സിപിഎം ചിലരെക്കൊണ്ട് കോണ്‍ഗ്രസ് നേതാക്കളെ അധിക്ഷേപിക്കുകയാണെന്ന എ.കെ.ആന്റണിയുടെ പ്രസ്താവന ആടിനെ പട്ടിയാക്കുന്നതാണെന്ന് പ്രതിപക്ഷ നേതാവ് വി.എസ്.അച്യുതാനന്ദന്‍. സോളര്‍ കുംഭകോണത്തിലും ബാര്‍ കോഴയിലും കൈക്കൂലി വാങ്ങിയത് സിപിഎമ്മുകാരാണെന്നാണ് ആന്റണിയുടെ പ്രസ്താവന കേട്ടാല്‍ തോന്നുകയെന്ന് വി.എസ് പറഞ്ഞു. ഇത്തരം അസംബന്ധങ്ങള്‍ പറഞ്ഞ് ആന്റണി ഇനിയും ചെറുതാകരുതെന്നും അദ്ദേഹം പറഞ്ഞു.

മുഖ്യമന്ത്രി ഉമ്മന്‍ ചാണ്ടിക്കും കൂടെയുള്ള മന്ത്രിമാര്‍ക്കും കോണ്‍ഗ്രസ് എംഎല്‍എമാര്‍ക്കുമൊക്കെ എതിരായി സോളര്‍ അഴിമതിക്കേസിലും ബാര്‍ കോഴക്കേസിലും ഉയര്‍ന്നിട്ടുള്ള ആരോപണങ്ങളും തെളിവുകളും കാണുകയോ കേള്‍ക്കുകയോ ചെയ്യാത്ത ആളാണോ ആന്റണി. ഇതേപ്പറ്റിയൊന്നും മാധ്യമപ്രവര്‍ത്തകരുടെ ചോദ്യങ്ങള്‍ക്ക് എന്തെങ്കിലുമൊരു മറുപടി പറയാന്‍ അദ്ദേഹം തയാറായില്ല. മുഖ്യമന്ത്രി അടക്കമുള്ളവര്‍ സരിതയെ നൂറുകണക്കിന് തവണ ഫോണില്‍ വിളിച്ചതും സോളര്‍ കമ്മിഷനുമുന്നില്‍ അദ്ദേഹത്തെ രക്ഷിക്കണമെന്ന് പറഞ്ഞ് സ്വാധീനിക്കാന്‍ ശ്രമിച്ചതുമൊന്നും ആന്റണി അറിഞ്ഞിട്ടേയില്ല.

ആദര്‍ശത്തിന്റെ പേരുപറഞ്ഞ് കേന്ദ്രമന്ത്രി കസേര ഉപേക്ഷിച്ചയാളാണ് ആന്റണി. ഇപ്പോള്‍ നുണകള്‍ മാത്രം പറഞ്ഞ് എത്രയൊക്കെ നാറിയാലും കസേര വിട്ടുകൊടുക്കാതെ അള്ളിപ്പിടിച്ചിരിക്കുന്ന ഉമ്മന്‍ ചാണ്ടിക്ക് ഗുഡ് സര്‍ട്ടിഫിക്കറ്റ് നല്‍കുന്ന ആന്റണിയുടെ വങ്കത്തരം ജനങ്ങള്‍ തിരിച്ചറിയും. ദീര്‍ഘനാള്‍ ഉറക്കത്തിലായിരുന്ന റിപ്പ്‌വാന്‍ വിങ്കിളിനെപ്പോലെ പെട്ടന്നൊരു നിമിഷം ഉണര്‍ന്ന് ഇത്തരം അസംബന്ധങ്ങള്‍ എഴുന്നള്ളിക്കുന്നത് ആന്റണിയുടെ സ്ഥിരം പരിപാടിയാണ്. ഇത്തരം ചെപ്പടി വിദ്യകള്‍ ഇനിയും ജനങ്ങളുടെ മുന്നില്‍ വിലപ്പോവല്ലെന്നെങ്കിലും അദ്ദേഹം ഓര്‍ക്കുന്നത് നല്ലതായിരിക്കുമെന്നു വിഎസ് വാര്‍ത്താക്കുറിപ്പില്‍ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha