ഇന്ന് പ്രധാനമന്ത്രി നരേന്ദ്ര മോദിക്ക് 75-ാം പിറന്നാള്‍. ഗുജറാത്തിലെ മെഹ്സാനയില്‍ 1950 സെപ്തംബര്‍ 17ന് ജനിച്ച മോദിയുടെ പിറന്നാളിനോടനുബന്ധിച്ച് രണ്ടാഴ്ചത്തെ വിപുലമായ ആഘോഷ പരിപാടികള്‍ക്ക് കേന്ദ്രസര്‍ക്കാരും ബി.ജെ.പിയും ഇന്ന് തുടക്കമിടുകയും ചെയ്യും. പിറന്നാള്‍ ദിനം പ്രധാനമന്ത്രി മദ്ധ്യപ്രദേശിലെ ധാര്‍ ജില്ലയില്‍ രാജ്യത്തെ ആദ്യ പി.എം മിത്ര ടെക്സ്‌റ്റൈല്‍ പാര്‍ക്കിന് തറക്കല്ലിടുന്നതാണ്.

മോദിയുടെ പിറന്നാളിന്റെ ഭാഗമായി ബി.ജെ.പിയുടെ നേതൃത്വത്തില്‍ ഇന്നു മുതല്‍ രണ്ടാഴ്ച രാജ്യമെമ്പാടും 'സേവ പഖ്വാഡ' (സേവന വാരം) ആചരിക്കും. മദ്ധ്യപ്രദേശില്‍ പ്രധാനമന്ത്രി ഉദ്ഘാടനം നിര്‍വഹിക്കും.

രക്തദാന-ആരോഗ്യ ക്യാമ്പുകള്‍, ശുചിത്വ ദൗത്യങ്ങള്‍, പരിസ്ഥിതി ബോധവത്കണം, പ്രദര്‍ശനങ്ങള്‍, സംഭാഷണ പരിപാടികള്‍, വികലാംഗര്‍ക്കുള്ള ഉപകരണ വിതരണം, 'മോദി വികാസ് മാരത്തണ്‍', കായികമേളകള്‍, ചിത്രരചനാ മത്സരം തുടങ്ങിയവ സംഘടിപ്പിക്കുന്നതാണ്.

അതേസമയം പ്രായപരിധി ചട്ടം വീണ്ടും ചര്‍ച്ചയാകും. എല്‍.കെ. അദ്വാനി, മുരളീമനോഹര്‍ ജോഷി തുടങ്ങിയ നേതാക്കള്‍ക്ക് 75 വയസ് പൂര്‍ത്തിയായപ്പോള്‍ വിശ്രമം നിര്‍ദ്ദേശിച്ച ചട്ടം മോദി സ്വയം നടപ്പാക്കുമോ എന്ന ചോദ്യം ദേശീയ രാഷ്ട്രീയത്തില്‍ ചര്‍ച്ചയാകും. മോദിക്ക് പാര്‍ട്ടി ഇളവു നല്‍കുമോ എന്നും 2029ലെ പൊതുതിരഞ്ഞെടുപ്പില്‍ നേതൃത്വം നല്‍കുമോയെന്നുമുള്ള സ്ഥിതീകരണത്തിനും അത് വഴി തുറക്കാം. എന്നാല്‍ അടുത്ത തിരഞ്ഞെടുപ്പിലും മോദി നയിക്കണമെന്ന പൊതു വികാരം പാര്‍ട്ടിയിലുടനീളമുണ്ട്.