ധനകാര്യ സ്ഥാപനങ്ങളും ജപ്തി ചെയ്യുന്നത് ഒഴിവാക്കാനുള്ള നിയമം ഉള്പ്പെടെ എട്ടു ബില്ലുകള് അവതരിപ്പിക്കാന് മന്ത്രിസഭാ യോഗം അംഗീകാരം നല്കി
നാളെ തുടങ്ങുന്ന സമ്മേളനത്തില് എട്ടു ബില്ലുകള് അവതരിപ്പിക്കാന് മന്ത്രിസഭാ യോഗം അംഗീകാരം നല്കി. കിടപ്പാടം ബാങ്കുകളും ധനകാര്യ സ്ഥാപനങ്ങളും ജപ്തി ചെയ്യുന്നത് ഒഴിവാക്കാനുള്ള നിയമം ഉള്പ്പെടെയുള്ള ബില്ലുകളാണ് നിയമസഭാ സമ്മേളനത്തില് അവതരിപ്പിക്കുക. താമസിക്കാന് മറ്റ് സ്ഥലങ്ങളില്ലാത്തവരുടെ ഏക കിടപ്പാടം ജപ്തി ചെയ്യുന്നതൊഴിവാക്കാനാണ് നിയമം വരുന്നത്. തിങ്കളാഴ്ച തുടങ്ങുന്ന നിയമസഭാ സമ്മേളനത്തില് അവതരിപ്പിക്കുന്ന 'കേരള ഏക കിടപ്പാടം സംരക്ഷണ ബില്ലി'ന്റെ കരട് മന്ത്രിസഭ അംഗീകരിച്ചു.
തങ്ങളുടെ നിയന്ത്രണത്തിലല്ലാത്ത കാരണത്താല് (മനപൂര്വമായി വീഴ്ച വരുത്താത്ത) തിരിച്ചടവ് മുടങ്ങിയതിനെത്തുടര്ന്ന് പാര്പ്പിടം ജപ്തി ചെയ്യപ്പെടുമെന്ന ഭീഷണി നേരിടുന്നവര്ക്കാകും നിയമം സംരക്ഷണം നല്കുക. ഇക്കാര്യം കണ്ടെത്താന് ജില്ലാ, സംസ്ഥാന തലങ്ങളില് സമിതികളുണ്ടാകും. മൂന്നുലക്ഷം രൂപയില് താഴെയാകണം വാര്ഷിക വരുമാനം. ആകെ വായ്പാതുക അഞ്ചു ലക്ഷവും പിഴയും പിഴപ്പലിശയും അടക്കം 10 ലക്ഷം കവിയുകയുമരുത്.
ധനകാര്യ സ്ഥാപനങ്ങളുടെ ബാധ്യത വ്യവസ്ഥകളോടെ ഒഴിവാക്കാന് സര്ക്കാര് പ്രത്യേക നിധിയും രൂപീകരിക്കും. സ്വകാര്യ ധനകാര്യ സ്ഥാപനങ്ങള്, മൈക്രോ ഫിനാന്സ് സ്ഥാപനങ്ങള് തുടങ്ങിയയിടങ്ങളില് നിന്നുള്ള വായ്പയെടുത്തവര്ക്ക് സംരക്ഷണമുണ്ടാകില്ല.
പൊതുമേഖലാ ബാങ്കുകള്, ദേശസാല്കൃത ബാങ്കുകള്, സഹകരണ സ്ഥാപനങ്ങള്, കെഎസ്എഫ്ഇ, കെഎഫ്സി പോലുള്ള സര്ക്കാര് നിയന്ത്രണത്തിലുള്ള സ്ഥാപനങ്ങള് തുടങ്ങിയ ഇടങ്ങളില്നിന്നു വായ്പ എടുത്തവര്ക്കാണ് സംരക്ഷണം ലഭിക്കുക.
മനുഷ്യരെ ആക്രമിക്കുന്ന ആന,കടുവ,പുലി എന്നിവയെ വെടിവയ്ക്കാന് അനുമതി നല്കുന്നതിനുള്ള അധികാരം കേന്ദ്രസര്ക്കാരില് നിന്ന് സംസ്ഥാനത്തിന് കിട്ടാനും കാട്ടുപന്നിയെ ക്ഷുദ്രജീവിയായി പ്രഖ്യാപിച്ച് കൊല്ലാനും ഇറച്ചികഴിക്കാനും അനുമതി നല്കുന്ന വനംവന്യജീവി സംരക്ഷണനിയമഭേദഗതി, സ്വകാര്യഭൂമിയിലെ ചന്ദനമരം വനംവകുപ്പ് മുഖേന മുറിച്ചുവിറ്റ് പണം വാങ്ങാന് അനുമതി നല്കുന്ന വനനിയമഭേദഗതി, കയര്തൊഴിലാളിക്ഷേമനിധിയുടെ പ്രവര്ത്തനം ഊര്ജ്ജിതമാക്കുന്നതിനുള്ള നിയമഭേദഗതി, 2025ലെ കേരള വ്യവസായ ഏകജാലക ക്ലിയറന്സ് ബോര്ഡുകളും വ്യവസായ നഗരപ്രദേശ വികസനവും ഭേദഗതി കരട് ബില്,ബോര്ഡുകളും കമാനങ്ങളും സ്ഥാപിക്കുന്നതിന് നിയന്ത്രണം ഏര്പ്പെടുത്തിയുള്ള ഹൈക്കോടതി വിധിയെ മറികടക്കാനായി മുനിസിപ്പല് ആക്ടിലും പഞ്ചായത്ത്ആക്ടിലും ഭേദഗതി വരുത്തിക്കൊണ്ടുള്ള രണ്ട് ബില്ലുകള്,ഡിജിറ്റല് റീസര്വ്വേയ്ക്ക് ശേഷം സ്വന്തം പറമ്പില് അധികമായി കണ്ടെത്തിയ ഭൂമിക്ക് കരം അടച്ച് സ്വന്തമാക്കാന് അനുമതി നല്കുന്ന 2025 ലെ കേരള സ്വകാര്യ കൈവശത്തിലുള്ള അധിക ഭൂമി ക്രമവല്ക്കരണ ബില്, കാളപൂട്ട്, കന്നുപൂട്ട്, മരമടി , ഉഴവ് മത്സരങ്ങള് തുടര്ന്നും നടത്തുന്നതിന് ആവശ്യമായ നിയമനിര്മാണം നടത്തുന്നതിനുള്ള ബില് എന്നിവയാണ് നിയമസഭയില് അവതരിപ്പിക്കുക.
https://www.facebook.com/Malayalivartha
