കേരളത്തിൽ വേനൽ മഴ തുടരുമെന്ന് കേന്ദ്ര കാലാവസ്ഥാ വകുപ്പിന്റെ പ്രവചനം. തെക്കൻ കേരളത്തിലും മധ്യ കേരളത്തിലും മഴ കൂടുതൽ ശക്തമാകാൻ സാധ്യതയുണ്ടെന്നാണ് ഏറ്റവും പുതിയ റിപ്പോർട്ടുകൾ സൂചിപ്പിക്കുന്നത്. കാലാവസ്ഥാ വകുപ്പ് പുറത്തുവിട്ട ഭൂപടങ്ങൾ പ്രകാരം മാർച്ച് 8 വരെയുള്ള തീയതികളിൽ വിവിധ ജില്ലകളിൽ മഴയ്ക്ക് സാധ്യതയുണ്ട്. ഇന്ന് തിരുവനന്തപുരം, കൊല്ലം, പത്തനംതിട്ട ജില്ലകളിൽ പച്ച അലേർട്ട് പ്രഖ്യാപിച്ചിട്ടുണ്ട്. ഈ ജില്ലകളിൽ നേരിയതോ മിതമായതോ ആയ മഴയ്ക്ക് സാധ്യതയുണ്ട്.

നാളെ മഴ വടക്കൻ ജില്ലകളിലേക്കും വ്യാപിക്കും. എറണാകുളം, ഇടുക്കി, തൃശൂർ, പാലക്കാട്, മലപ്പുറം തുടങ്ങിയ ജില്ലകളിൽ മഴ മുന്നറിയിപ്പുണ്ട്. മാർച്ച് 7, 8 തീയതികളിലും തെക്കൻ ജില്ലകളിൽ മഴ തുടരാൻ സാധ്യതയുണ്ടെന്നാണ് പ്രവചനം. നിലവിൽ എവിടെയും ഓറഞ്ച്, റെഡ് അലേർട്ടുകൾ പ്രഖ്യാപിച്ചിട്ടില്ലെങ്കിലും ഇടിമിന്നലോടു കൂടിയ മഴയ്ക്ക് സാധ്യതയുള്ളതിനാൽ മലയോര മേഖലയിലുള്ളവർ ജാഗ്രത പാലിക്കണമെന്ന് സംസ്ഥാന ദുരന്തനിവാരണ അതോറിറ്റി അറിയിച്ചു.

അടുത്ത 24 മണിക്കൂറിനുള്ളിൽ സംസ്ഥാനത്തെ വിവിധ ജില്ലകളിൽ അൾട്രാവയലറ്റ് (UV) ഇൻഡക്സ് ഉയർന്ന നിലയിൽ തുടരാനിടയുണ്ടെന്ന് മുന്നറിയിപ്പ്. ചില ജില്ലകളിൽ UV ഇൻഡക്സ് 7 മുതൽ 8 വരെ ഉയരാൻ സാധ്യതയുണ്ട്. കണ്ണൂർ, ഇടുക്കി എന്നീ ജില്ലകളിൽ UV ഇൻഡക്സ് 8 ആയി രേഖപ്പെടുത്തിയിട്ടുണ്ട്. ഇത് ഓറഞ്ച് അലർട്ട് വിഭാഗത്തിൽപ്പെടുന്നതായി അധികൃതർ അറിയിച്ചു.