ആറ്റുകാൽ പൊങ്കാലയ്ക്ക് ശേഷമുള്ള ശുചീകരണ പ്രവർത്തനങ്ങളെച്ചൊല്ലി തിരുവനന്തപുരം നഗരസഭയിൽ ഭരണ-പ്രതിപക്ഷ പോര് മുറുകുന്നു. നഗരസഭയ്ക്ക് മുകളിലാണ് സർക്കാരെന്നും ഇടപെടേണ്ട കാര്യങ്ങളിൽ സർക്കാർ ഇടപെടുക തന്നെ ചെയ്യുമെന്നും മന്ത്രി വി. ശിവൻകുട്ടി വ്യക്തമാക്കി. മന്ത്രി സ്വന്തം വകുപ്പ് നോക്കിയാൽ മതിയെന്ന ബിജെപി നേതാവ് വി.വി. രാജേഷിന്റെ വിമർശനത്തിന് മറുപടി നൽകുകയായിരുന്നു അദ്ദേഹം.പൊങ്കാല കഴിഞ്ഞ് ദിവസങ്ങൾ പിന്നിട്ടിട്ടും പലയിടങ്ങളിലും മാലിന്യം കെട്ടിക്കിടക്കുന്നതിൽ മന്ത്രി അന്വേഷണത്തിന് നിർദ്ദേശം നൽകിയിട്ടുണ്ട്.

ജനങ്ങളുടെ പരാതിയും മാധ്യമവാർത്തകളും ഗൗരവകരമാണെന്നും, ശുചീകരണത്തിൽ ബോധപൂർവമായ വീഴ്ചയുണ്ടോ എന്ന് പരിശോധിക്കുമെന്നും അദ്ദേഹം പറഞ്ഞു. അതിനിടെ, മാലിന്യം നീക്കാത്തതിൽ പ്രതിഷേധിച്ച് ഡി.വൈ.എഫ്.ഐ ആറ്റുകാൽ കൗൺസിലർ ഓഫീസിലേക്ക് മാർച്ച് നടത്തി. എന്നാൽ സിപിഎം ബോധപൂർവം രാഷ്ട്രീയം കളിക്കുകയാണെന്നാണ് കോർപ്പറേഷന്റെ ആരോപണം.