പീച്ചി പൊലീസ് ഹോട്ടലുടമയെയും ജീവനക്കാരനെയും അകാരണമായി മര്‍ദ്ദിച്ച സംഭവത്തില്‍ എസ്‌ഐ പിഎം രതീഷിന് സസ്‌പെന്‍ഷന്‍. 2023 മേയ് 24നാണ് കേസിനാസ്പദമായ സംഭവം നടന്നത്. ദക്ഷിണ മേഖല ഐജിയുടേതാണ് നടപടി. നിലവില്‍ കടവന്ത്ര എസ്എച്ച് ഒ ആയ രതീഷിന് ഹോട്ടലുടമയെ മര്‍ദിച്ച സംഭവത്തില്‍ അന്വേഷണം നേരിടുമ്പോഴും സ്ഥാനക്കയറ്റം നല്‍കിയിരുന്നു. രതീഷ് കുറ്റക്കാരനാണെന്ന തൃശൂര്‍ അഡീഷണല്‍ എസ്പിയുടെ റിപ്പോര്‍ട്ട് ഒന്നരവര്‍ഷം പൂഴ്ത്തിവയ്ക്കുകയായിരുന്നു.

പട്ടിക്കാട് ലാലീസ് ഹോട്ടലുടമ കെ പി ഔസേപ്പിനേയും മകനേയും ഹോട്ടല്‍ ജീവനക്കാരനെയുമാണ് എസ്‌ഐ മര്‍ദ്ദിച്ചത്. പാലക്കാട് വണ്ടാഴി സ്വദേശി ദിനേശും ബന്ധുവും നല്‍കിയ പരാതിക്ക് പിന്നാലെയായിരുന്നു മര്‍ദ്ദനം. ഹോട്ടലിലെ ബിരിയാണിയുടെ ഗുണനിലവാരവുമായി ബന്ധപ്പെട്ടുണ്ടായ തര്‍ക്കമാണ് പരാതിയായി സ്‌റ്റേഷനിലെത്തിയത്.

എന്നാല്‍ ഇതിനിടയില്‍ ഹോട്ടല്‍ ജീവനക്കാര്‍ പരാതിക്കാരെ തടഞ്ഞുവയ്ക്കുന്നതിന്റെയും കയ്യേറ്റം ചെയ്യുന്നതിന്റെയും വീഡിയോ പുറത്തുവന്നു.സംഭവത്തില്‍ പരാതി നല്‍കാന്‍ ഔസേപ്പും ഡ്രൈവറും പൊലീസ് സ്‌റ്റേഷനില്‍ എത്തിയിരുന്നു. ഇതിനിടെ അഞ്ച് ലക്ഷം രൂപ ആവശ്യപ്പെട്ട് കേസ് ഒതുക്കിത്തീര്‍ക്കാന്‍ ശ്രമമുണ്ടായതായും ഔസേപ്പ് ആരോപിച്ചിരുന്നു. മാസങ്ങളോളം നീണ്ടുനിന്ന നിയമപോരാട്ടത്തിനൊടുവിലാണ് ഔസേപ്പിന് കസ്റ്റഡി മര്‍ദ്ദനത്തിന്റെ ദൃശ്യങ്ങള്‍ ലഭിച്ചത്.