സ്വത്ത് തട്ടിയെടുത്ത മരുമകന് ഭാര്യയുടെ മാതാപിതാക്കളെ കെട്ടിയിട്ടു ഉപദ്രവിച്ചു; ഭാര്യാമാതാവ് മരിച്ചു
സ്വത്ത് തട്ടിയെടുത്ത മരുമകന് ഭാര്യയുടെ മാതാവിനെയും പിതാവിനെയും പ്ലാസ്റ്റിക് നിര്മാണ യൂണിറ്റില് കെട്ടിയിട്ടു ദ്രോഹിച്ചു. വെള്ളവും ഭക്ഷണവും പരിചരണവും കിട്ടാത്തതിനാല് ഭാര്യാമാതാവ് മരിച്ചു. ഭര്യാപിതാവിനെ ലീഗല് സര്വീസ് അതോറിറ്റി അധികൃതരെത്തി മോചിപ്പിച്ചു പെരുവയലിലെ മകളുടെ വീട്ടിലേക്കു മാറ്റി. മരുമകന് സ്വത്തു തട്ടിയെടുത്തുവെന്ന കേസില് ലീഗല് സര്വീസ് അതോറിറ്റി തീര്പ്പുണ്ടാക്കാന് നിശ്ചയിച്ച ദിവസമായിരുന്നു മരണം.
മാവൂര് കണ്ണിപറമ്പ് തട്ടാന്തൊടികയില് രാഘവന്നായരുടെ ഭാര്യ സരോജനി അമ്മ(69)യാണു മരിച്ചത്. ഇവരുടെ ഭര്ത്താവ് രാഘവന്നായരെ മലപ്പുറം ചേലേമ്പ്രയിലെ പ്ലാസ്റ്റിക് നിര്മാണ യൂണിലെ കുടുസുമുറിയില് നിന്നു ഇന്നലെ ലീഗല് സര്വീസ് അതോറിറ്റി അധികൃതര് മോചിപ്പിച്ചു.
അസുഖം ബാധിച്ചു 31 വര്ഷത്തോളമായി ശരീരം തളര്ന്നു കിടക്കുന്ന സരോജിനി അമ്മയെയും ഷോക്കേറ്റു തളര്ന്ന രാഘവന്നായരെയും ആജീവനാന്തം നോക്കാമെന്നേറ്റു മൂത്ത മകളുടെ ഭര്ത്താവ് ബാലസുന്ദരന് ചേലേമ്പ്രയിലെ വീട്ടിലേക്കു കൂട്ടികൊണ്ടുപോയതാണെന്ന് അധികൃതര് പറഞ്ഞു. പിന്നീട് ഇവരുടെ സ്വത്തു കൈക്കലാക്കിയ ശേഷം പ്ലാസ്റ്റിക് നിര്മാണ യൂണിറ്റില് തള്ളുകയായിരുന്നുവത്രെ.
ലീഗല് സര്വീസ് അതോറിറ്റി അധികൃതര് ഇവരെ കണ്ടെത്തുമ്പോള് രണ്ടു കട്ടിലുകളില് കിടത്തി തുണിപിരിച്ചു കയറാക്കി ജനലിനോടു ചേര്ത്തു കെട്ടിയിട്ട നിലയിലായിരുന്നു. പ്ലാസ്റ്റിക് നിര്മാണ യൂണിറ്റില് നിന്നുള്ള പുകയേറ്റു സരോജിനി അമ്മയ്ക്ക് അസുഖം കലശലായതിനെത്തുടര്ന്ന് കഴിഞ്ഞ ദിവസം മെഡിക്കല് കോളജിലെത്തിച്ചു. ഇന്നലെ മരിച്ചു. മൂത്ത മകളുടെ ഭര്ത്താവ് സ്വത്ത് തട്ടിയെടുത്തതിനെതിരെ രാഘവന്നായര് പൊലീസിലും ലീഗല് സര്വീസ് അതോറിറ്റിക്കും പരാതി നല്കിയിരുന്നു.
കണ്ണിപറമ്പിലെ ഒരേക്കറോളമുള്ള പറമ്പില് നിന്നു 39 സെന്റ് സ്ഥലവും വീടും വിറ്റ് ഇവര് മകനൊപ്പം തിരുവമ്പാടിയിലെ വാടകവീട്ടിലേക്കു മാറിയിരുന്നു. ആ വാടകവീട് ഒഴിഞ്ഞതിനു ശേഷം പെരുവയലില് രണ്ടാമത്തെ മകള് കനകലതയ്ക്കും മരുമകനും ഒപ്പമായിരുന്നു താമസം. ഇവിടെ നിന്നാണ് ബാലസുന്ദരന് ഇവരെ ചേലേമ്പ്രയിലേക്കു കൊണ്ടുപോയത്. ആജീവനാന്തം പരിചരിക്കാമെന്നേറ്റു കണ്ണിപറമ്പിലെ 45 സെന്റ് സ്ഥലം ഇയാള് കൈക്കലാക്കി. പ്ലാസ്റ്റിക് നിര്മാണ യൂണിറ്റില് തള്ളിയ ഇവര്ക്കു മരുന്നും ഭക്ഷണവും യഥാസമയം നല്കിയിരുന്നില്ലെന്നും പരാതിയില് പറയുന്നു. മരിച്ച സരോജനി അമ്മയുടെ മക്കള്: സുരേന്ദ്രകുമാര്, ശോഭന, കനകലത, ഉഷ. മരുമക്കള്: ബാലസുന്ദരന് ചേലേമ്പ്ര, മുരളീധരന് പെരുവയല്, പ്രമോദ് കക്കോടി, വാസന്തി.
ഭാര്യയുടെ മാതാപിതാക്കളുടെ സ്വത്ത് കൈക്കലാക്കി അവരെ പീഡിപ്പിച്ച ചേലേമ്പ്ര സ്വദേശി ബാലസുന്ദരനെതിരെ നടപടിയുണ്ടാവും. തട്ടിയെടുത്ത സ്ഥലത്തിന്റെ ആധാരം റദ്ദ് ചെയ്യും. ഇവരെ പ്ലാസ്റ്റിക് നിര്മാണ ഷെഡില് തള്ളി പരിചരിക്കാതെയും തിരിഞ്ഞുനോക്കാതെയും പീഡിപ്പിച്ചതിനു ബാലസുന്ദരനെതിരെ കേസെടുക്കും. വിവരങ്ങള് ആര്ഡിഒയ്ക്കും കലക്ടര്ക്കും കൈമാറും. ബന്ധപ്പെട്ട കേസ് നടത്താന് പരാതിക്കാരന് തട്ടാന്തൊടികയില് രാഘവന്നായര്ക്ക് എല്ലാ നിയമസഹായങ്ങളും നല്കുമെന്നു ലീഗല് സര്വീസ് അതോറിറ്റി സെക്രട്ടറിയും സബ്ജഡ്ജുമായ ആര്.എല്. ബൈജു പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
