അനന്തപുരിയില്‍ കലയുടെ മഴവില്ല് വിടര്‍ത്തിയ കൗമാരപ്രതിഭകളുടെ കാഴ്ചപ്പൂരത്തിന് ഇന്നു തിരശീല വീഴും. ആകെയുള്ള 232 ഇനങ്ങളില്‍ 225 ഇനങ്ങള്‍ പൂര്‍ത്തിയാകുമ്പോള്‍ കോഴിക്കോട് കലാകിരീടം നേടാനുള്ള തയ്യാറെടുപ്പിലാണ്. നേരിയ പോയിന്റിന്റെ വ്യത്യാസവുമായി പാലക്കാടും വിടാതെ പിന്തുടരുന്നുണ്ട്. 

കോഴിക്കോട്-894, പാലക്കാട്- 887, കണ്ണൂര്‍ 881, മലപ്പുറം-879 , എറണാകുളം 871, തൃശൂര്‍ 867,കോട്ടയം 844,കാസര്‍കോട് 821, തിരുവനന്തപുരം 812, ആലപ്പുഴ 808, കൊല്ലം 793, വയനാട് 769, പത്തനംതിട്ട 756, ഇടുക്കി 722 എന്നിവയാണ് ഇപ്പോഴത്തെ സ്‌കോര്‍ നിരക്കുകള്‍.  അവശേഷിക്കുന്ന ഏഴിനങ്ങളില്‍ ഇന്നു പോരാട്ടം കടുക്കുമ്പോള്‍ സ്വര്‍ണക്കപ്പിന്റെ അവകാശികള്‍ ആരാകുമെന്ന് അറിയാനാകും. അതിനായി ഇനി മണിക്കൂറുകള്‍മാത്രം കാത്തിരിക്കണം. 
മത്സരം അവസാന മണിക്കൂറുകളിലേക്കു കടക്കുമ്പോള്‍ കോഴിക്കോടോ പാലക്കാടോ സ്വര്‍ണക്കപ്പിന്റെ അവകാശികളാകുമെന്നാണു പ്രതീക്ഷിക്കപ്പെടുന്നത്. ഇന്നുച്ചയോടെ ജേതാക്കളെ അറിയാം. 
വൈകുന്നേരം നാലിനാണ് സമാപനസമ്മേളനം. വൈകുന്നേരം നാലിനു നടക്കുന്ന സമാപനസമ്മേളനം പ്രതിപക്ഷനേതാവ് വി.എസ് അച്യുതാനന്ദന്‍ ഉദ്ഘാടനം ചെയ്യും. വിദ്യാഭ്യാസ മന്ത്രി പി.കെ. അബ്ദുറബ്ബ് അധ്യക്ഷത വഹിക്കും. നടന്‍ നിവിന്‍ പോളി, സുരാജ് വെഞ്ഞാറമൂട് തുടങ്ങിയവര്‍ ചടങ്ങില്‍ മുഖ്യാതിഥികളായെത്തും. ആഭ്യന്തരമന്ത്രി രമേശ് ചെന്നിത്തല സുവനീര്‍ പ്രകാശനം ചെയ്യും. മന്ത്രി കെ.സി. ജോസഫ് സുവനീര്‍ ഏറ്റുവാങ്ങും. 

അറബി കലോത്സവ വിജയികള്‍ക്കുള്ള ട്രോഫി മന്ത്രി കെ.പി. മോഹനനും സംസ്‌കൃതോത്സവ വിജയികള്‍ക്കുള്ള ട്രോഫി വിതരണം മന്ത്രി പി.കെ. ജയലക്ഷ്മിയും നിര്‍വഹിക്കും. കലോത്സ വിജയികള്‍ക്കുള്ള സ്വര്‍ണ്ണക്കപ്പ് വിദ്യാഭ്യാസമന്ത്രി സമ്മാനിക്കും. ജില്ലാ പഞ്ചായത്ത് പ്രസിഡന്റ് വി.കെ. മധു പതാക കൈമാറ്റം നിര്‍വഹിക്കും. ഡിപിഐ എം.എസ് ജയ സമാപന സന്ദേശം നല്‍കും. എംഎല്‍എമാര്‍, എംപിമാര്‍, രാഷ്ട്രീയ-സാമൂഹ്യ- സാംസ്‌കാരിക രംഗത്തെ പ്രമുഖര്‍ എന്നിവരും സമാപനവേദിയെ സമ്പന്നമാക്കും.

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha