ഇനിയെങ്കിലും തെറ്റ് ഏറ്റുപറയൂ: വിഎസിനോട് ഉമ്മന് ചാണ്ടി
നിയമസഭാ തിരഞ്ഞെടുപ്പില് പുതുപ്പള്ളി മണ്ഡലത്തില് നിന്ന് ജനവിധി തേടുന്ന ഉമ്മന് ചാണ്ടിയുടെ നാമനിര്ദേശ പത്രിക വരണാധികാരി സ്വീകരിച്ചതിന് പിന്നാലെയാണ് പ്രതിപക്ഷ നേതാവിനെ പരിഹസിച്ച് ഉമ്മന് ചാണ്ടി ഫെയ്സ്ബുക്കില് പുതിയ കുറിപ്പിട്ടത്. തന്റെ പേരില് കേസുകളൊന്നും ഇല്ലെന്ന് വ്യക്തമാക്കി സമര്പ്പിച്ച നാമനിര്ദേശ പത്രിക സൂക്ഷ്മ പരിശോധനയ്ക്ക് ശേഷം വരണാധികാരി സ്വീകരിച്ച സാഹചര്യത്തില് തനിക്കെതിരെ കേസുകളുണ്ടെന്ന് ആരോപണം ഉന്നയിച്ച അച്യുതാനന്ദന് കേരളത്തിലെ ജനങ്ങളോട് മാപ്പു പറയണമെന്നാണ് ഉമ്മന് ചാണ്ടിയുടെ ആവശ്യം.
മാത്രമല്ല, തനിക്കെതിരെ കേസുകളുണ്ടെന്ന പ്രതിപക്ഷ നേതാവിന്റെ ആരോപണത്തെ സിപിഐ സംസ്ഥാന സെക്രട്ടറി കാനം രാജേന്ദ്രന് തന്നെ തള്ളിക്കളഞ്ഞതാണെന്നും ഫെയ്സ്ബുക്ക് പോസ്റ്റില് മുഖ്യമന്ത്രി ചൂണ്ടിക്കാട്ടുന്നു. സിപിഎമ്മിന്റെ പൊളിറ്റ് ബ്യൂറോ അംഗമായ പിണറായി വിജയന് പോലും വിഎസിന്റെ ആരോപണങ്ങളെ ഏറ്റെടുക്കാത്തത് തനിക്കെതിരെ കേസുകള് ഇല്ലെന്ന് പിണറായിക്ക് അറിയാവുന്നതിനാലാണെന്നും ഉമ്മന് ചാണ്ടി അവകാശപ്പെടുന്നു. ഇടതു മുന്നണിയിലെ പ്രധാന നേതാക്കള്ക്കുപോലും ബോധ്യപ്പെടാത്ത കാര്യം ആവര്ത്തിച്ച് ജനങ്ങളുടെ മുന്നില് അവതരിപ്പിക്കുന്ന വിഎസിന്റേത് ഗീബല്സിയന് തന്ത്രമാണെന്നും പോസ്റ്റില് ഉമ്മന് ചാണ്ടി ആരോപിച്ചിട്ടുണ്ട്.
ഉമ്മന് ചാണ്ടിയുടെ ഫെയ്സബുക്ക് പോസ്റ്റിന്റെ പൂര്ണരൂപം:
എനിക്കെതിരേ കേസുകള് ഉണ്ടെന്നുള്ളതിനു തെളിവുകള് നിരത്തി എന്റെ നാമനിര്ദേശ പത്രിക തള്ളിക്കാന് ഞാന് ശ്രീ. വി.എസ്.അച്യുതാനന്ദനെ വെല്ലുവിളിച്ചിരുന്നു. ഇന്ന് എന്റെ പത്രിക സൂക്ഷ്മ പരിശോധനക്കുശേഷം വരണാധികാരി സ്വീകരിച്ചു. എനിക്കെതിരേ കേസ് ഉണ്ടെന്നുള്ളതിന് തെളിവിന്റെ ഒരു കണികപോലും നിരത്താന് ശ്രീ. വി.എസ്.അച്യുതാനന്ദന് കഴിഞ്ഞില്ല. അതുകൊണ്ട് എനിക്കെതിരേ അടിസ്ഥാനരഹിതമായ ആരോപണമുന്നയിച്ചതിന് ശ്രീ വി.എസ്.അച്യുതാനന്ദന് കേരളത്തിലെ ജനങ്ങളോട് മാപ്പുപറയുകയെന്ന സാമാന്യ മര്യാദ കാണിക്കണം.
എന്റെ പേരില് ഒരു എഫ്ഐആര് പോലുമില്ലെന്നു ഞാന് പറഞ്ഞപ്പോള് പുകമറ സൃഷ്ടിച്ച് അടിസ്ഥാനരഹിതമായ ആരോപണങ്ങള് ഉന്നയിക്കാനാണ് ശ്രീ. വി.എസ്.അച്യുതാനന്ദന് ശ്രമിച്ചത്. എന്നാല് എനിക്കെതിരേ കേസുകളൊന്നുമില്ലെന്ന് വ്യക്തമായ സൂചന നല്കിക്കൊണ്ട് ഇടതു പക്ഷത്തെ പ്രമുഖ ഘടകക്ഷിയായ സിപിഐയുടെ സംസ്ഥാന സെക്രട്ടറി ശ്രീ കാനം രാജേന്ദ്രന് രംഗത്തുവന്നത് വി.എസ്.അച്യുതാനന്ദന്റെ ശ്രദ്ധയില് പെട്ടിട്ടുണ്ടാകുമെന്നു ഞാന് കരുതുന്നു. മുഖ്യമന്ത്രിക്കെതിരേ കേസുകള് എന്നത് മുഖ്യമന്ത്രിക്കെതിരേ പല ഫോറങ്ങളിലായി നിലനില്ക്കുന്ന പരാതികളാണെന്നാണ് കാനം രാജേന്ദ്രന് വ്യക്തമാക്കിയത്. എനിക്കെതിരേ കേസുകള് ഒന്നുമില്ലെന്ന വാദത്തെ സാധൂകരിക്കുകയാണ് സിപിഐ സംസ്ഥാന സെക്രട്ടറി ചെയ്തത്. ശ്രീ അച്യുതാനന്ദന് പറഞ്ഞത് ഇടതുപക്ഷത്തെ പ്രമുഖ ഘടകകക്ഷിയെപ്പോലും ബോധ്യപ്പെടുത്താന് കഴിഞ്ഞില്ല എന്നാണിത് തെളിയിക്കുന്നത്.
എന്റെ പേരില് ഒരു കേസുപോലുമില്ലെന്ന സത്യം സിപിഎമ്മിന്റെ പോളിറ്റ്ബ്യൂറോ അംഗമായ പിണറായി വിജയനും ബോധ്യമുണ്ടെന്നു തോന്നുന്നു. അതാണ് ശ്രീ വി.എസ്.അച്യുതാനന്ദന് ആവര്ത്തിച്ചു പറഞ്ഞിട്ടും അക്കാര്യം ഏറ്റെടുക്കാന് പിണറായി വിജയന് തയാറാകാത്തത് എന്നു വിശ്വസിക്കുന്നു. ഇടതു മുന്നണിയിലെ പ്രധാന നേതാക്കള്ക്കുപോലും ബോധ്യപ്പെടാത്ത കാര്യം ആവര്ത്തിച്ച് ജനങ്ങളുടെ മുന്നില് അവതരിപ്പിക്കുന്ന ശ്രീ വി.എസ്.അച്യുതാനന്ദന്റേത് ഗീബല്സിയന് തന്ത്രമാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
