥാന ബാലാവകാശ സംരക്ഷണ കമ്മിഷന്‍ ശുപാര്‍ശ ചെയ്തു.
കടിച്ച തെരുവു നായയ്ക്ക് ഉടമസ്ഥനുണ്ടെങ്കില്‍ റവന്യു റിക്കവറിയിലൂടെ നഷ്ടപരിഹാരം ഈടാക്കാം. 18 വയസിനു താഴെയുള്ള കുട്ടികള്‍ക്കാണു ശുപാര്‍ശയുടെ ആനുകൂല്യം ലഭിക്കുക. ഇടുക്കി ജില്ലാ ചൈല്‍ഡ് വെല്‍ഫെയര്‍ കമ്മിറ്റി ചെയര്‍മാന്‍ പി.ജി. ഗോപാലകൃഷ്ണന്‍ നല്‍കിയ പരാതിയിലാണു ബാലാവകാശ സംരക്ഷണ കമ്മിഷന്‍ അധ്യക്ഷ ശോഭാ കോശി, അംഗങ്ങളായ കെ. നസീര്‍, സി.യു. മീന എന്നിവര്‍ ഇതു സംബന്ധിച്ചു സര്‍ക്കാരിനു ശുപാര്‍ശ നല്‍കിയത്.
ആരോഗ്യ–കുടുംബ ക്ഷേമ സെക്രട്ടറി, റവന്യു സെക്രട്ടറി, തദ്ദേശ സെക്രട്ടറി, കൃഷി–മൃഗ സംരക്ഷണ വകുപ്പ് അഡീഷനല്‍ ചീഫ് സെക്രട്ടറിമാര്‍, ഡിജിപി, ആരോഗ്യ വകുപ്പ് ഡയറക്ടര്‍, പഞ്ചായത്ത് ഡയറക്ടര്‍, നഗരകാര്യ ഡയറക്ടര്‍ തുടങ്ങിയവര്‍ ഉള്‍പ്പെടെ 15 പേരാണ് എതിര്‍കക്ഷികള്‍. ഇടുക്കി ജില്ലയിലെ പല ഭാഗങ്ങളിലും തെരുവു നായ്ക്കളുടെ ആക്രമണത്തില്‍ പരുക്കേറ്റ് കുട്ടികള്‍ ചികിത്സയിലാണെന്നും, ജീവിക്കാനുള്ള കുട്ടികളുടെ അവകാശം ലംഘിച്ചുവെന്ന സ്ഥിതിയാണെന്നും കുട്ടികളുടെ ജീവന്‍ സംരക്ഷിക്കാന്‍ നിയമപരമായി ബാധ്യതയുള്ളവര്‍ക്കു നിര്‍ദേശം നല്‍കണമെന്നുമാവശ്യപ്പെട്ടാണ് ആരോഗ്യ കുടുംബക്ഷേമ സെക്രട്ടറിയുള്‍പ്പെടെയുള്ളവരെ എതിര്‍കക്ഷികളാക്കി ഇടുക്കി ജില്ലാ ചൈല്‍ഡ് വെല്‍ഫെയര്‍ കമ്മിറ്റി ചെയര്‍മാന്‍ പി.ജി. ഗോപാലകൃഷ്ണന്‍ ബാലാവകാശ കമ്മിഷനെ സമീപിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha