മേടം രാശി (അശ്വതി, ഭരണി, കാർത്തിക ആദ്യ കാൽഭാഗം): കീർത്തിയും തൊഴിൽ വിജയവും തേടിയെത്തുന്ന ദിവസമാണിത്. ശത്രുനാശവും നിയമപരമായ കാര്യങ്ങളിൽ വിജയവും പ്രതീക്ഷിക്കാം. സാമ്പത്തികമായ ലാഭത്തോടൊപ്പം കുടുംബത്തിൽ സമാധാനവും സന്തോഷവും നിലനിൽക്കും. മികച്ച ഭക്ഷണസുഖം അനുഭവിക്കാൻ സാധിക്കും.

ഇടവം രാശി (കാർത്തിക അവസാന മുക്കാൽ ഭാഗം, രോഹിണി, മകയിര്യം ആദ്യ പകുതിഭാഗം): ആശയവിനിമയങ്ങളിൽ അതീവ ജാഗ്രത പുലർത്തണം, അല്ലാത്തപക്ഷം അബദ്ധങ്ങൾ സംഭവിക്കാൻ ഇടയുണ്ട്. തൊഴിലിടങ്ങളിൽ സഹപ്രവർത്തകരുമായി അഭിപ്രായവ്യത്യാസങ്ങൾ ഉണ്ടാകാൻ സാധ്യത കാണുന്നു. ശാരീരികമായ അസ്വസ്ഥതകൾ അലട്ടിയേക്കാം.

മിഥുനം രാശി (മകയിര്യം അവസാന പകുതിഭാഗം, തിരുവാതിര, പുണർതം ആദ്യ മുക്കാൽഭാഗം): ശത്രുക്കളിൽ നിന്നുള്ള ഉപദ്രവങ്ങൾ വർദ്ധിക്കാൻ സാധ്യതയുള്ളതിനാൽ കരുതൽ വേണം. മാതാവിനോ മാതൃതുല്യരായവർക്കോ ആരോഗ്യപ്രശ്നങ്ങൾ മൂർച്ഛിക്കാൻ ഇടയുണ്ട്. ദമ്പതികൾക്കിടയിൽ അഭിപ്രായവ്യത്യാസങ്ങൾ ഉടലെടുക്കാതെ ശ്രദ്ധിക്കുന്നത് ഉചിതമായിരിക്കും.

കർക്കിടകം രാശി (പുണർതം അവസാന കാൽഭാഗം, പൂയം, ആയില്യം): സഹപ്രവർത്തകരുടെ പൂർണ്ണ സഹകരണത്താൽ ഏറ്റെടുത്ത കാര്യങ്ങൾ സമയപരിധിക്കുള്ളിൽ പൂർത്തിയാക്കാൻ സാധിക്കും. തൊഴിൽ വിജയവും ധനനേട്ടവും ഈ ദിവസത്തിന്റെ പ്രത്യേകതകളാണ്. രോഗശാന്തിയും ശത്രുനാശവും ഭക്ഷണസുഖവും അനുഭവപ്പെടും.

ചിങ്ങം രാശി (മകം, പൂരം, ഉത്രം ആദ്യ കാൽഭാഗം): തൊഴിൽപരമായ ക്ലേശങ്ങൾ വർദ്ധിക്കാനും മാനസികമായ ബുദ്ധിമുട്ടുകൾ അനുഭവപ്പെടാനും സാധ്യതയുണ്ട്. ശിരോ-നാഡീ സംബന്ധമായ അസ്വസ്ഥതകൾ അലട്ടിയേക്കാം. മറ്റുള്ളവരോട് ഇടപഴകുമ്പോൾ വാക്കുകളിലും പ്രവർത്തികളിലും വളരെയധികം സൂക്ഷ്മത പാലിക്കേണ്ടതുണ്ട്.

കന്നി രാശി (ഉത്രം അവസാന മുക്കാൽഭാഗം, അത്തം, ചിത്തിര ആദ്യ പകുതിഭാഗം): സർക്കാർ ആനുകൂല്യങ്ങൾക്കായി അപേക്ഷിച്ചവർക്ക് അത് ലഭിക്കാൻ അനുകൂലമായ സാഹചര്യമുണ്ട്. തൊഴിലിടങ്ങളിൽ മേലധികാരികളുടെ പ്രീതി സമ്പാദിക്കാൻ സാധിക്കും. കുടുംബത്തിൽ മംഗളകരമായ കർമ്മങ്ങൾ നടക്കാനും സന്തോഷം വർദ്ധിക്കാനും സാധ്യത കാണുന്നു.

തുലാം രാശി (ചിത്തിര അവസാന പകുതിഭാഗം, ചോതി, വിശാഖം ആദ്യ മുക്കാൽഭാഗം): ഗുണദോഷ സമ്മിശ്രമായ ഒരു ദിവസമായിരിക്കും ഇന്ന് അനുഭവപ്പെടുക. ദിവസത്തിന്റെ ആദ്യ പകുതിയിൽ ആരോഗ്യപ്രശ്നങ്ങളോ സ്ത്രീകളുമായുള്ള ഇടപാടുകളിൽ ദോഷാനുഭവങ്ങളോ ഉണ്ടായേക്കാം. എന്നാൽ ഉച്ചയ്ക്ക് ശേഷം കാര്യങ്ങളിൽ അനുകൂലമായ മാറ്റങ്ങൾ പ്രകടമാകും.

വൃശ്ചികം രാശി (വിശാഖം അവസാന കാൽഭാഗം, അനിഴം, തൃക്കേട്ട): ഏത് കാര്യത്തിൽ ഇറങ്ങിത്തിരിച്ചാലും മികച്ച വിജയം കൈവരിക്കാൻ സാധിക്കുന്ന സുവർണ്ണ ദിനമാണിത്. ശത്രുക്കളുടെ മേൽ വിജയം നേടാനും ഈശ്വരാനുഗ്രഹം സിദ്ധിക്കാനും സാഹചര്യമൊരുങ്ങും. പുതിയ വീട്, വാഹനഭാഗ്യം, ഭൂമി ലാഭം എന്നിവയും ബന്ധുജനങ്ങളിൽ നിന്നുള്ള പിന്തുണയും പ്രതീക്ഷിക്കാം.

ധനു രാശി (മൂലം, പൂരാടം, ഉത്രാടം ആദ്യ കാൽഭാഗം): കൃഷിയിൽ നിന്നുള്ള ലാഭവും ബിസിനസ്സിൽ വലിയ പുരോഗതിയും ഉണ്ടാകും. വാഹനഭാഗ്യം, പുത്രഭാഗ്യം, പുതിയ വീട് എന്നിവയ്ക്ക് യോഗമുണ്ട്. കുടുംബത്തിൽ മംഗള കർമ്മങ്ങൾ നടക്കാനും ദാമ്പത്യ സുഖം വർദ്ധിക്കാനും ഈ ദിവസം കാരണമാകും.

മകരം രാശി (ഉത്രാടം അവസാന മുക്കാൽഭാഗം, തിരുവോണം, അവിട്ടം ആദ്യ പകുതിഭാഗം): ജാതകത്തിൽ വ്യാഴം ബലമില്ലാത്തവർക്ക് മനഃസ്വസ്ഥത കുറയാനും നിയമപരമായ തിരിച്ചടികൾക്കും സാധ്യതയുണ്ട്. എന്നാൽ വ്യാഴത്തിന്റെ അനുകൂലമായ ദശയോ അപഹാരമോ നടക്കുന്നവർക്ക് ബിസിനസ്സിൽ ഉയർച്ചയും പുത്രഭാഗ്യവും വാഹനഭാഗ്യവും കൈവരും.

കുംഭം രാശി (അവിട്ടം അവസാന പകുതിഭാഗം, ചതയം, പൂരൂരുട്ടാതി ആദ്യ മുക്കാൽഭാഗം): ആരോഗ്യപരമായ ബുദ്ധിമുട്ടുകൾ അലട്ടാൻ സാധ്യതയുള്ളതിനാൽ ശ്രദ്ധ വേണം. ശരീരത്തിന് തളർച്ചയും ഭക്ഷണസുഖക്കുറവും അനുഭവപ്പെട്ടേക്കാം. മനസ്സിന് സ്വസ്ഥത കുറയാനും ശത്രുക്കളിൽ നിന്നുള്ള ദോഷാനുഭവങ്ങൾക്കും സാധ്യതയുള്ളതിനാൽ ജാഗ്രത പുലർത്തുക.

മീനം രാശി (പൂരൂരുട്ടാതി അവസാന കാൽഭാഗം, ഉതൃട്ടാതി, രേവതി): ബിസിനസ്സിൽ വ്യക്തമായ പുരോഗതി ദൃശ്യമാകും. കാര്യങ്ങൾ അവതരിപ്പിക്കുന്നതിലെ സുതാര്യത മൂലം എല്ലാവരുടെയും പ്രശംസ പിടിച്ചുപറ്റാൻ സാധിക്കും. അപവാദ പ്രചരണങ്ങൾ നിഷ്ഫലമാവുകയും കുടുംബത്തിൽ സമാധാനവും സൗഖ്യവും നിലനിൽക്കുകയും ചെയ്യും.

ജ്യോതിഷസംബന്ധമായ നിങ്ങളുടെ സംശയങ്ങൾക്കും പരിഹാരങ്ങൾക്കും  ജയറാണി ഇ വി 9746812212