ഉന്നതന്മാര്‍ക്ക് രണ്ടാഴ്ച കൂടി ആശ്വസിക്കാം. സോളര്‍ തട്ടിപ്പു കേസിലെ പ്രതി സരിത എസ്. നായരുടെ വിവാദ കത്ത് ഹാജരാക്കണമെന്ന സോളര്‍ കമ്മിഷന്‍ ഉത്തരവിന് ഹൈക്കോടതിയുടെ സ്‌റ്റേ. രണ്ടാഴ്ചത്തേക്കാണ് സ്‌റ്റേ. ഇനി സരിതയെ വിസ്തരിക്കുമ്പോള്‍ ഈ കത്ത് ഹാരാക്കണമെന്നാണ് സോളര്‍ കമ്മിഷന്‍ ആവശ്യപ്പെട്ടിരുന്നത്. എന്നാല്‍ ഇതിനെ സരിതയുടെ അഭിഭാഷകര്‍ എതിര്‍ത്തിരുന്നു. കത്ത് ഹാജരാക്കിയാല്‍ അത് സ്വയം തെളിവ് ഹാജരാക്കുന്നതിന് തുല്യമായ നടപടിയാകുമെന്നാണ് സരിതയുടെ വാദം. ഇതേ കാര്യം തന്നെയാണ് ഹൈക്കോടതിയിലും സരിതയുടെ അഭിഭാഷകന്‍ അറിയിച്ചത്. സരിതയുടെ വാദം കേട്ടതിന് ശേഷമാണ് ഹൈക്കോടതി സോളര്‍ കമ്മിഷന്റെ ഉത്തരവിന് സ്‌റ്റേ ചെയ്തത്.
സരിത എസ്. നായര്‍ പത്തനംതിട്ട ജയിലില്‍ വച്ചെഴുതിയെന്നു പറയുന്ന കത്ത് ഹാജരാക്കണമെന്നു സോളര്‍ അന്വേഷണ കമ്മിഷന്‍ വ്യക്തമാക്കിയിരുന്നു. പരിഗണനാ വിഷയത്തില്‍ ഉള്‍പ്പെടാത്ത കാര്യമായതിനാല്‍ കത്ത് സമര്‍പ്പിക്കുന്നത് ഒഴിവാക്കണമെന്ന ആവശ്യം തള്ളിയാണു ജസ്റ്റിസ് ജി. ശിവരാജന്റെ നിര്‍ദേശം.
സരിത എസ്. നായരുടെ വിവാദ കത്ത് പിടിച്ചെടുക്കുന്നതിനു നിയമപ്രകാരമുള്ള നടപടി സ്വീകരിക്കാന്‍ നിര്‍ദേശം നല്‍കുമെന്നു സംസ്ഥാന പൊലീസ് മേധാവി ടി.പി. സെന്‍കുമാര്‍ സോളര്‍ കമ്മിഷനെ അറിയിച്ചിരുന്നു. കത്തിലെ രഹസ്യം പരസ്യമായി മാറിയിരിക്കുന്ന സാഹചര്യത്തില്‍ കത്തിന്റെ രഹസ്യ സ്വഭാവം നഷ്ടപ്പെട്ടെന്നും സോളര്‍ തട്ടിപ്പ് അന്വേഷണത്തിനു കത്ത് ആവശ്യമാണെന്നും കമ്മിഷന്‍ ഡിജിപിയെ അറിയിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha