സംസ്ഥാനം നേരിടുന്ന കടുത്ത സാമ്പത്തിക പ്രതിസന്ധിക്ക് താൽക്കാലിക പരിഹാരം കാണുന്നതിനായി കേരള സർക്കാർ വീണ്ടും കടമെടുക്കുന്നു.
വികസന പ്രവര്‍ത്തനങ്ങള്‍ക്കെന്ന പേരില്‍ 3,700 കോടി രൂപയുടെ കടപ്പത്രമാണ് സര്‍ക്കാര്‍ പുറപ്പെടുവിക്കുന്നത്. എന്നാല്‍, രണ്ടു മാസത്തെ കുടിശ്ശികയുള്ള സാമൂഹിക ക്ഷേമ പെന്‍ഷന്‍ വിതരണം ചെയ്യാനും നിത്യനിദാന ചെലവുകള്‍ കണ്ടെത്താനുമാണ് ഈ തുക പ്രധാനമായും വിനിയോഗിക്കുകയെന്നാണ് സൂചന.

സാമ്പത്തിക വര്‍ഷം അവസാനിക്കാനിരിക്കെ, ഖജനാവ് കാലിയായ അവസ്ഥയില്‍ കടമെടുപ്പിലൂടെ മാത്രം മുന്നോട്ട് പോകാനാണ് ധനവകുപ്പിന്റെ തീരുമാനം.ശമ്പളം, പെൻഷൻ തുടങ്ങിയ അടിയന്തര ആവശ്യങ്ങൾ നിറവേറ്റുന്നതിനായി 3,700 കോടി രൂപ കൂടി വായ്പയെടുക്കാനാണ് സർക്കാർ തീരുമാനിച്ചിരിക്കുന്നത്. നിലവിലെ സാമ്പത്തിക വർഷത്തിന്റെ അവസാന ഘട്ടത്തിൽ ട്രഷറി നിയന്ത്രണങ്ങളും മറ്റും നിലനിൽക്കുന്ന സാഹചര്യത്തിലാണ് ഈ നിർണ്ണായക നീക്കം.

ഇതോടെ ഈ വർഷം മാത്രം സംസ്ഥാനം എടുത്ത ആകെ കടം 49,547 കോടി രൂപയായി ഉയരും. സാധാരണഗതിയിൽ പ്രതിമാസം 2,000 കോടി രൂപയോളം കടമെടുക്കാറുള്ള സ്ഥാനത്താണ് ഇപ്പോൾ വലിയൊരു തുക ഒന്നിച്ച് വായ്പയെടുക്കാൻ സർക്കാർ നിർബന്ധിതരായിരിക്കുന്നത്.സാമ്പത്തിക വർഷത്തിന്റെ അവസാന മാസമായ മാർച്ചിൽ വലിയ തോതിലുള്ള ചെലവുകളാണ് സർക്കാരിന് മുന്നിലുള്ളത്.കരാറുകാരുടെ കുടിശ്ശിക തീർക്കൽ, ക്ഷേമ പെൻഷനുകൾ വിതരണം ചെയ്യൽ, സർക്കാർ ജീവനക്കാരുടെ ശമ്പളവും വിരമിച്ചവരുടെ പെൻഷനും നൽകൽ എന്നിവയ്ക്കായി വൻതുക ആവശ്യമാണ്.

നികുതി വരുമാനത്തിൽ പ്രതീക്ഷിച്ച വർദ്ധനവ് ഉണ്ടാകാത്തതും കേന്ദ്ര വിഹിതത്തിലെ കുറവും പ്രതിസന്ധിക്ക് ആക്കം കൂട്ടിയിട്ടുണ്ട്. കടമെടുപ്പ് പരിധി സംബന്ധിച്ച് കേന്ദ്ര സർക്കാരുമായി നിലനിൽക്കുന്ന തർക്കങ്ങൾക്കിടയിലാണ് പുതിയ വായ്പയ്ക്കുള്ള നടപടികൾ ആരംഭിച്ചിരിക്കുന്നത്.കടമെടുക്കുന്ന തുക പ്രധാനമായും ദൈനംദിന ചെലവുകൾക്കായി വിനിയോഗിക്കേണ്ടി വരുന്നത് സംസ്ഥാനത്തിന്റെ ദീർഘകാല സാമ്പത്തിക ഭദ്രതയെ ബാധിക്കുമെന്ന ആശങ്കയും ഉയരുന്നുണ്ട്. ഓരോ മാസവും ശമ്പളം നൽകാൻ പോലും വായ്പയെ ആശ്രയിക്കേണ്ടി വരുന്ന സാഹചര്യം സാമ്പത്തിക വിദഗ്ധർക്കിടയിൽ വലിയ ചർച്ചകൾക്ക് വഴിവെച്ചിരിക്കുകയാണ്.