പിണക്കം തീരാതെ കളക്ടര്‍ മനപൂര്‍വ്വം മാറിയതോ അതോ ഒഴിവാക്കിയതോ. കൊച്ചി മെട്രോയുടെ പരീക്ഷണയോട്ട ചടങ്ങിലേക്ക് കലക്ടര്‍ എം ജി രാജമാണിക്യത്തിന് ക്ഷണം ലഭിച്ചില്ല. ഇത് വിവാദങ്ങള്‍ക്ക് വഴിവെക്കുകയും ചെയ്തു.കൊച്ചി മെട്രോ റെയില്‍ പദ്ധതിയുടെ ഡയറക്ടര്‍ ബോര്‍ഡ് അംഗം കൂടിയായിരുന്നു രാജമാണിക്യം. സ്ഥലമെടുപ്പുമായി ബന്ധപ്പെട്ട ചുമതലകളും കലക്ടര്‍ നിര്‍വഹിക്കേണ്ടി വന്നിട്ടുണ്ട്. എന്നിട്ടും പേര് ഒഴിവാക്കി ക്ഷണക്കത്തടിച്ചതാണു വിവാദത്തിനു കാരണം. 2013 ജൂണ്‍ ഏഴിനാണ് മെട്രോ റെയില്‍ പദ്ധതിയുടെ നിര്‍മ്മാണ പ്രവര്‍ത്തനങ്ങള്‍ക്ക് തുടക്കമായത്. സമയബന്ധിതമായി പദ്ധതിപൂര്‍ത്തിയാക്കാനുള്ള നടപടികള്‍ക്ക് ചുക്കാന്‍ പിടിച്ചത് ജില്ലാഭരണകൂടവും. മുട്ടം യാര്‍ഡില്‍ നടന്ന പരീക്ഷണ ഓട്ടത്തിന്റെ ഫ്‌ളാഗ് ഓഫ് ചടങ്ങില്‍ ക്ഷണിക്കാത്തതുകാരണം കലക്ടര്‍ എത്തിയില്ലെന്ന് ആക്ഷേപം ഉയര്‍ന്നു.

തുടര്‍ന്ന് കലക്ടര്‍ക്കായി ഒരു കസേര സംഘാടകര്‍ ഒഴിച്ചിട്ടെങ്കിലും ഹാരിസണ്‍ മലയാളത്തിന്റെ മീറ്റിങ്ങില്‍ ഇടുക്കിയിലായിരുന്ന അദ്ദേഹം എത്തിയതുമില്ല. കെ.എം.ആര്‍.എല്‍ അധികൃതര്‍ ക്ഷണക്കത്തില്‍ പേരുവയ്ക്കാത്തവരുടെ പട്ടികയില്‍ എംഎ!ല്‍എമാരായ ജോസ് തെറ്റയിലും സാജുപോളും ഉള്‍പ്പെടും. പച്ചാളം മേല്‍പ്പാലത്തിന്റെ ഉദ്ഘാടന ചടങ്ങിനും ജില്ലാ കലക്ടറെ ക്ഷണിച്ചിരുന്നില്ല. ഇന്നലെ നടന്ന ചടങ്ങില്‍ ജില്ലാഭരണാധികാരിയെ ക്ഷണിക്കാതിരുന്നതോടെ കെ.എം.ആര്‍.എലിന് കലക്ടറോടുള്ള മുറുമുറുപ്പ് മറനീക്കി പുറത്തുവന്നിരിക്കുകയാണ്.
ജില്ലാ കലക്ടറും കെ.എം.ആര്‍.എം.ഡിയും തമ്മില്‍ നാളുകളായി സ്വരചേര്‍ച്ചയിലായിരുന്നില്ല.
മെട്രോ സ്ഥലമെടുപ്പുമായി ബന്ധപ്പെട്ട് തുടങ്ങിയതാണ് പ്രശ്‌നങ്ങള്‍. ശീമാട്ടിയുടെ സ്ഥലമെടുപ്പുമായി ബന്ധപ്പെട്ടാണ് അകല്‍ച്ച വര്‍ധിച്ചത്. എന്നാല്‍, ക്ഷണക്കത്തില്‍ പേരില്ലാത്തതിന് ഇതുമായി ബന്ധമില്ലെന്നും സംസ്ഥാന പരിപാടിയായതിനാലാണു ജില്ലാ കലക്ടറുടെ പേരുവെക്കാതിരുന്നതെന്നുമാണ് കെ.എം.ആര്‍.എല്‍ അധികൃതരുടെ വിശദീകരണം. കൊച്ചി മേയറും ഭരണസമിതിയുമായി ബന്ധപ്പെട്ടും കളക്ടര്‍ വിവാദത്തില്‍പ്പെട്ടിരുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha