ദമ്പതികൾ വീട്ടിനുള്ളിൽ മരിച്ചനിലയിൽ കണ്ടെത്തി. തിരുവനന്തപുരം ഉള്ളൂരിലാണ് സംഭവം. ആക്കുളം മാവടിനട പുഷ്‌പ ഭവനിൽ രഘുനാഥൻ നായർ (57), ഭാര്യ പുഷ്‌പ (64) എന്നിവരെയാണ്ണ്‌ മരിച്ചനിലയിൽ കണ്ടെത്തിയത്. മൃതദേഹങ്ങൾക്ക്‌ ദിവസങ്ങളുടെ പഴക്കമുണ്ടെന്നാണ് പൊലീസിന്റെ പ്രാഥമിക നി​ഗമനം.

രഘുനാഥൻ നായർ അടുക്കളയിൽ തൂങ്ങിമരിച്ചനിലയിലും പുഷ്‌പയുടെ മൃതദേഹം തറയിലുമാണ്‌ കിടന്നിരുന്നത്‌. വീട്ടിൽനിന്ന്‌ ദുർഗന്ധമുണ്ടായതിനെതുടർന്ന്‌ ബന്ധു മെഡിക്കൽ കോളേജ്‌ പൊലീസിൽ വിവരം അറിയിക്കുകയായിരുന്നു. തുടർന്ന് വെള്ളിയാഴ്ച രാത്രി ഒൻപത് മണിയോടെ പൊലീസ്‌ നടത്തിയ പരിശോധനയിലാണ് മൃത​ദേഹങ്ങൾ കണ്ടെത്തിയത്.

ഇരുവരുടെയും മൃതദേഹങ്ങൾ മെഡിക്കൽ കോളേജ്‌ ആശുപത്രി മോർച്ചറിയിലേക്ക്‌ മാറ്റി. മരിച്ച ഇരുവരും അയൽവാസികളുമായി വലിയ അടുപ്പം പുലർത്തിയിരുന്നില്ലെന്നാണ്‌ വിവരം. അസ്വാഭാവികമരണത്തിന്‌ പൊലീസ്‌ കേസ്‌ രജിസ്‌റ്റർ ചെയ്‌ത്‌ അന്വേഷണമാരംഭിച്ചു.