സംസ്ഥാനത്തെ ബെവ്‌കോ ഔട്ട്‌ലെറ്റുകളില്‍ നാളെ മുതല്‍ ഒഴിഞ്ഞ മദ്യക്കുപ്പികള്‍ സ്വീകരിച്ചു തുടങ്ങും. പദ്ധതി നടപ്പാക്കുന്ന ഔട്ട്‌ലെറ്റുകളില്‍ നിന്ന് മദ്യം വാങ്ങുന്നവര്‍ക്ക് പ്ലാസ്റ്റിക്ക് കുപ്പിക്ക് 20 രൂപ അധികം നല്‍കണം. ആദ്യ ഘട്ടത്തില്‍ 20 ഔട്ട്‌ലെറ്റുകള്‍ വഴിയാകും മദ്യക്കുപ്പികള്‍ ശേഖരിക്കുക. ഡെപ്പോസിറ്റ് നല്‍കുന്ന 20 രൂപ കുപ്പി നല്‍കിയാല്‍ തിരികെ ലഭിക്കും. പരീക്ഷണാടിസ്ഥാനത്തിലാണ് ഇപ്പോള്‍ പ്ലാസ്റ്റിക് മദ്യ കുപ്പികളുടെ റിട്ടേണ്‍ ആരംഭിക്കുന്നതെന്നും ജനുവരി ഒന്ന് മുതല്‍ പൂര്‍ണ്ണ തോതില്‍ ഇത് പ്രാബല്യത്തില്‍ വരുമെന്നും ബെവ്‌കോ എംഡി ഹര്‍ഷിത അട്ടല്ലൂരി അറിയിച്ചു.

സ്വകാര്യസംരംഭകരുടെ സഹകരണത്തോടെയാണ് കുപ്പി സമാഹരണം. തിരുവനന്തപുരം, കണ്ണൂര്‍ ജില്ലകളിലും പിന്നാലെ മറ്റിടങ്ങളിലും ഇത് നടപ്പാക്കും. ഏത് ഔട്ട്‌ലെറ്റില്‍ കുപ്പി കൊടുത്താലും പണം കിട്ടുന്ന പദ്ധതി നടപ്പാക്കുന്നതും പരിശോധിക്കും. തമിഴ്‌നാട്ടിലെ മാതൃകയാണ് നടപ്പാക്കുന്നത്. ഇതിനായി ബെവ്‌കോ, ക്ലീന്‍ കേരളം കമ്പനി, എക്‌സൈസ്, ശുചിത്വമിഷന്‍ എന്നിവര്‍ സംയുക്തമായി തമിഴ്‌നാടിന്റെ രീതി പഠിച്ചിരുന്നു.

സംസ്ഥാനത്ത് ഒരുവര്‍ഷം 70 കോടി പ്‌ളാസ്റ്റിക് മദ്യക്കുപ്പികളാണ് വില്‍ക്കുന്നത്. ഇതുണ്ടാക്കുന്ന പാരിസ്ഥിതിക, മാലിന്യ പ്രശ്‌നത്തെ തുടര്‍ന്നാണ് തീരുമാനം. ഒക്ടോബര്‍ ഒന്നു മുതല്‍ പാക്ക് ചെയ്യാന്‍ ന്യൂസ് പേപ്പര്‍ ബെവ്‌കോ ഔട്ട്‌ലെറ്റുകളില്‍ ഉണ്ടാകില്ലെന്നും ഹര്‍ഷിത അട്ടല്ലൂരി അറിയിച്ചു. മദ്യം വാങ്ങി കൊണ്ടു പോകാന്‍ ബെവ്‌കോയുടെ ബാഗ് ഉണ്ടാകും. ബാഗ് കൊണ്ടുവരേണ്ടവര്‍ക്ക് അത് കൊണ്ടുവരാം. ബെവ്‌കോ നല്‍കുന്ന ബാഗില്‍ ബെവ്‌കോ ലേബല്‍ ഉണ്ടാകില്ലെന്നും ഹര്‍ഷിത അട്ടല്ലൂരി അറിയിച്ചു.